[1] Beetero ichoow Yoohana enenyet leeyyeedaani, kuhaaniyyo ichoow Sadukaayo ichoow eti iskarti minki Waakhe buure yaakhisso iween, yimaateen.
[2] Jeenteti ergaano 'doo'd walah iabisso iche saggi Yeesso omoot ikasookahe toro 'doo'di tuume omoot a kasookaha icheektuu icho weyti holloween.
[3] Beetero ichoow Yoohana khabatte, jeela gelisse, saahta leesugte, il a gelebnowe gone.
[4] I'daasenyi 'doo'di ittaawenye yeedicho daage, Yeesso rummeeste. Tiri 'doo'di Kiriisto rummeeste geeddi elif chan yitah.
[5] Ibeenki kaas sooraaho ka makhaaballeti Ya'huude wewween ichoow ewweenki Ya'huud ichoow tagaammeti amurre ba ilkerengeetti weene Yeerusaleem ka tossatte.
[6] Kuhaanihi weyti weene Aanas layadeeh ichoow Kayaafa ichoow Yoohana ichoow Alekisaanda ichoow minki kuhaaniyyohi weyti wewween dakkhamba leh makhaaballetaas khabaani is'heleen.
[7] Beetero ichoow Yoohana orcho a lakeeno yidaaheene, 'deerka waha wowworsateen, “Miig eyya ommos antohi magah eyya waha kayeesseen?”
[8] 'Deerka Beeterohi Rubeyti Munyee buuhisse yeed laabe mehe yidah ya, “Makhaaballeti Ya'huude wewweenoow ichoow ewweenki Ya'huudoow,
[9] wihi maalinka nah lakahukkumo, a haaggi nah uuri 'dabakhe ka eta goorat luhlo laa nah tusne. Ichoow toro saggi liisamaache iche nah laworsata.
[10] Toollaka atin ichoow 'doo'di Issiraayel tuumman waha abda gi'de! Eta toolla feyyate, miigowe, ortiin toollo, antohi magah Yeesso Kiriistohi Naasarete goorat atin massalaaba kakaahteene atin tigaaseene i'daasenyi Waakh omoot kasookahche iche kasamaate.
[11] Yeessoha, “ ‘A daakki atinhi minan dissaan 'dii'ddeene, usu tirrinki dagaheet min tiiro yitah.’
[12] Ribnaanki enenyet et addane laka'helo mele. A mehe magahoo addane Waakh harra tuumman ka inno karibo ma jiro.”
[13] Chirri icho Yoohana ichoow Beeterohi roorro laan yeyyeedo argeene toro saggi icho 'doo'di walah garti iyahiin kaseen ka weyti girmeesteen. Saggi goorat icho Yeesso ileejireen kaseen.
[14] I'daasenyi eti lasamaache garabicho toollo a argeen gone, walah icho laabaan mele.
[15] 'Deerka Beetero illeh amur liibahche inti Jaldaabti Weene Ya'huud katossatti kabahte, hawwoosse.
[16] “'Doo'da i'doh nidaahe?” isworsatte. “'Doo'di Yeerusaleem yaal tuumman saggi icho girmohi buurenye miigti Waakh tuso iyeeleen a garta. Inno rubeyteen la sag inno i'dii'dno mele.
[17] I'daasenyi saggoo 'dee yeeda toro weyti itaa'hin u, 'doo'da tootoonno, ‘Toro maantoo addan magah Yeesso akayeyyeedina,’ inidaahe.”
[18] 'Deerka reér toro min goya iwahte, amur ibihisse uus iche maantoo addan magah Yeesso kaayyeedine ommos yeediis laka enenyet abin.
[19] I'daasenyi Beetero ichoow Yoohana la wihi icho ilaabeen, “Bal wihi Waakh nah ka'doono isigoocha, nahi aytiin raahno bal nahi ayti Waakh raahno.
[20] I'di tahe wihi nah agarre ichoow wihi nah daagne leegammadin ma nabuu'd.”
[21] Jaldaabe weyti yeedi kootteet katirriinsatte tootoosse 'deerka soo'diisse. Sinati icho ergaano igoochaan waayeen, a mehe enenyet tuumman jeenteti wihi yitah u Waakhe koolicha.
[22] A mehe eta luhlo laaye wihi weeli enenyet yeelin iubaa'dan ka lasamaache, gu'h tomon affar af khabto, iche khaba.
[23] Beetero ichoow Yoohana uus lasoo'diiche, 'doo'dichoki addan iirteene wihi kuhaaniyyohi wewween ichoow ewweenki Ya'huud kaleeyyeedde 'doo'd icheekte.
[24] Uus icho daageen ka, icho tuummamba Waakh isleewahteene, wihi icho yidaaheen, “Kamuri Miig Tuumman Leh, ati wihi serey ichoow harra ichoow beyohi burbuure goya kajiro tuumman soouunte!
[25] Ati Rubeyti Munyee ka af aacchiheenyoki Dawuud layadeehe falfataahe ka a yeedde, “ ‘'Doo'di Waakh igaran a i'doh weyti hol ikhaba? Yaafoha a i'doh 'duul imaalaane toro marah isoonokhtaan?
[26] Karnatohi harra tuumman 'duul a sookahcheen, weynaane la a tossatte, Waakkhi Kamure ichoow Lasubhehiis 'dii'deen.’
[27] Rumanka 'Herood ichoow Boontiyo Bilaato ichoow yaafohi Ya'huud ichoow yaafohi Ya'huud ieheynan ba ilkerengeetta ka a kulmeene, 'dee saggi icho Yeessohi falfataahenye munyeenye at subahte itirrimaan goocheen.
[28] Wihi sooyateehe at 'doonintaah ichoow miigtaah ka orey goosse yeeleen.
[29] Maantaka, Kamuraanyaaw waha 'doo'da nah idowo daage falfayyohaah uur miigooche yeedaah roorro laan a cheekeen.
[30] Antohi magah Yeessohi falfataahti munyee ka, dahantaah sooge enenyet samaache, wahanyeyyohi miigti Waakh tuso ichoow girmo yeel.”
[31] Inkoo icho weesteen ka, meessi kootte icho kijiraan sesseehte. Rubeyti Munyee la icho tuumman buuhisse, Yeedi Waakh roorro laan cheekeen.
[32] 'Doo'di Kiriisto rummeeste tuumman uuricho ichoow malicho a koo kalday. Et, “Waha a wahaaya, waha weheey mee,” yadeeh mele. I'daasenyi wihicho tuumman a isleegismeen.
[33] Ergaano miigti buurenye Waakh siiche kaayyeedde, saggi Yeessohi Kamure omoot ikasookahe enenyet icheekte. Waakh la icho tuumman haaggiiski buure kaankube.
[34] 'Doo'daas isleefiddiyo tuumman eticho sina khabe mele. I'di tahe kolba etichoki gos khabo ommos min khabo, a ororicha, chilimme
[35] ergaano ikeena. Ebba la chilimme geeddi sinatiis tahe lasiicha.
[36] 'Doo'd goytiis ka etoo Yuussuf layadeehe, goob Laaweenye ullaka ili Kuuburo layadeeh kadesse, a jire. Magahi ergaano usu ibihisse la a Barnaba. I'daas ka la mehe leessa ya, eti enenyet uur miigoocho.
[37] Eta laka gosiis ororiche, chilimme sookhaate, ergaano ikeene.