[1] Chirri kowdo goote ka, Baawulo abatti soowahe, inkoo us icho uur miigooche ka, “A Waakh atin bariisti,” iyidahye, ili Makedooniya ikahe.
[2] Ulla ilaas tuumman dah kagooche, 'doo'd Kiriisto wori ittaawe ka uur miigooche, 'da'ddaboka ili 'Hellas gele,
[3] ilkerengeetti weene Koriinto hay seyyah fiddiye. Ulla kooban ka ili Siiriya ikahin leheet. I'daasenyi jeenteti 'doo'di Ya'huud mal igooche 'dee khaban i'doonuu, saggi us ili Makedooniya itabo us inokhti gooche.
[4] 'Doo'di usu walhiche a inam Birroki ili Beeroya, Soobarro layadeeh ichoow Aristaarkos ichoow Sekundohi ilkerengeetti 'Dessaloonika ichoow Gaayohi ili Deerbe. 'Doo'di ili Aassiya Baawulo walhiche la a Tuuchiko ichoow Turofiimo. Timooti laka Baawulo a walhiche.
[5] Icho la kooban ka orey isohteene, ilkerengeetti Tuurowa ka nah sugeen.
[6] Nah la inkoo Daawti Makaateti Liikhasin kutte ka kooban ka ilkerengeetti Fiiliffi kakahne. Ibeen chan sohanne 'doo'd ilkerengeetti Tuurowa ka toro ikhayne. Teebatoo intaas fiddiine.
[7] Ibeenki oraate teebataas ka isinimiy, 'dee gololi Kamure isleenahame, toro omoot Yeesso kasoo'hellaa. Baawulo 'doo'd Yeedi Waakh icheeke ichoowka ibeen ekka seley kagowe, i'di tahe usuhi ibeenki kaas sooraaho kaho 'doonaa.
[8] Goonankaas saraate islaka'helo ka taassi ittaawenye jira.
[9] Geedda Baawulo yeyyeedo la etoo nugule Ewuutukos layadeehe 'dohti min kafiddiyo ur'dumme khaatte. Chirra ur'dumme khaatte ka, minki seyyahnaatteete saraat kasoodihe ichoowka il gu'dde. Chirri icho sookkhichaan, a yumuy.
[10] Baawulo la il ikhubte et isi'diiche, dahano kayuubte, “Anahina, et a noolyahee,” yidah.
[11] Baawulo 'deerka toro minki saraat ikore, makaate isleeyumheen. Inkoo us icho leeyyeede ichoowka orrahe sookorte ka, katabe.
[12] 'Doo'd eta nugul usuhi nool khaate goob geecheen. Icho la weyti uur lakhobooche.
[13] Intaas ka Baawulo katabne, kooban gelle, orey isohanne ichoowka ilkerengeetti 'dee Baawulo kooban kagelo Assos layadeeh i'dulle. Usu i'daas gooche, i'di tahe usu luhlo kasohta, il dah kagoocha ichoowka 'dee Assos ka is'hella.
[14] Chirri us ilkerengeetti Assos ka nah 'hele ka, kooban gelle, ilkerengeetti Miituleene ikahne.
[15] Intaas ka kahne kurti Kiiyos layadeehe bey goya kijirto kakunne, ibeenki lammaatteet ka kurti Saamos layadeehe bey goya kajirto iranne. Ibeenki kaas sooraaho ka ilkerengeetti Mileeto sooeleelle.
[16] Baawulo la usuhi kooban ka ilkerengeetti Efeesso ikuto iche gooche. Usuhi ibeennetoo boroofenhi Aassiya fiddiyo ma 'doonin. A mehe usuhi dowwa ilkerengeetti weene Yeerusaleem chirri iche tateeh ibeenki daawti Beentekos ka eleelo 'doona.
[17] Baawulo la ilkerengeetti Mileeto ka ewweenki urur Kiriistoki ilkerengeetti Efeesso woyo farniin i'diiche, 'dee or a kasoodoween.
[18] Chirri icho sooeleeleen ka wihi us iyidah, “Atin rubeytiin saggi an uus maanti kolooraat an boroofenhi Aassiya soogele an atin ileejire a garattaan.
[19] Makhaaballeti Ya'huud kajmeti suujenye igelisse, eheetteey laka, an a isnuglaache toro oytim ka Kamur ihile.
[20] Maanti an 'dow ka ichoow minassiin ka Yeedi Waakh atin icheeke, wihi indigir atin ikhabo tuumman uureey tuumman ka a atin abche. I'daasenyi saggi an kolba minkoo igele an Yeedi Waakh atin iabche a garattaan.
[21] Wihi an 'doo'di Ya'huud ichoow ki Ya'huud ieheynan icheeke a ichohi uskeel kasoonokhti 'dee Waakh urgiyicho toro Yeessohi Kamureene kakhuufo.
[22] “Toolla la Rubeyti Munyee iche ilkerengeetti weene Yeerusaleem iwoyta, wihi intaas ka iyateeh la ma gardi.
[23] Wihi kaldaye an gardi, Rubeyti Munyee a itootoossa, ilkerengeetti ween tuumman ka sina ichoow hiinaan a isugaan.
[24] I'daasenyi jiroteey walah iche ileetahe mele. Wihi ileekhumman, a anihi weyti hol dowo, hili Waakhe Yeessohi Kamure dahanoheey soogesse massicho. Hila la a Wori Haaggane an haaggi Waakhe buurenye inno imunneynan enenyet icheeko.
[25] “Wihi an gardi, atinhi an goytiin kasohde, wori dakhi Waakh miinsan atin icheeke, etiin toro yombuu iargo mele.
[26] Maantaka wihi an atin icheeko, chirri etiinkoo jit buje, ani ma liiworsati.
[27] I'di tahe wohoo kaldaye Waakh atinhi abattaan 'doono an mujjum atin ikasoocheekin ma jiraan.
[28] Rubeyti Munyee i'di ersimohi hoolaate atin kayeesse. Hoolaha la a 'doo'di Waakh. Maantaka isyaakhicha toro la hoolahi Rubeyti Munyee dahantiin gelisse tuumman yaakhicha. Ururi Waakhe goorat Yeesso diiggiis ka Waakh igate, yaakhicha toro toorriba gi'de.
[29] A garda, chirri an atin katabe, 'doo'di yeedi beenaat 'doo'd abcho i'di yaayti weyti oore u goytiinna soogela, woy bakkicha.
[30] Berri goytiin ka laka 'doo'doo wihi rummaat urgiyicho 'dee abatti ankicho ijiito a soobaha.
[31] 'Doo'di i'daase yuubsada. Toollaka saggi an gu'h seyyah tuumman bolokh ka an ebba ibeen ichoow maalim ba iwaaniche kasoo'hela.
[32] “Toollaka dahanti Waakh ichoow wori haaggiiski buure miinsane atin gessa. Waakh wora ka atin miigoon a yabuu'de, toro la wihi atin mu'dan 'doo'di Waakh munyaache tuumman a lee'hessaan.
[33] An chilimme ichoow 'dahab ichoow gaaddi etoo addan ma maanjeeran.
[34] Saggi an dahanoheey on ka isiwoywoye, toro an dahanoheey on ka 'doo'di an khabe laka iwoywoye, a garattaan.
[35] Walah tuumman ka saggi inno hol idowno inno 'doo'di 'da'ddaran igargaarro a atin tuse. Anna wihi goorat Yeessohi Kamure yidah iche kasoo'hele. Kamur mehe yidah ya, ‘Eti walah diibo weyti hamaad khaba ki khaatti ka.’ ”
[36] Chirri Baawulo yeyyeed massiche ka, icho tuumman khabaayi jilbo il kagu'dde Waakh wahte.
[37] Chirra icho usu sorboobtaane icho dongataan ka, icho tuumman ooyeen.
[38] Wihi weyti icho kooyiche, a chirri us, “Toro yombuu fooleey ma agartaan,” iyidah. 'Deerka raaheene, kooban eleelicheen.