[1] Baawulo wihi us yidah, “Yaaftaay ichoow ooyenyeey, bal geedda an ortiin ka isiyeyyeedo idagansada.”
[2] Icho chirri icho usuhi afi Ibiraaniya icho kaleeyyeedo daageen ka, rukkuy goocheen. Baawulo 'deerka wihi us yidah,
[3] “An a Ya'huude, ilkerengeetti Taarso ili Kiliikiya kijirto liikadele, i'daasenyi ilkerengeetti weene Yeerusaleeme kaweynaade. Ani amurre aacchinyeteen weyti liiabche, eti iabche la a Gamaliyeel. An laka i'da maanta atinhuu, Waakkheen a isibahche.
[4] Jeentetaas u 'doo'di goorat jita Yeesso enenyet abche raaho sina omhiche, ogoos laka 'doone. Mejel ichoow deyyeho a sookhabde jeela gesse.
[5] Kuhaanihi weyti ween ichoow Jaldaab tuumman saggi wihi an eldi rum iyahiin a cheekaan. An icho khadaabi icho 'doo'dichoki Ya'huude ilkerengeetti Damaasko kajiro ichiireene kakhaadde, intaas irde 'dee 'doo'daas sookhabda, ilkerengeetti weene Yeerusaleem keena, sina loomhicha.
[6] “Chirra an ilkerengeetti Damaasko isoodowwaade ka, doglaan on geeddi maalimeet ka banayhi weyti ababo serey kasoobaheene 'dolloheey gu'ddeen.
[7] Anna il gu'dde, chirraas ka hooyoo, ‘Saawulo, Saawulo! A i'doh ani sina iomhissa?’ idowo daage.
[8] “Wihi an worsade, ‘Kamur at a ayyo?’ “Wihi us isoolaabe, ‘An a Yeessohi Naasarete at sina omhisso.’
[9] 'Doo'di iwalhiche banay a arge, i'daasenyi hooyi eti ileeyyeedo ma aban.
[10] “Anna wihi an worsade, ‘Kamur mehe yeelo?’ “Kamur la wihi us iyidah, ‘Kahe, ilkerengeetti Damaasko iro, 'dee intaas ka wihi Waakh kiabbire at yeesso a lakisoocheeko.’
[11] Jeenteti banayhi ababo indo itireen u, wahalheey iangaamicheene ilkerengeetti Damaasko igeecheen.
[12] “Etoo Anaaniya layadeeh ani iargin yimiy. Us weyti Waákh karoora toro amurre Muusa mujjum raaha, 'doo'di Ya'huude Damaasko kajiro tuumman la weyti usu inkaanyita.
[13] Ulla iyimiyye haggeey sootolossate, ‘Saawulohaaw, il agar!’ iyidah. An chirraas on il arge, usu laka arge.
[14] “'Deerka wihi us yidah, ‘Waákh aacchinyeteen a kisoobahsate, 'dee mali us kikhabo abatta, toro la Eti Fissan agarta, toro usuhi hooyiis ka kileeyyeedo daagta.
[15] At gartiis a laabta toro wihi tuummane at agarte toro daagte yaafo tuumman icheekta.
[16] Toollaka mehe sugta? Tolosso a kibaattissiyo, uskeelaah a lakaadikho geeddi at magahi Kamur wahto.’
[17] “Maanti an ilkerengeetti weene Yeerusaleem inokhde, minki Waakhe buure goyaka Waakh wahdaayi fooltabcho itimiy.
[18] Fooltabcho ka Kamur arge, ulla iiyeyye, ‘Arari! Dowwa ilkerengeetti weene Yeerusaleem katab, i'di tahe 'doo'd inta ka weheeyki at icheekto ma dagansati.’
[19] “Wihi an ilaabe, ‘Kamur, 'doo'da saggi goorat an kolba minkoo weysiite Ya'huud iirde, 'dee 'doo'di kirummeesti jeela igesso toro ijaho, a garta.
[20] Maanti Isiteefano jeenteti us woraah icheeko liiyigis, ani rubeyteey intaas a kajire, ogoossiis ayyiche, darfohi 'doo'di usú yigis yaakhiche.’
[21] “Kamur la wihi us ani iyidah, ‘Nyaam, ani yaafohi Ya'huud ieheynane fogaate kiergada.’ ”
[22] 'Doo'd Baawulo dagansate ichoowka yeedaas yaafohi Ya'huud ieheynan miinsan yidah. 'Deerka enenyet weyti riire, “Eta harrata kabahcha! Agiisa, jiro ma iroone!” yidaaheen.
[23] Geedda icho rirriiraan la, kabuu'ddeticho a jillaanjillichaane, ebeer serey ikahchaan.
[24] Eti iskar tuumman itoollo amur bahche 'dee Baawulo a lakhaato, minki iskare fiddiito goya a lageecho, laajja ka a ladoocho, walah a laworsati, 'dee riirita geeddeenye 'doo'da Ya'huud usu kariiro wihiis a laabti.
[25] Chirri icho hidhideene, icho laajja ka doon leheet ka, Baawulo wihi us eti koobbintoo iskareet itoollo intaas toollo iyidah, “Eti ili Rooma liiekkaacho geeddi kootiin ka usu uskeel yeele liikagoon laajja ka ladoocho ichoow amurre a israahaan?”
[26] Chirri eti koobbintoo iskareet itoollo yeedaas daage ka, nyaame, eti iskar tuumman itoollo wihi us worsate, “Waha a mehe at yeesso? Etaas a eti ili Rooma.”
[27] Eti iskar tuumman itoollo la Baawulo iyimiyye, “Rum isoocheek, at a eti ili Rooma liiekkaache?” worsate. Wihi us ilaabe, “Aa.”
[28] Eti iskar tuumman itoollo la wihi us yidah, “An chilimmeti buurenye sirgaal igute, eti ilaas itah.” Baawulo wihi us ilaabe, “Ani delmaattaaya eti ilaas ikayeesse.”
[29] 'Doo'di kootte Baawulo walah worsan leheet chirraas on Baawulo kasoofurfurte. Eti iskar tuumman itoollo laka weyti nahe. I'di tahe Baawulohi eti ili Roomeenye us biingoyyo gesse ka amurreti ili Rooma a jebche.
[30] Eti iskar tuumman itoollo wihi rumanka 'doo'di Ya'huud Baawulo kacheekti iche aban 'doona, ibeenki kaas sooraaho ka Baawulo fure, amur bahche kuhaaniyyohi wewween ichoow Jaldaabti Weene Ya'huud tuumman ba tol iwahe. 'Deerka Baawulo sookhaate, orcho toolliche.