[1] Baawulo la Jaldaabti Weene Ya'huud indo katoolliche, yeye, “Yaaftaay, an ichoowka maalinka rubeyteeyti suujoon ikacheekan ka, hileey a buuhiche Waakh ortiis ka,” iyidah.
[2] Kuhaanihi weyti weene Anaaniya layadeeh la 'doo'di Baawulo garabiis toollo, amur ibahche af a lagu'ddo.
[3] Baawulo 'deerka wihi us iyidah, “Waakh a kigu'dda, atiha etoo haaggan iskayeesso! At intaase kafiddiita amurre Muusa ka ihukkunta, i'daasenyi ati rubeytaah amurre Muusa jebissa cha'at amuri liikagu'ddo bihisso.”
[4] 'Doo'di kootte Baawulo garabiis toolle la wihi us Baawulo iyidah, “Ati kuhaanihi weyti weene Waakhe abaarta!”
[5] Baawulo wihi us ilaabe, “Yaaftaay, an saggi us kuhaanihi weyti ween iyahe ma kasin, a mehe wihi chiiran, ‘Eti 'doo'daah iween wihi suuje iidaahan.’ ”
[6] Baawulo 'deerka saggi gaasichekoo Farissaayo itahe, gaasichekoo la Sadukaayo itahe garte Jaldaabti Weene Ya'huud goyaka riire, “Yaaftaay an a Farissaayo, a weeli Farissaayo. Wihi inta ka liikahukkumo a jeenteti an 'doo'di tuume berri sookaho ikhajjeelo,” yidah.
[7] Uus i'daas yidah ka, 'doo'di Farissaayo ichoow ki Sadukaayo isleeiriire, 'deerka seley lagowe.
[8] I'di tahe Sadukaayo mehe tadeeh ya, omoot ka ma lasookaho, herti Waakh la ma jirto, wahanyeyyohi Waakhe jiro khabo liiargin laka ma jiraan. I'daasenyi Farissaayo saggi wahaas tuumman ijiraan a cheekta.
[9] Riirit weyti buuraate ichoowka tagaammetoo amurre Muusa Farissaayee kahte, “Eta suujoon nah kaagarro mele,” tidah. “Eemba hertoo Waakhe leeyeedde, ommos wahanyeyyohoo Waakhe jiro khabo liiargine usu leeyeedde?”
[10] Iriire weyti uskulaatte ichoowka eti iskar tuumman itoollo ichohi Baawulo seley goocho karoore. Amur bahche iskartiis ergate a iratti Baawulo 'doo'd a soosarto, a sookhaatto uranti iskareet a keento.
[11] Saahka ibeen Kamur Baawulo hagga tolossate wihi us yidah, “Wohoo rucchul laka akaroorin! Saggi at ilkerengeetti weene Yeerusaleem ka garteey iyeedde saggaas on ilkerengeetti Rooma ka laka garteey iyeedda.”
[12] Ibeenki kaas sooraaho chirdeer ka 'doo'doo Ya'huud is'hele saggi icho Baawulo iyagiisiin kamasseen. Daatteene, sammata icho Baawulo iigaasan ma golossataane ommos bicche laka ma yabhuubiin.
[13] 'Doo'di waha isleegooche tomon affar laka a kuta.
[14] Irteene, kuhaaniyyohi wewween ichoow ewweenki Ya'huud ba iirteene, “Nah a isleedaatanne, sammata nah Baawulo iigaasan ma golossanni,” iyidaaheen.
[15] “Toollaka atin ichoow Jaldaabti Weene Ya'huud ba eti iskar tuumman itoollo farniin i'diicha, Baawulo a sookhaato. I'di 'doo'doo runti wohoo kaabti iskayeela. Nah la a tannabanne usu nagiis geeddi us inta isooeleelin.”
[16] I'daasenyi Baawulo eysinkiis waha daage, irte, Baawulo minki latoorribo ka icheeke.
[17] Baawulo la etoo koobbintoo iskareet itoollo wahe, “Eta nugul wohoo us eti iskar tuumman itoollo icheekti khaba, khaate igeey,” iyidah.
[18] Et la ínam khaate eti iskar tuumman itoollo igeeche. Etoo koobbintoo iskareet itoollo wihi us yidah, “Eti hidane Baawulo layadeehe eta nugul khaate ati igeey iyidah. A mehe wohoo us kisoocheekti, iche khaba.”
[19] Eti iskar tuumman itoollo eti nugul dahan khabte khaate, 'dol geeche, “Mehe isoocheekin 'doonta?” worsate.
[20] Ulla wihi us yidah, “'Doo'di Ya'huud mehe iskadaage ya, atihi saahta Baawulo Jaldaabti Weene Ya'huud orche keento. Iche la i'di 'doo'doo runtoo usu kayowti, iche iskayeessa.
[21] Alla icho adagansan, i'di tahe 'doo'di dagti usú jit ka sugo tomon affar laka a kuta. Icho la a daatteene, sammata icho usu iigaasan ma golossataane ommos bicche laka ma yabhuubiin. Icho la toolla yeedicho a massicheene ati on ayye kaasugaan.”
[22] Eti iskar tuumman itoollo eti nugul 'diiche toro leefarme wihi us iyidah, “Saggi at waha ikasoocheekte, etoo kalday laka iicheekin.”
[23] Eti iskar iween 'deerka et lamma kooba koobbintoo iskareet itoollo wahe, wihi us iyidah, “Nyaama, iskarti kud lammee ichoow et tomon teeba fara'd korto ichoow et kud lamma toorar khabto ilkerengeetti Kaaysareya iratti soobahcha, 'dee saha'd seyyahti ibeen ka a kahto.
[24] Baawulo laka fara'doo us koro siicha, Gaafanahi Feelig layadeeh la nebey igeecha,” iyidah.
[25] Eti iskar iween sagguu khadaab ichiire.
[26] Eti khadaaba soochiiro, a ani Kilaawudiyo Luusiyas. Eti an ichiiro la a atihi weene, gaafaneenye Feelig layadeeh. Nebeytaah ma furatti.
[27] 'Doo'di Ya'huud eta a khabte igaasan leheet. I'daasenyi iskar khaadde usu ribe, i'di tahe saggi us eti ili Rooma liiekkaacho iyahe a abde.
[28] Anna wihi icho usu kacheektaane aban 'doone, khaate, Jaldaabtichoti Weene Ya'huud igeeche.
[29] An mehe kase ya, wihi icho usu kacheektaan a wahanyeyyohi amurreti Ya'huud miinsan, i'daasenyi wahanyeyyohaas goya walah omoot liikagoocho ommos lakahido goya kijiro mele.
[30] Chirri saggi 'doo'doo ogoos iyowti liisoocheeke ka, an chirraas on a kisooerga idah. Anna toro 'doo'di usu wohoo kakhabo amur ibahche, wihi icho usu kacheektaan ati a kikeeneen.
[31] Iskare 'deerka wihi liiyidah yeesse, ibeenkaas goya on Baawulo khaatte ichoowka ilkerengeetti Antibaatiris geesse.
[32] Ibeenki kaas sooraaho ka, iskarti luhlo kasohatti uranti minki iskareet inokhatte, ti fara'd fuusso la Baawulo orey ileesohatte.
[33] Chirri iskarti fara'd fuusso ilkerengeetti Kaaysareya sooeleesse ka, gaafanahi Feelig layadeeh khadaab idiibte, Baawulo laka dahanohiis gelisse.
[34] Gaafana khadaab soome, Baawulo boroofenhi us kayimiy worsate. Chirri us saggi us inti Kiliikiya layadeeh ikayimiy abte ka,
[35] wihi us yidah, “Chirri 'doo'di walah kaacheekti yimiy iche woraah daaga.” 'Deerka amuri Baawulo minki buurenye gaafana goorat 'Herood dise ka latoorribo bahche.