[1] Saahka maanti tiri abatti Kiriisto kasookhayme ka, 'doo'di Ya'huude afi Giriig daago yaafohi Ya'huude afi Ibiraaniya daago leeiriire. Wihi tahe muunkhoyyohicho gololi maan dakkhan enenyet lagiso ma 'helaan.
[2] 'Deerka ergaanoti tomon ichoow lammee abatti tuumman isiwahte, wihi iche itidah, “Ma haaggan chirri nah Yeedi Waakh cheeknaan 'diinno, 'dee nah golol 'doo'd gisno.
[3] Walaalinyeey, et teeba goytiin ka magah khabto, Rubeyti Munyee laka rubeyohicho buuhto toro la kharee soobahcha, hila a gelinno.
[4] Nah la 'dee awteenyuu, weysi ichoow hili Waakhe Yeedi Waakh lacheeko a gello.”
[5] Urur tuumman wihi ergaano tidah jilhaate. Etoo Isiteefano layadeehe, Rubeyti Munyee buuhisse toro Waakh weyti kakhuufo soobahsateen. Fiilif ichoow Burookoras ichoow Nikaanor ichoow Tiimon ichoow Barmena ichoow eti ilkerengeetti Antiyookhiya Nikolaawus layadeehe wihi 'doo'di Ya'huud wahti iurgiye laka soobahsateen.
[6] 'Doo'da ergaano liikeene iche la iweysatte, toro la dahano korisse.
[7] Yeedi Waakh 'deerka taa'he orey isohte. Tiri abatti Kiriisto ilkerengeetti weene Yeerusaleem ka weyti kakhayme, kuhaaniyyohi ittaawe laka Wori Haaggan kakhuufeen.
[8] Isiteefano weyti haaggi Waakhe buure ichoow miige buuhicheen. Ulla girmohi buure ichoow wahanyeyyohi miigti Waakh tuso 'doo'di Ya'huud goyaka haaggiche.
[9] I'daasenyi 'doo'doo Isiteefano iriir leegele. 'Doo'da a ayyo ya, a 'doo'doo minkichoki weysiit, “'Doo'di Lasoofure,” layadeeh ichoow 'doo'di Ya'huude ili Kureene kayimiy ichoow ki Alekisaandariya ichoow ki Kiliikiya ichoow ki Aassiya. 'Doo'da Isiteefano iriir leegele,
[10] i'daasenyi Isiteefano kharati Rubeyti Munyee siisse ka yeyyeede, eticho yeed ilaabin yabuu'd mele.
[11] 'Deerka dagsi ka 'doo'doo chasteene, icho la wihi icho yidaaheen, “Nah usuhi Muusa ichoow Waákh igafe a daagne.”
[12] 'Deerka 'doo'd ichoow ewweenki Ya'huud ichoow tagaammeti amurre sootukkicheen. Isiteefano khabteene, khaateene Jaldaabti Weene Ya'huud igeecheen.
[13] 'Doo'doo garti beenaat cheeko la soobahcheen. Icho la wihi icho cheekeen, “Eta kol dakkhan meessa lagan ichoow amurre Muusa igafa.
[14] Usuhi, ‘Yeessoha ilkerengeetti Naasaret a yamiite, minka Waakh jejjebcha, hugumme Muusa la urgiyicha,’ essi a daagne.”
[15] 'Doo'di kootte jaldaab goya fiddiye tuumman Isiteefano weyti yeye, usuhi fooliis i'di fooli herti Waakh u ababo arge.