[1] Geeddaas tuumman la Saawulo abattiti Kamur uliba ogoose 'doona. Kuhaanihi weyti ween iirte,
[2] ulla khaadaabbeti us 'doo'di minassi weysiite ilkerengeetti Damaasko iwewween ileeirti 'dee eti us yahe cheekto daahe. 'Deerka chirri us 'doo'di jit Yeesso raaho 'hele, mejel ommos deyyeho eheetteey ka ba, a sookhabta ilkerengeetti weene Yeerusaleem keena.
[3] Chirri us ilkerengeetti Damaasko idowwaate ka, koloo kalday on banay serey ka soobaheene ankhadeen.
[4] Ulla il gu'dde, hooyi, “Saawulo! Saawulo, at a i'doh ani sina iomhissa?” idowo daage.
[5] Saawulo la wihi us worsate, “Kamur, at a ayyo?” Kamur wihi us ilaabe, “An a Yeessohi at sina omhisso.
[6] Toollaka kahe ilkerengeet gele 'dee wihi at yeesso a lakicheeko.”
[7] 'Doo'di kootte usu walhicho yeyyeed agaafte. Hooyi yeyyeede a daageene, i'daasenyi et icho argeen mele.
[8] Saawulo sookahe, i'daasenyi chu'us indo bakkaahicho, walah us argo mele. Etoo 'deerka dahan khabte angaamiche, ilkerengeetti weene Damaasko geeche.
[9] Maan seyyah tuumman il ma argo, ma golossati, wohoo rucchul laka ma yabhuub.
[10] Ilkerengeetti Damaasko ka etoo abatti Kiriisteenye Anaaniya layadeeh a jira. Kamur la fooltabcho ka wahe “Anaaniya,” iyidah. Wihi us ilaabe, “Kamur an kalla.”
[11] Kamur la wihi us iyidah, “Kahe, ilkerengeet ka min Yuudaki jiti, Jiti Fissan layadeeh kajiro iro, etoo ilkerengeetti Taarso Saawulo layadeeh sooworso, i'di tahe usu Waakhe wahtaa.
[12] Usu fooltabcho ka etoo Anaaniya layadeehe yimiyye usu dahan korche 'dee ulla il iargo a arge.”
[13] Anaaniya wihi us ilaabe, “Kamur, 'doo'di ittaawe wori eta a isiiche, suujoonki noole us 'doo'di Waakhe ilkerengeetti weene Yeerusaleem kijiro yeele a daage.
[14] Ulla antohi kuhaaniyyohi wewween siicheene us ebbaaw ati kiwahti us kakhabti leeyimiy.”
[15] I'daasenyi Kamur wihi us Anaaniya iyidah, “Nyaam iiro, i'di tahe an usu a soobahsade, 'dee ulla yaafohi Ya'huud ieheynan ichoow karnatteticho ichoow 'doo'di Issiraayele woreey igeechaa.
[16] Anna sinati usu latuso jeenteti us keey iyahuu iche tusa.”
[17] Anaaniya 'deerka irte minki Saawulo kajiro gele. Anaaniya la dahano korche, “Saawulo, walaalaaw, Yeessohi Kamurenye jit ka atihi inta isoosohatti kisoobahe iche isooergate, 'dee il agarta toro Rubeyti Munyee kibuuhissa,” iyidah.
[18] Chirraas on wohoo khadaabbee indo kasoodiheene, ulla il arge. Tolossate labaattissiye.
[19] Saawulo la inkoo us golossate ka, miigowe. Ibeennetoo Damaasko ka abatti Kiriisto leejire.
[20] Dowwa on minassi weysiit irte, saggi Yeesso Weeli Waakh iyahe cheeke.
[21] 'Doo'di usu daage tuumman la weyti girmeeste, “Eta ki goorat ilkerengeetti weene Yeerusaleem ka 'doo'di magaha waho 'dabbaacho menya? Ulla intane yimiyye 'dee icho hida, khaata kuhaaniyyohi wewween igeecha menya?” worsateen.
[22] I'daasenyi Saawulo jiti miige ka wori Waakh cheeke. Ulla wahanyeyyohi ittaawe ka saggi Yeesso rumanka Ki Lasubhe iyahe tuse, ichoowka 'doo'di Ya'huude Damaasko yaal malaliche.
[23] Inkoo ibeennetoo kutte ka, 'doo'di Ya'huud Saawulo ogoos gooche.
[24] I'daasenyi Saawulo malicho abte. Ibeen ichoow maalim ba artohi ilkerengeeteete toorribaane 'dee usu yagiisiin.
[25] I'daasenyi ibeen ka 'doo'di usu raaho usu enjeloo buure ka daddaabohi ilkerengeet kamarsan ka 'dohtoo gateene, il isoowoyeen.
[26] Saawulo chirri us ilkerengeetti weene Yeerusaleem yimiy ka, abatti Kiriisto ikhayin leheet. I'daasenyi iche tuumman usu weyti karoorte. A mehe usuhi rumanka abatti Kiriisto yitah ma rummeysatti.
[27] I'daasenyi Barnaba usu khaate ergaano Yeesso ikeene. Saggi sulhaassiis ka us Kamur iarge, Kamur usu ileeyyeede ichoow saggi us ilkerengeetti Damaasko ka roorro laan wor Yeesso icheeke laka ergaano icheeke.
[28] Saawulo 'deerka ergaano wihi tuummane iche ilkerengeetti weene Yeerusaleem ka yeesse ka leejire. Ulla roorro laan wori Kamur cheeke.
[29] Ulla 'doo'di Ya'huude afi Giriig daago leeyyeede toro leeiriire, i'daasenyi usu ogoos yowteen.
[30] Chirri 'doo'di Kiriisto rummeeste waha abte ka, Saawulo khaateene ilkerengeetti Kaaysareya geecheene, intaas ka ilkerengeetti Taarso iergeen.
[31] 'Deerka urur Kiriistoki ilassi Ya'huudiya ichoow Gaalilaaya ichoow Saamariya kajiro ba geeddoo ka sina laan nebey kafiddiyeen. Rubeyti Munyee la icho miigoosse, toro la uur miigoosse, toro 'doo'd laka kakhayme. Icho tuumman la Kamur karooreen.
[32] Geedda Beetero ilassaas tabe, us 'doo'di Waakhe ilkerengeetti Ludda yaalle iirte.
[33] Intaas ka etoo Ayyenneya layadeehe sar tuumman hanjaawte gu'h siyyeet siriir kajiife 'hele.
[34] Beetero la wihi us Ayyenneya iyidah, “Ayyenneya, Yeesso Kiriisto a kisamaacha, kahe ilaalaah khaat!” Ulla chirraas on sookahe.
[35] 'Doo'di tuummane ilkerengeetti Ludda ichoow 'dowhi Chaaron kajiro la Ayyenneya arge Kamur kakhuufe.
[36] Ilkerengeetti Yooba ka makhaabassoo abatti Kiriisteenye Tabiita layadeeh a jirte. Magahiche afi Giriig ka a Dorkas. Afaf lammacho ka chi' lalaabe a Hoól. Iche la kol tuumman 'doo'd wihi haaggane iyeesse, toro la miskiino gargaarte.
[37] Ibeennetaas ka khannatte, tumuyye, sartiche lamaa'de lakhaate min ka goonanki saraat lagesse.
[38] Yooba la ilkerengeetti Ludda ma kadeere, 'deerka chirri abatti saggi Beetero ilkerengeetti Ludda ikajiro daagte ka, et lamma ergateene, hawwaasteene, “Bal dowwa nah sooeleel!” iyidaaheen.
[39] Beetero la icho raahe. Chirri us sooeleele ka, lakhaate goonankaas saraat lageeche. Deyyehoti ittaawenye muunkheyyee la intaase tolossa ooyta. Ubbaarreti derdeer ichoow kabuu'ddeti iche geeddi iche jirte tosse, Beetero tuseen.
[40] Beetero la icho tuumman khar ibahche, jilbo il kagu'dde Waakh wahte. Makhaabassi bujje iurgiye wihi us iyidah, “Tabiita, sookah!” Iche la indo soobakkaahisse, chi'iche Beetero agarte ka soorrommatte.
[41] Ulla dahan sookhabte toolliche. 'Deerka muunkheyyo ichoow 'doo'di Kiriisto rummeeste soowahe, ichehi nool dahanticho gesse.
[42] Yeedaas Yooba dakkhan kataa'he, 'doo'di ittaawe la Kamur rummeeste.
[43] Beetero la geeddoo ilkerengeetti Yooba ka min Siimonhi hili uktoot haaggicho fiddiye.