[1] Saawulo laka intaas a kijire, ullaka Isiteefanohi layagiis a ayyiche. Maantaas on urur Kiriistoki ilkerengeetti weene Yeerusaleem kajiro sinati weyti loomhicho lasookhabte. Ergaano on menye, 'doo'd Kiriisto tuumman ilassi Ya'huudiya ichoow ki Saamariya iche liitaa'hiche.
[2] 'Doo'doo Waakh karooro Isiteefano khaate hawwaale, toro weyti kooyeen.
[3] I'daasenyi Saawulo urur Kiriisto massin 'doona, kolba minkoo gela mejel ichoow deyyeho sookhabta sookhaata jeela gessa, hida.
[4] 'Doo'da taa'he la a irte, Wori Haaggan enenyet tuumman icheeke.
[5] Fiilif a khubte ilkerengeetti weene ili Saamariya irte wori Ki Lasubhe miinsan intaas ka cheeke.
[6] Ururi mujjum Fiilif dagansate, wahanyeyyohi ittaawenye miigti Waakh tuso us yeelo arge tuumman la, waha Fiilif essi raahe.
[7] 'Doo'di ittaawenye ginnayyo dakhtaan, riirit ka ginnayyo kabaheene, 'doo'di sare hanjaawte ichoow 'doo'di luhlo laa laka a lasamaache.
[8] 'Deerka ilkerengeettaas tuumman a hamaad kaldach on.
[9] Etoo Siimon layadeehe ilkerengeettaas ka moreenye, 'doo'di ili Saamariya tuumman weyti girmaache a jira. Ulla a isatahnooche etoo khumman iskayeele.
[10] 'Doo'di ilkerengeeteet tuumman, ki wewween ichoow ki nunnugul laka yeediis a raaha, toro la mehe yadeehiin ya, “Eta a miigti Waakhe miigti buure layadeeh.”
[11] Wihi icho karaahaan la a jeenteti us goycho ka geeddi deer morotiis ka girmo iyeele.
[12] I'daasenyi chirri icho Wori Haaggane dakhi Waakh ichoow Yeesso Kiriisto miinsane Fiilif cheeko rummeesteen ka, mejel ichoow deyyeho ba labaattissiye.
[13] Siimon laka awtiis u Yeesso rummeeste, inkoo labaattissiye ka Fiilif meel tuumman leeirte. Wahanyeyyohi miigti Waakh tuso ichoow wihi ittaawenye weeli enenyet yeelin iubaa'dane us arge kagirmeeste.
[14] Ergaanoti ilkerengeetti weene Yeerusaleem kajirto maanti iche saggi 'doo'di Saamariya kajiro Yeedi Waakh iraaho daagte ka, Beetero ichoow Yoohana Saamariya ieregte.
[15] Iche la timiyye i'doo 'dee 'doo'daas Rubeyti Munyee i'helo u, 'doo'daas Waakh iwahte, 'doo'd la Rubeyti Munyee 'hele.
[16] I'di tahe 'doo'daas magah Yeessohi Kamure on lakabaattissiye menye, Rubeyti Munyee uliba ma isooyagin.
[17] 'Deerka Beetero ichoow Yoohana ba dahano korcheene, 'doo'd la Rubeyti Munyee 'hele.
[18] Siimon la ergaanoti dahan enenyet korisso enenyetaas Rubeyti Munyee 'helo arge, ergaano chilimme a atin siicha iyidahye,
[19] toro “Ani laka miigtaas isiicha, 'dee eti an dahan korcho tuumman Rubeyti Munyee a 'helo,” iyidah.
[20] Beetero wihi us ilaabe, “Chilimmetaah a kileebaabaato. Wihi tahe at wihi Waakh kisiicho, kol at chilimme kagatatti, iche koogtahe.
[21] At hileenyo ka meessoor rucchul laka ma khabto, a mehe uuraah Waakh ortiis ka ma fissanee.
[22] Uskeela kasoonokho, Kamur waho. Kolossoo 'dee Kamur mala suujenye at uuraah kakhabto ikaakutaayi.
[23] Wihi at tahe an kaargo, a atihi inaaf lehe, rubeytaah la uskeel kalday on anti.”
[24] Siimon la wihi us ilaabe “Kamur isoowah uus wihi at itidah iraahinee.”
[25] Inkoo icho walah tuumman 'doo'd tuseene icho Yeedi Kamur cheekeen ka, ilkerengeetti weene Yeerusaleem inokhteene, goobassi ittaawenye ilkerengeetti Saamariya kijiro ka Wori Haaggan 'doo'd abcheen.
[26] Hertoo Kamur la wihi iche Fiilif itidah, “Sookahe, gurro tabe, jiti ilkerengeetti weene Yeerusaleem kakhubti ilkerengeetti Gaasa irti isoho.” Waha la a jiti hidaadeet.
[27] Ulla kahe irte. Jit ka etoo ili Saa'daame sang'ee 'hele, ulla a etoo khummane chilimmeti makhaabassi karnatenye ili Saa'daam dakhatti Kandake layadeeh tuumman khuccho. Ulla ilkerengeetti weene Yeerusaleeme irte, Waakh wahte.
[28] Ulla garruhi fara'de jiitto kafiddiya, iliissa inokhta, chiirnaanneti eti Waákh íyeyyeedo Isaaya layadeeh chiire, iche sooma.
[29] Rubeyti Munyee la wihi iche Fiilif itidah, “Nyaame, garruhaas fara'de jiitto haggahiis fiddi.”
[30] Fiilif 'deerka garruhi fara'de jiitto inyaame, et usuhi buuggi eti Waákh íyeyyeedo Isaaya layadeeh chiire soomo daage. Fiilif wihi us worsate, “Waha at soonto a kigelaan?”
[31] Ulla wihi us ilaabe, “Chirri etoo ikasoodowdowin saggoh igardi?” 'Deerka Fiilif wahe, 'dee garruhi fara'de jiitto a koro garabiis a orronti.
[32] Eti sang'ee Chiirnaanneti Waakh goyaka wahane soome, “Usu i'di naffi iiyyaate inti lakagoorraho liiwoyuu, toro la i'di heleenki tim lagoggoocho iyeedin u, afiis ma bukkhin.
[33] Maanti lakhaanyo lakadowe, jiti fissan ka ma lahukkumin. Et nyaakhut nyaakhutiis kaayyeedo mele. A mehe jirotiis harrata ka a lakakhaate.”
[34] Eti sang'ee wihi us Fiilif worsate, “Bal isoocheek, eti Waákh íyeyyeedo awtiissa kayeyyeeda bal etoo addan?”
[35] Fiilif 'deerka chiirnaankaas Chiirnaanneti Waakh on kasookhabte, Wori Haaggane Yeesso miinsan icheeke.
[36] Jit ka 'dulaani bicchehoo 'heleene eti sang'ee la wihi us yidah, “Yey, bicche kallaayo! A i'doh ani liibaattissiyin?”
[38] Ulla amur bahche garruhi fara'de jiitto a latoollicho. Fiilif ichoow eti sang'ee ba bicche goya iyageene Fiilif la usu baattissiye.
[39] Chirri icho bicche kasookoreen ka Rubeyti Kamur Fiilif chirraas on khaatte, eti sang'ee la toro Fiilif ma argine, i'daasenyi usu hamaad ka jitiis tabe.
[40] I'daasenyi Fiilif inkoo us ilkerengeetti Assotos ka issookase ka, ilkerengeeto tuumman dah kagooche, Wori Haaggan cheeke ichoowka Kaaysareya eleele.