[1] Khadaaba eti atin isoochiiro a ani, Baawulohi ilbooy Yeesso Kiriisteenye, toro la ergaanoti Waakh soobahsate, 'dee Woriiski Haaggan cheekto.
[2] Wora Haaggane goorat archiiy on Waakh 'doo'di Waákh íyeyyeedo ka ayyiche, icho la Chiirnaanneti Waakhe munyee goya kachiireen la,
[3] Weeliissa miinsanyahe, ulla a Yeesso Kiriistohi Kamureene. Sartiis la a sarti weeli enenyete, ulla hiiy karnati Dawuud layadeehe kayimiy.
[4] Waakh maanti us Rubeyti Munyee ka Yeesso Kiriisto omoot kasookahche, jiti miige ka saggi rumanka Yeesso Kiriistohi Kamureene Weeli Waakh iyahe a tuse.
[5] Kiriisto ka ichoow iroonoti magahiis u, haaggi Waakhe buure ichoow hila khummane ergaano layahe a 'helle. 'Dee 'doo'doo yaafohi Ya'huud ieheynan tuumman kakhuufnaanki icho Waakh kakhuufaane yeediis raahaan iwahna.
[6] Atin laka 'doo'da Waakh wahe Ya'huud ieheynane koo Yeesso Kiriisto yateeh goya a kajirtaan.
[7] Atinhi tuummane ilkerengeetti weene Rooma taalliine, Waakh 'doono, Waakh wahe 'doo'di Waakh lakayeele, iche khadaaba isoochiira. Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
[8] Wihi an kasoodaabdi, Waakkhaaya Yeesso Kiriisto ka kala'd ilaaba jeentetiin u. Wihi tahe, saggi atin Yeesso Kiriisto ikakhuuftaan, 'doo'di harra kajiro tuumman a cheeka.
[9] Waakkhi an uureey tuumman ka ifalo, an Wori Haaggane Weeliis miinsan an cheeko, garti saggi an ayti rummaat ieldi koli an weesdi tuumman an koloo kalday laka atin ikadabin a laaba.
[10] Cha'an weesdi Waakhe hawwaasda, 'dee chi' 'doonintiis tahe, Waakh jit isoofura, 'dee dowwanoha ka atin soo'daara.
[11] Anihi atin argo 'dee siintoo Rubeyti Munyee katamiit atin siicho, 'dee rubeyohiin miigowaan weyti imoona.
[12] Wihi an eldi a mehe ya, saggi eteen ba Kiriisto ikakhuufo ka, uur a ismiigoonna.
[13] 'Doo'd Kiriistokaaw, saggi an kolassi ittaawe anihi atin soo'daaro i'doone, i'daasenyi ichoowka uliba wohoo on ijeychaan abda. Anihi goytiin ka hil haaggicho gurnaanki Rubeyti Munyee argo iche 'doona, saggi maanta an 'doo'di addane yaafohi Ya'huud ieheynan goyaka hil ihaaggiche ichoowka gurnaan isoobahuu.
[14] Hili Waakh ikorche a ki enenyet tuumman. Ani 'doo'di hugummeti Giriig raaho ichoow ki hugummeti Giriig iraahin ba hilichooda khaba. Ani 'doo'di soome ichoow ki isoomin ba hilichooda khaba.
[15] Jeentetaas u, anihi atinhi ilkerengeetti weene Rooma taalliin laka Wori Haaggan atin icheeko iche weyti 'doona.
[16] An Wori Haaggan ma kuuryaawo. I'di tahe Wora a miigti Waakhe hol dowto, eti tuummane Kiriisto rummeeste ribto. Koloo 'doo'di Ya'huude Kiriisto rummeeste lariba, 'dee toro yaafohi Ya'huud ieheynane Kiriisto rummeeste laka lariba.
[17] Wora Haaggan wihi us soobabbakkaahicho a saggi Waakh enenyet 'doo'di ortiis ka fiffissan ikayeelo. Waha la koli enenyet Waakh kakhuufe kaldach on yateehiin. I'di liichiiruu, “Eti Waakh ortiis ka fissan Waakhe rummeesta. Saggaase rumanka jiro ikhaba.”
[18] Waakh goobiis on ka, saggi us 'doo'di jiroticho ka usu 'dii'do toro uskeel yeelo ikahollowo a tusa. Uskeela ka la, 'doo'da runti Waakhe laabti iche 'doo'di addan kajeycha.
[19] Runta Waakh miinsane enenyet garti la a ti nyiikhsan on. Waakh rubeytiissa isoonyiikhe.
[20] A mehe uu' goorat harra lasoouume, weeli enenyet saggi miigti Waakh jirtuu tuumman ijirto ichoow saggi us rumanka Waakh iyahe, a abte. Wahanyeyyoha Waakh leeyahe ma laargo, i'daasenyi wihi Waakh soouume tuumman ka a lagarta. Jeentetaas u, wohoo rucchule icho laabaan ma khabaan.
[21] Icho eti Waakh yahe a abteene, eheetteey laka inkaanyiti kootte Waakh imale ma siinne, toro la kala'd laka ma ilaabin. Wihi 'dalam on kamasseene, toro la uurassicho mug'di weele.
[22] Icho rubeycho khara iskaayyeeleene, eheetteey laka 'dalammeti tuunte eheet.
[23] Ichohi kootte weynaanti Waakkhi jirtuu iumaatan wahtaan ka, iyookkoyyohi enenyeti yamuut ommos chimbiro ommos binahi sohti ommos binahi uur il kajiito wahteen.
[24] Maantaka Waakh icho a 'diiche, ebba uskeeli uuriis imoono yeele. Jeentetaas u bi'dirroonki nool sarticho ka a isyeeleen.
[25] Icho runti Waakh miinsan ma rummeysanne, dib on u ayti beenaat rummeesteen. Waakkhi walah tuumman soouume kootte jirtuu tuumman saa'do imaleen rubeytiis ma wahanne toro la ma inkaanyitine, wahanyeyyohi Waakh soouume inokhteene, Waakh kayeesseen.
[26] Jeentetane Waakh i'diiche, ildeerroti sareete lakhaanyeyyo keento icho 'doonaan ikaassohtaan. Deyyeho laka mejeli laleeur'do a kasoonokhatte, iche on isinokhatta.
[27] Saggaas on u mejel laka deyyehoti laleeur'do kasootabe, ildeerroti mejel laleeur'do buuhisse. Mejel on lakhaanyeyyohi nool isyeela. Jeenteti suujoonki icho yeeleen u, sinati imasse isikeeneen.
[28] Toro la jeenteti icho Waakh garan i'dii'deen u, Waakh icho a 'diiche, uskeeli nool kamassaan. Suujoonki nool on kamassaane, jeentetaas u wihi kootte ikamaline yeelaan.
[29] Wihi jiroticho buuhiche a khollookkhi nool ichoow suujoon ichoow 'damaam ichoow uskeel. Wihi addane icho buuhicho a kal'darri ichoow ogoossi dubunuunu lagelo ichoow isjihit ichoow ekkeysi ichoow rubeyti suuje ichoow me'de'ddeel.
[30] 'Doo'da enenyete hanta toro la Waakh 'dii'ddayyahiine, enenyet leeabaarrama, enenyet a rannyaane toro isatahnoochaan. Kol tuumman la jiti icho suujoon kayeelaan on mal kadowtaane, toro la 'doo'di dele ma daagaan.
[31] 'Doo'da khara us khabo mele, wihi icho ayyicheen ma buuhichaane, 'doo'di addan 'dooninti imasse ma ikhabaane, uurnugleel la ma khabaan.
[32] Icho wihi fissane Waakh enenyet ka'doono us 'doo'di jiroti i'dee jiro omoot ikagoocho a gartaan. Eheetteey laka, icho orey on isohtaane, uskeel yeelaane, toro la 'doo'di addane wihi i'daase yeelo laka leekhabtaan.