[1] Chirri saggi nah ilkerengeetti Rooma ili 'Deylaan kajirto kooban ka iiranni lagooche ka, Baawulo ichoow 'doo'doo addane hidan ba, Yuuliyashi koobbintoo iskareet itoollo, Koobbin Kaaysar layadeeh iween dahan lagesse.
[3] Ibeenki kaas sookhuccho ka ilkerengeetti Siidon gelle. Yuuliyas la weyti Baawulo ihaagganeete, 'diiche irte, aalassiis iirte icho la wihi us 'doono siicheen.
[4] Intaas kakahne, kurti bicche dahcho kijirto Kuuburo layadeeh berihiche tabne, a mehe hafari kooban jeycho ankaas ka a deefaa.
[5] Chirri nah bey aficheki boroofenneti Kiliikiya ichoow Bambiiliya kijiro katabne bey dah kagoonne ichoowka ilkerengeetti Muura boroofenhi Lukkiya kajirto nimiy ka, kooban kasooyegne.
[6] Intaas ka eti koobbintoo iskareet itoollo, koobanhi ilkerengeetti Alekisaandariya kayimiyye ili 'Deylaan isohti 'hele, nah korche.
[7] Jeenteti hafari miige kooban ijeychuu, ibeenneti ittaawe samacchaar on sohanne, ichoowka nyif ka ilkerengeetti Kiniidas idowwaanne. Hafar la kooban jit buuche, 'deerka inti Salmoone layadeehe kurti bicche dahcho kajirto Kireete layadeeh gurrotichee tabne.
[8] Nyif ka beyti buure afiche iranne ichoowka inti kooban katolossataane Afi Haaggan layadeeh ka tolossanne. Intaas la, ilkerengeetti Laasaaya ma kadeer.
[9] Ibeenneti ittaawe a kutte, toro la ibeenki orran Ya'huud af hiiti a kute, hayti orran hafar weyti miigyahe la a soomarte. Geeddaka sohoti orran koobanhi buure ka lasohti a geeddi us omoot laka keeno. Baawulo 'deerka 'doo'd tootooche,
[10] “Era, wihi an kase, chirri inno orey isohanne, meehi kooban kajiro a baaba, kooban laka uskulaataane, enenyet gaasoo laka tuuma,” iyidah.
[11] I'daasenyi eti koobbinti iskareet itoollo wihi Baawulo essi menye wihi kootte eti kooban iween ichoow wihi eti kooban leh yidaaheen on raahe.
[12] Meessi Afi Haaggan layadeeh inti kooban hayohi roffo fiddiyaan mee gone, 'doo'd buurtiis koobanhi orey isohti gooche, ilkerengeetti Foonige eleelin 'doonaanee. Afaas Kireete kijiro a gee'ddime, bicchehiche la gurro ichoow miige yeyaan.
[13] Maanti hafaroo samacchaare gurro kayimiy ka, 'doo'd kol wihi icho 'dooneen yateehiine koogyahe. 'Deerka birti kooban jeyisso soolaabeene kurti bicche dahcho kajirto Kireete afiche tabeen.
[14] Geeddoo rucchul on ka, hafaroo weyti miigenye, “Hafari Miigeet,” layadeeh kurti bicche dahchee ka sookahe,
[15] kooban gu'dde. Jeenteti hafar kooban ilaabe u, kooban woynaan 'diinne, 'deerka hafar on kooban woye.
[16] Chirri nah kurti rucchule Kawuuda bicche dahcho kajirto gurrotiche eleelle ka, koobanhi rucchule koobanhi addan 'dubiis kanyutan nyif ka bicche goya kasoobihinne, kooban korinne.
[17] Inkoo icho koobanhi rucchul koobanhi buure kookkhicheen ka, yabarre kooban iliis kajurkhicheen, uus jejjebinee. Koobanhi yoohti Liibiya bicche iliis kijiro jeychaane karooreen. Darfohi kooban woyo yagcheene 'dee hafar kooban a woyo.
[18] Hafaraas miige ma yaasin ba ichoowka ibeenki kaas sooraaho ka, meehi kooban goya kajiro beyti buure goya kalug'deen, uus bicche kooban khaatinee.
[19] Ibeenki kaas sooraaho ka, dahanohicho ka yabarre ichoow meehi koobanoot sesseyeen.
[20] Ibeenneti ittaawe nah orrah ma argine, ommos yiyyihimo ma argine, hafar la weyti on kakhayma, ichoowka khajjeeli nah laribo rogne.
[21] Inkoo 'doo'd geeddi deer golol laan fiddiye ka, Baawulo orcho tolossate, “Era cha'atin kootte waansiheey raahteene, kurti bicche dahcho kijirto Kireete inno fiddiine, 'danota tuumman ma inno isoobahto, waha tuumman la ma waayno,” yidah.
[22] “I'daasenyi toolla a atin hawwaasde abur'dowina! Etiinkoo kalday laka jirotiis ma waayo, kooban on massata.
[23] Ibeenkate Waakkhi an kiis ahe toro an ihilo hertiistoo garabaaya tolossatte,
[24] wihi iche itidah, ‘Baawulo, roorro akhabin! Ati Kaaysar ortiis a tolossatta. Haaggi Waakhe buure ka, 'doo'di kooban kaaleejiro tuumman, koo kalday laka ma yamuut.’
[25] Era, toollaka abur'dowina! Wihi tahe an Waakh a kakhuufa, i'daas liiyidah on la tateeh.
[26] I'daasenyi hafar a inno woya, kooban la kurohoo bicche dahcho kajiro ka kichekoo kajejjebaan.”
[27] Uu' goorat hafari miige sookahe, teeba lamma kutte. Beyti Buurenye Meditereeniya goyaka hafar kolba ankoo nah iwoye. Chirri il ekka seley kagowe ka, 'doo'di kooban woyo kol nah ili kafafsan idowwaanne koogyahe.
[28] Yabari wohoo huleese kahidanyihiine bicche geeddicho lakarerreego bicche kalug'deene, bicche geeddicho rerreegeen. Bicche la a geeddi mitta tomon affar. I'daaru toro orey isohteene, geeddi bicche hogyahiin rerreegeen. Bicche la mitta tomon seyyah yitaaheen.
[29] Jeenteti icho koobanhi daddaabo ka jejjebo ikarooraan u, kooban 'dubiis ka ga'daarreti kooban toollisso, affar bicche goya i'diicheene, ili baryo Waakh iwahteen.
[30] 'Doo'di kooban woyo ichohi firdo 'doonaane koobanhi rucchul beyti buure goyaka il iwoyeen. Ichohi ga'daarreti kooban toollisso kooban orcho laka gelin 'doono iskayeeleen.
[31] Baawulo la chirraakka wihi us eti koobbinti iskareet itoollo ichoow iskar ba iyidah, “Sammata 'doo'da kooban woyo ifiddiyin, etiin bahsati mele.”
[32] Iskare 'deerka yabarreti koobanhi rucchul jeyisso goosse, kooban irteen.
[33] Geeddi il ibaryin Baawulo 'doo'd tuumman hawwaaste gololoor a yumheen. Wihi us iyidah, “Atin ibeen tomon ichoow affar kutte roorro kaldach on kijirteene golol laan fiddiiteen, walah atin tumheen mele.
[34] Toollaka a atin hawwaasde gololoor amha, 'dee noolaada, i'di tahe etiinkoo kalday laka i'doo rucchul laka ma yateeh.”
[35] Baawulo la inkoo us waha yidah ka, makaatetoo sookkhiche, icho tuumman orcho ka Waakh kala'd ilaabe. 'Deerka makaate jebche yuhum.
[36] Icho tuummamba uur miigowe gololoo yumheen.
[37] Nahi kooban iskaleejirre isgoya a et kud lamma ichoow et tomon teeba ichoow et lih.
[38] Inkoo icho geeddi icho 'doonaan yumheen ka, 'dargaayye beyti buure goya isayeen huleesi kooban kajiro nuglaacheen.
[39] Chirdeer ka harratoo icho ikasin beyti buure afiche ka argeen. I'daasenyi bey afiche ka intoo harra bicche kamarsantahe yooh khabto argeen. Wihi icho goocheen a ichohi chi'icho yabuu'diin kooban yoohtaas eleelicho.
[40] Wihi ga'daarreti kooban toollisso khucche goocheene bicche goya i'diicheen. Chirraakka yabarreti kho'doommeti kooban lakawoyo khucchisso laka soofurfureen. 'Deerka dafarti oraate kooban woyto hafar goyaka taageene, beyti buure afiche miinsateen.
[41] I'daasenyi kooban yoohti bicche goya kajirto gu'ddeene, yoohe kooban toollisse. Kooban matakkicho la yooh geleene kooban sesseeh agaafteen. Irti miigenye biccheet kooban 'dubicho gu'dubte, jejjebisse.
[42] Iskare la mali iche khabte, a ki iche 'doo'di hihhidan bakkisso, iicho bicche taagine firdinee.
[43] I'daasenyi eti koobbinti iskareet itoollo usuhi jiro Baawulo ribo 'doona, mali iskare khabte hosse. Amur bahche 'dee eti bicche taagnaan garti koloo bicche goya a kidiho, harrati kafafsan a imaaho.
[44] 'Doo'di soo'hade la ebba kho'doonkoo ommos meehi addane koobanoote khabta, 'dee bicche afiche imaaha. I'daas yeelle nah tuummamba harrati kafafsan nebey eleelle.