[1] Ilkerengeetti Kaaysareya ka, etoo Korneeliyo layadeehe koobbintoo iskareete, iskarti 'Deylaan layadeeh itoollo, a jire.
[2] Usu ichoow minkiis tuumman kol tuumman wihi Waakh kahamaadicho yeeleene, toro la Waakh a karooraan. Us 'doo'di Ya'huude miskiine weyti gargaare, toro kol tuumman Waakhe wahta.
[3] Maantooka geeddi saha'd saagaassi maalimeet ka, fooltabchotoo arge. Fooltabcho ka wihi us mujjum arge, a herti Waakhe itimiyye, “Korneeliyo,” itidah.
[4] Korneeliyo iche roorro ka indo katoolliche, wihi us worsate, “A mehe Kamur?” Herti Waakh wihi iche ilaabte, “Waakh weysihaah a daage, wihi at miskiino siisso la a arge, kaasoo'hele.
[5] Toollaka 'doo'doo ilkerengeetti Yooba ierege, etoo Siimon layadeehe magahiiskoo addan toro Beetero layadeeh a soowaho.
[6] Usu, Siimonhi ukto kaaho toro haaggicho beyti buure afiche yaal iche leefiddiya.”
[7] Chirri herti Waakhe kootte leeyyeedde katabte ka, Korneeliyo falfa lamma minkiis kajirto ichoow etoo iskareet soowahe. Et la a ki ullaka weyti Yeedi Waakh khuccho toro la Korneeliyo rubeytiis yaakhicho.
[8] Wihi yitah tuumman icheeke ilkerengeetti Yooba ierge.
[9] Ibeenki kaas sooraaho geeddi saha'd lihti maalimeete 'doo'daas ilkerengeetti Yooba isoodowwaate ka, Beetero min sartiisti hafan ikore, Waakh wahte.
[10] Beetero weyti ankaye, wohoo us yaham 'doone. Golol lakarchaayi fooltabcho arge.
[11] Sereyti bakkaahte arge, wohoo i'di dafarti buurenye il isoosohti arge. Dafarta la laddad affarcho lasookhuccha il liisoowoya.
[12] Dafartaas wahanyeyyohi fil tuummane iche goya kajira. Bina ichoow hoola ichoow binahi uur il kajiito ichoow chimbirohi saraate fil tuummanenye kajira.
[13] Hooyoo la Beetero wihi us iyidah, “Beetero, kah wahanyeyyoha agiise aham.”
[14] Beetero wihi us ilaabe, “Kamur koloo kalday laka i'daas mee! A mehe an injire wihi bi'dire ommos wihi mi'dab ieheynan ma umhan.”
[15] Hooyi Waakh koli lammaatteet usu leeyeede wihi us yidah, “Wihi Waakh munyaache wihi bi'dire iikhaatin.”
[16] Waha kol seyyahe yitaaheene, chirraas on dafar goobi Waakh liilaabe.
[17] Beetero wihi fooltabchota tahe kamalalaayi, 'doo'di kootte Korneeliyo sooergate, inti min kajiro a abte, arite toolla.
[18] 'Doo'd waheene, usu etoo marteenye Beetero layadeehe magahiis koo addan Siimon layadeeh inta fiddiyo worsateen.
[19] Beetero wihi fooltabcho tahe kamiyyaantaayi, Rubeyti Munyee wihi iche itidah, “Siimon, reeroo seyyahenye kisooyowte kalla.
[20] 'Deerka kahe, il ikhubo. Icho raahin akaroorin, i'di tahe ani icho sooerge.”
[21] Beetero il ikhubte wihi us reer iyidah, “Eti atin sooyowatteen a ani. A i'doh itimaateen?”
[22] Reer wihi us ilaabe, “Etoo Korneeliyo layadeehe koobbintoo iskareet itoollo kanimiy. Ulla a etoo fissane Waákh karooro, yaafti Ya'huud tuumman la weyti inkaanyitto. Hertoo Waakhe munyeenye usu minkiis a kiwaho 'dee wora a daago itidah.”
[23] Beetero 'deerka 'doo'd min goya iwahe martiiste. Ibeenki kaas sooraaho ka Beetero 'doo'd raahe. 'Doo'doo ilkerengeetti Yooba ka Kiriisto rummeeste laka Beetero raahe.
[24] Ibeenki kaas sooraaho ka, ilkerengeetti Kaaysareya sooeleeleen. Korneeliyo la icho suge, hiiyyiis ichoow aalassiiski us weyti 'doono minkiis iwahe.
[25] Chirra Beetero min soogelo ka Korneeliyo Beetero or kasoodowe, inkaanyit ka ortiis ka jilbo il kagu'dde.
[27] Beetero Korneeliyo leeyyeedaayi min gele. 'Doo'di ittaawe la intaas a kajira.
[28] Beetero la wihi us 'doo'daas iyidah, “Weyti a garattaane amurreteen eti Ya'huude yaafohi addan kachimmamo ommos minassicho gelo a buusantahe. I'daasenyi Waakh mehe ituse ya, an et an a bi'dir ommos a suuj adeeh mele.
[29] 'Deerka chirri enenyet liisoo'diiche ka, ma jijjiitanne imiy. Anna mehe kiworsada ya, mehe iwahte?”
[30] Korneeliyo wihi us ilaabe, “Maan affar kutte, anihi saha'd saagaassi maalimeete chirree minkeey goyaka Waakh wahdi iche dog laan on etoo gaaddi dakhane torrogoot khabo orteey sootolossate.
[31] Wihi us iyidah, ‘Korneeliyo, Waakh weysihaah a daage, toro wihi at miskiino siisso a arge.
[32] Toolla ilkerengeetti Yooba enenyet ierege, etoo Siimon layadeehe magahoo ka la Beetero layadeeh a soowaheen. Us minki etoo Siimon layadeeh ka a marti. Eta la ukto mujjummoocha, beyti buurenye afiche yaal.’
[33] Anna 'deerka chirraas on enenyet kisooerge, alla weyti gon haaggisse a timiyyee. Toollaka nah tuumman kalla Waakh ortiis tololla wihi Kamur dah kiyidah dagansanna.”
[34] Beetero la yeede wihi us yidah, “An kola saggi Waakh rumanka yaafo tuumman ekka iekkaacho a arge.
[35] I'daasenyi Waakh 'doo'di il tuummane usu karooro wihi fissan yeelo a khaatta.
[36] Atin farniinki Waakh 'doo'di Issiraayel isooerge a garattaan. Farniinka la Wori Haaggane cheeke, Yeesso Kiriisto ka innohi enenyete ichoow Waakh a isinebeyne. Yeesso Kiriisto la a Kamuri weeli enenyet tuumman.
[37] Wihi inkoo Yoohanahi Enenyet Baattissiyo wori baattissiyo cheeke boroofenhi Gaalilaaya lakasookhabte ichoowka ili Ya'huud tuumman eleele yitah a garattaan.
[38] Saggi Waakh Yeessohi Naasaret Rubeyti Munyee ichoow miig isiiche a garattaan. Jeenteti Waakh ileejiruu us meel tuummane irte, wihi haaggan yeele, 'doo'di Seytaan sina kawaaricho samaache.
[39] “Nah la wihi tuummane Yeesso ili 'doo'di Ya'huud ichoow ilkerengeetti weene Yeerusaleem ka yeele garticho a laabna. Yeesso massalaaba kakaaheene yigaaseen.
[40] I'daasenyi Waakh ibeenki seyyahnaatteet ka omoot kasookahche, enenyet tuse.
[41] 'Doo'd tuumman mee usú arge, i'daasenyi nahi goorat Waakh nah soobahsate woriis cheekno, usu leegolossanne on inkoo us sookahe agarre.
[42] Waakh la amure nah ibahche, 'dee Wori Haaggan 'doo'd icheekna, toro saggi us eti Waakh soobahsate 'dee 'doo'di jiro ichoow ki tuume ba ihukkumo iyahe cheekna.
[43] 'Doo'di Waákh íyeyyeedo tuumman wihi usu miinsane icho cheekeen, eti Kiriisto rummeeste tuumman, usu ka uskeel a liikakuta.”
[44] Beetero yeyyeedaayi Rubeyti Munyee 'doo'di dagansati tuumman isooyagte.
[45] 'Doo'di Ya'huude Kiriisto rummeeste Beetero sooraahe la, Rubeyti Munyeenye yaafohi Ya'huud ieheynan laka isooyagte weyti kagirmeeste.
[46] I'di tahe 'doo'di yaafohi addan ichohi afi icho idaagin kaayyeedo toro Waakh saa'do, iche daageen. Beetero 'deerka wihi us yidah,
[47] “'Doo'da i'di goorat inno Rubeyti Munyee i'helluu, icho laka Rubeyti Munyee a 'heleen. Etoo ichohi bicche ka labaattissiyo a tirta?”
[48] 'Deerka amur ibahche, magah Yeesso Kiriisto ka icho a labaattissiyo. Icho la Beeterohi geeddoo icho leefiddiyo daaheen.