[1] Maantoo, geeddi saha'd saagaassi maalimeete lakaweesti ka, Beetero ichoow Yoohana minki Waakhe buurenye i'dulaan.
[2] Etoo uus goorat desse luhlo laa la a jire. Eta maan tuumman a lasoosi'da, aritti minki Waakhe buure ka Aritti Haaggan layadeeh loorrommicha eti gelo tuumman walah daaha.
[3] Et chirri us Beetero ichoow Yoohanahi minki Waakhe buure gelin leheet arge ka, chilimme daahe.
[4] Beetero ichoow Yoohana et indo kakhabteen. Beetero la wihi us et iyidah, “Bal nah sooyey!”
[5] Et la, chi' wohoo lasiicho koogyahe, 'doo'd yeye.
[6] Beetero 'deerka et iiyeyye, “Walah chilimenye an khabo mele, i'daasenyi wihi an khabo kisiicha. Antohi magah Yeesso Kiriistohi Naasaret ka, kahe soho!”
[7] Ét dahanti miigeet sookhabte, samacchaar sootololiche, chirraas on et luhlo haagsateene, miigoween.
[8] Serey isoonyaame, tolossate, sohte. Reér raahe minki Waakhe buure leegele. Geeddaas tuummane us sohti la hamaad ka sereye inyannyaama, Waakh koolicha.
[9] Enenyet tuumman la usuhi sohti Waakh koolicho arge.
[10] Chirri icho saggi us eti orran luhlo laaye, minki Waakhe buure ka Aritti Haaggan fiddiyo walah daaho iyahe argeen ka, wihi et kayitah weyti kagirmeesteene roorro gesse.
[11] Et Beetero ichoow Yoohana kadage. Enenyet tuumman la girmeeste ankaas isooryeene, inti icho toollaane, Oosim Soolomon layadeeh isooryeen.
[12] Beetero chirri us waha arge ka wihi us 'doo'd iyidah, “Mejeli Issiraayeloow a i'doh waha ikagirmeysattaan? A i'doh i'duu nah iyeytaan? Kol nah miigteenyo on ka ommos nah weyti Waakh kahamaadinno eta samaanne akoogeynana.
[13] Waakh Aburaaham ichoow Isakh ichoow Yaakoobo ichoow Waakh aacchinyeteenna Yeessohi falfatiise weynaache. Atin la Yeesso dahanohi chiiyeet gelisseene layigis. Chirri Bilaato soofurin gooche laka, atin Bilaato ortiis ka us keenyo menye tidaaheen.
[14] Atin Eti Munyeenye toro Fissan a 'dii'ddeene, etoo dubunuunu enenyet yigisye atin liisoofuro daahteen.
[15] Atin ki jiro kasoouummanto a tigaaseene, i'daasenyi Waakh omoot a kasookahche. Nah la gartaas a laabna.
[16] Kakhuufnaanki nah antohi magah Yeesso kakhuufno ka, eta orran dakkhan atin wihiis garattaane, toolla la agartaan, a lasamaache. Magah Yeesso ichoow kakhuufnaanki usu kayamiit, iche eta tuum samaache, saggi atin tuumman iagartaan u.
[17] “Toollaka yaafeey saggi atin ichoow weynaantiin garawwaayyo ka wahaas iyeesseen a garda.
[18] I'daasenyi Waakh saggane wihi us 'doo'di Waákh íyeyyeedo tuumman orey cheeke ka ibuuhiche. Wihi icho orey cheekeen la a Lasubhehiiski sina lakawaaricho.
[19] Uskeeliin kasoonokhda, Waakh iurgiya, 'dee uskeeliin a lahiyyaayo, 'dee Kamur a atin imaalo,
[20] 'dee Ki Lasubhe us atin isoobahche a atin isooergo, kaas la a Yeesso.
[21] I'di goorat archiiy Waakh 'doo'diiski munyeenye usú íyeyyeedo ka cheekuu, wihi Waakh gooche, Yeesso goobi Waakhe fiddiya ichoowka ibeenki Waakh walah tuumman husubnaacho yateeh.
[22] I'di tahe Muusa mehe yidah ya, ‘Kamuri Waakkhiine etoo yaaftiinenye i'deey u Waákh íyeyyeedo a atin isooerga. Atin la taba wihi us atin idowo tuumman nabah isuda.
[23] Eti tuummane etaas Waákh íyeyyeedo idagansan, 'doo'di Waakhe goya lakabahcha, labaabiicha.’
[24] “'Doo'di Waákh íyeyyeedo tuumman uus Saamuwel kasookhabatte ichoowka ki 'dubiis sooraahe tuumman, wihi maanassa yitah a kaayyeede toro orey on cheeke.
[25] Atin a yeeleti 'doo'di Waákh íyeyyeedo toro a yeeleti ayyinti Waakh aacchinyetiin igooche mu'dan. Waakh Aburaaham mehe iyidah ya, ‘Hiiyyaah ka, 'doo'di harra tuumman a imaala.’
[26] Maanti Waakh falfatiis sooerge, kolooraat atine atin isooerge, 'dee ebba jitiiski suuje kasoolaaba. Waakh saggaase atin ikamaale.”