[1] Geeddassaas on ka karnati 'Herood Agiribba layadeeh urur Kiriisto goyaka 'doo'doo khabte, usuhi sina omhicho 'doonaa.
[2] Yaakoobohi walaal Yoohanee birlabe lakayigis.
[3] 'Herood la chirri us saggi 'doo'di Ya'huud waha ikahamaado arge ka, Beetero laka sookhabte jeela gesse. Wahaas la maanti Daawti Makaateti Liikhasin iche yitaaheen.
[4] Inkoo Beetero jeela lagesse, Beetero a lakhaate iskarti toorribto rabit affarenye rabite ba la et affar tahe liigeeche 'dee toorribta. 'Herood la mehe 'doona ya, usuhi Beetero inkoo daawti Baasakka kutte 'doo'd tuumman ortiis ka hukkumo.
[5] Beetero 'deerka jeela lagesse. I'daasenyi urur Kiriisto jeentetiis u weyti Waakh wahte.
[6] Ibeenki 'dee saahka 'Herood Beetero soohukkumo ka, Beetero et lamma iskareete dahcho ur'da, biingo lamma lakahide, tooba etoo iskareete lakahide, iskarti lammeenye aritti jeela toorribto la a jirta.
[8] Herti Waakh la wihi iche Beetero itidah, “Saabaah jurkhiche, kobohaah gesso.” Beetero la i'daas yeele. “Kabuu'daah laka gesso, isooraah,” itidah.
[9] Beetero la raahe, jeela kaleebahe, i'daasenyi saggi wahaas herti Waakh yeesse rumanka iyitaaheen ma kasine, kol us fooltabcho argo on koogyahe.
[10] Eti oraate arit yaakhicho ichoow ki lammaatteet kasookuteene aritti ga'daare ilkerengeet liikabaho sooeleeleen. Arite la keley on furnante icho la tabeen. Inkoo icho inti jitat iskachibaan sooeleeleen ka, chirraas on herti Waakh usu katabte.
[11] Beetero 'deerka neybaate, wihi us yidah, “Toolla rumanka a uba, Kamur hertiistoo a isooerge, hiinaan 'Herood ichoow wihi tuummane ani isooyateehe 'doo'di Ya'huud garti ikaribe.”
[12] Chirri us iskase ka min Maariya irte. Maariya la a abar Yoohanahi toro magahiiskoo Marko layadeeh. Minkaas la 'doo'di ittaawenye Waakh wahti iche kajira.
[13] Beetero la yimiyye afafhi kharaat guggu'dde inanti falfeenye Rooda layadeeh itimiyye leeyeedde.
[14] Chirri iche hooy Beetero garatte ka weyti hamaadde, min ma furin ba nyaante 'doo'd saggi Beetero khar itoollo icheekte.
[15] 'Doo'd la wihi us inám iyidah, “At a sirgo!” Iname la matah miigeysatte, “Mele, a rum,” itidah. Icho la toro, “A hertiisti Waakh,” iyidaaheen.
[16] I'daasenyi geeddaas tuumman Beetero afaf on soojaha. 'Da'ddaboka afaf fureene, chirri icho Beetero argeen ka weyti girmeesteen.
[17] Ulla dahan ka gammadicha iyidahye, saggi Kamur jeela ikasoobahche icheeke. “Waha Yaakoobo ichoow 'doo'di Kiriisto rummeeste icheeka,” iyidahye, bahe intoo addan irte.
[18] Baryo ka, iskarti Beetero toorribto mal gele, jeenteti wihi Beetero kayitah u.
[19] Inkoo iskar 'Herood weyti Beetero yowatte waayte ka, 'Herood iskar wowworsate amur bahche iskar omoot igooche. 'Herood 'deerka ili Ya'huudiya kakahe irte ilkerengeetti Kaaysareya geeddoo fiddiye.
[20] Karnati 'Herood Agiribbahi oraate 'doo'di ilkerengeetti Tiiro ichoow 'doo'di ilkerengeetti Siidon ba weyti kahollowe. Icho la saamo ka irteene sooargeen. Kolooraat la eti uranti karnat iweene Bulaastas layadeeh iche ankicho leekeeneen. Irteene 'Heroodha nebey daaheen, i'di tahe ilicho il 'Heroodhane golol ka'hela.
[21] Ibeenkoo isliigooche ka 'Herood darfohiiski karnannoon gessate komborti antoot koorronte, 'doo'd itolche.
[22] Urur la rirriire, “Weeli enenyet mee yeyyeedo, waakkhoo yeyyeeda,” yidaaheen.
[23] Chirraas on jeenteti 'Herood Waakh ikoolin u, hertoo Kamur usu gu'dubte, ulla deyyah uur yumheene, yumuy.
[24] I'daasenyi Yeedi Waakh orey on isohte, 'doo'di ittaawe la Yeesso rummeeste.
[25] Chirri Barnaba ichoow Saawulo hilicho buuhicheen ka, ilkerengeetti weene Yeerusaleem kasoonokhteene, Yoohanahi magahoo Marko layadeeh khaatteene ilkerengeetti Antiyookhiya irteen.