[1] Baawulo ichoow Siila koloo ilkerengeetti Deerbe tabeene, saahka ilkerengeetti Luussira irteen. Etoo abatti Kiriisteenye Timooti layadeehe abartiis Kiriisto rummeysatte la intaas a kajire. Abartiis a inanti Ya'huude, i'daasenyi aabbahiis a yaaftoo Ya'huud ieheynan.
[2] 'Doo'di Kiriisto rummeeste ilkerengeetti Luussira kajiro ichoow ki ilkerengeetti Ikooniyo kajiro la weyti haag Timooti cheeke.
[3] Baawulo usuhi Timooti khaatti leeirti 'doona, 'deerka khandiye. Waha a jeenteti 'doo'di Ya'huude intaas kajiro saggi aabba Timooti yaaftoo Ya'huud ieheynan iyahe toro us ikhandiineynan igarti.
[4] Geedda icho kolba ilkerengeettoo irtaan la, ayti goorat ergaano ichoow ewweenki urur Kiriisto woyo ilkerengeetti weene Yeerusaleem ka goocheen iche 'doo'd Kiriisto icheekaane 'dee a raaheen.
[5] 'Deerka ururre Kiriisto kakhuufnaanki icho Kiriisto kakhuufaan ka uur lamiigooche toro il baryo 'doo'di Kamur kakhuufo kasookhayme.
[6] Jeenteti Rubeyti Munyee ichohi boroofenhi Aassiya Wori Haaggan kacheeko itirattuu, irteene ili Furiijiya ichoow Galaatiya dah kagoocheen.
[7] Chirri icho baggati ilkerengeetti Miisiya eleeleen ka, boroofenhi Bi'duuniya gelin leheete i'daasenyi Rubey Yeesso icho tiratte.
[8] 'Deerka ilkerengeetti Miisiya dah kagoocheene ichoowka ilkerengeetti Tuurowa ikhubteen.
[9] Ibeen ka Baawulo fooltabcho ka etoo ili Makedooniya isootoollo hawwaasti, “Kaale Makedooniya amiite, nah gargaar,” idowo arge.
[10] Inkoo Baawulo fooltabcho arge ka, chirraas on tannabanne, anki Makedooniya miinsanne. Wihi nah goonne Waakh a nah wahe, 'dee icho Wori Haaggan icheekna.
[11] Kooban korre ilkerengeetti Tuurowa kakahne, kurti bicche dahcho kajirto Sammo'daraake eleelle, ibeenki kaas sooraaho ka ilkerengeetti bicche aficho kajirto Neyyaboolis layadeeh gelle.
[12] Intaas ka kahne, ilkerengeetti Fiiliffi gelle. Fiiliffi la a ilkerengeetti oraate ili Makedooniya. Makedooniya la 'doo'di ili Roomeenye anta. Ilkerengeettaas geeddoo fiddiine.
[13] Seeri Lanaso ka aritti ilkerengeeteet kabahne, hawti 'dusso iranne. Kol nah intaas ka meessi Ya'huud kaweesti 'hello koognahe. Orrommanne, oboorrihi intaas ka urure leeyyeene.
[14] Deyyehoti nah dagansatte goyaka too a makhaabassoo Liidiya layadeehe, ilkerengeetti weene 'Diyaa'dira katimiyye darfohoo mummuggeyyee ororisso. Iche la Waakhe wahatta, Kamur la uuriche fure, 'dee wihi Baawulo essi iyo'hatta.
[15] Chirra iche ichoow 'doo'di minkiche kajire tuumman labaattissiye ka, goobiche nah iwahte, “Chirri atin ani eti Kamur rummeeste ikhaattaan, kaaleya minkeey fiddiya,” nah itidah. Iche la nah hawwaassatte.
[16] Maantooka, nahi inti lakaweesti isohanni, inantoo bow'deenye ginna dakhatti, ginna la miigti iche wihi sooyateeh kacheekto siisso, nah 'hesse. Iche la 'doo'di iche ifasso jeenteti iche wihi sooyateeh icheekto on u, a kamurroosse.
[17] Riirtaayi nah ichoow Baawulo nah sooraahte, riirte, “'Doo'da a falfayyohi Waakkhi weyti ween! Saggi atin liiribo, iche atin icheekaan,” elatte.
[18] Iche la ibeenneti ittaawe i'daas yeesse ichoowka Baawulo weyti hollowe, iurgiye, ginna leeyeede wihi us iyidah, “Antohi magah Yeesso Kiriisto ka, amure kibahcha, inanta kasoobah!” Chirraas on ginna inám kabahte.
[19] Chirri 'doo'di inanti bow'dee leh saggi icho kola khajjeeli icho chilimme ka'helaan ikhabin kase ka, Baawulo ichoow Siila khabteene, khaateene, inti lakoororsati ka, 'doo'di intaas ka 'doo'd hukkumo igeecheen.
[20] 'Doo'di Rooma intaas ka 'doo'd hukkumo igeecheene, “'Doo'da a Ya'huude, toolla la ilkerengeettaanya sina ikeenaan,” iyidaaheen.
[21] “Icho hugummetoo amurreti sirgaali Rooma buusane nahi Rooma ikhaatanne iraahin iche enenyet abchaan.”
[22] Urur tuumman la jaakh ka leekahe, 'doo'di wewween la amuri Baawulo illeh darfo lakabahcho lajaho bahche.
[23] Inkoo icho weyti jaheen ka, jeela ka hideene, eti jeela yaakhicho amur ibahcheene mujjum a latoorribo.
[24] Eti jeela yaakhicho la, chirri us yeedaas daage ka, khaate, jeela goyaka minki goyaatteet gesse, gurtunki buure luhlo gesse, kahide.
[25] Geeddi ibeene il ekka seley kagowe ka, Baawulo ichoow Siila Waakh wahteene, geeyohi Waakh laka dowteen. 'Doo'di addane hidan la a dagansata on.
[26] Koloo kalday on harra weyti sesseehte ichoowka daddaabohi ilaate minassi jeela laka weyti korkokeen. Chirraas on afassi jeela tuumman furnameene, ga'daarreti kootte 'doo'd lakahide la fuffuratte.
[27] Chirri eti jeela toorribo sookahe, us saggi afaf ifurayyihiin arge ka, kol 'doo'di hihhidan firde koogyahee, birlabiis soo'hiire isigaasan leheet.
[28] I'daasenyi Baawulo weyti riire, “Iisigaasan, nah tuumman inta on kajirra,” iyidah.
[29] Eti jeela iween banay a lasookhaato yidahye, soonyaame, usuhi hamar ka seeho Baawulo ichoow Siila orcho ka jilbo il kagu'dde.
[30] 'Deerka Baawulo ichoow Siila khar isoobahche, “Era, mehe yeela 'dee Waakh iriba?” worsate.
[31] Wihi icho ilaabeen, “Yeessohi Kamure rummeyso, 'dee ati ichoow minkaah tuummamba a atin laribaa.”
[32] 'Deerka usu ichoow eti minkiis kajiro tuumman Yeedi Kamur icheekeen.
[33] Ibeenkaas goya on eti jeela iween icho khaate, jiissicho dikhe, 'deerka chirraas on usu ichoow minkiis tuummamba labaattissiye.
[34] Eti jeela iween icho minkiis geeche, gololoo icho yamhiin siiche. Usu ichoow minkiis jeenteti icho Waakh irummeesteen u weyti hamaadeen.
[35] Saahta chirdeer ka, 'doo'di 'doo'd hukkumo iskarticho ergate, “'Doo'daas soofura,” yidah.
[36] Eti jeela iween la wihi us Baawulo iyidah, “'Doo'di 'doo'd hukkumo farniin a soo'diiche, ‘Baawulo ichoow Siila a lafuro,’ yidaaheen. Toolla kaha, nebey leeirda.”
[37] I'daasenyi Baawulo wihi us iskar iyidah, “Chirri 'doo'di Rooma nah liiekkaacho laka, icho 'dow on ka nah jaheene, toro jeela nah geecheen. Toollaka toro dagsi nah kabahchaan? Mele! Icho rubeycho a yimaateene, a nah bahcheen.”
[38] Iskare la yeeda khaatte, 'doo'di 'doo'd hukkumo igeesse, 'doo'di 'doo'd hukkumo la chirri us saggi 'doo'd ki ili Rooma iyahe daage ka roorro gesse.
[39] Iyimaateene, “Nah ikakuta,” iyidaaheene, jeela kabahcheene, hawwaasteene 'dee ilkerengeet a kabaheen.
[40] Inkoo Baawulo ichoow Siila jeela kabaheene, min Liidiya irteen ka 'doo'd Kiriisto 'heleene, uur miigoocheene, 'deerka katabeen.