[1] Inkoo waha kuteen ka Baawulo ilkerengeetti Aa'den kabahe ilkerengeetti Koriinto irte.
[2] Intaas ka etoo Ya'huude Akiila layadeehe ili Boontus kadesse 'hele. Ulla makhaabassiisti Birisiila layadeeh khabaayi, ili 'Deylaane kayimiy, a mehe karnati ilaase Kilaawudiyo layadeeh, iche eti Ya'huude tuumman ilkerengeetti weene Rooma a kabaho yidah. Baawulo icho sooyeyin irte,
[3] jeenteti us i'dichuu eemayyo itolo khookhaani isikayowtuu la, icho geeddoo leefiddiye toro la hil leehaaggiche.
[4] Seeri Lanaso tuumman la minki weysiite Ya'huude irte 'doo'di Ya'huud ichoow 'doo'di Ya'huud ieheynan, wori Waakh icheeke anki Waakh isoojiite.
[5] Maanti Siila ichoow Timooti ili Makedooniya kayimaateen ka, Baawulo Yeedi Waakhe us cheeko kalday miinsate, 'doo'di Ya'huud saggi Yeesso rumanka Ki Lasubhe iyahe icheeke.
[6] I'daasenyi chirri 'doo'di Ya'huud Baawulo tirrime icho usu leeabaarrameen ka, ebeeri darfohiis ijillaanjilliche saggi icho ikhufeen tuse. Wihi us iyidah, “Chirri atin baabaateen, atin on awtiin u isooya. Ani walah liiworsati mele. Uus toolla kakhabatti, an yaafohi Ya'huud ieheynane iirda.”
[7] Baawulo 'deerka minki weysiit kabahe, minki etoo Tiitiyo Yaasto layadeehe minkiis minki weysiit khuccho irte. Eta la a etoo weyti Waakh karooro.
[8] Eti Kiriisbo layadeehe minki weysiite Ya'huud itoollo la, usu ichoow minkiis ba Kamur a rummeesteen. 'Doo'doo ittaawenye ilkerengeetti Koriinto kajiro Baawulo daage la, Kiriisto rummeeste, labaattissiye.
[9] Ibeenkooka Kamur Baawulo fooltabcho ka leeyyeede wihi us iyidah, “'Doo'da akaroorin, leeyeyyeede, waha at haaggisso la a'diin.
[10] Wihi tahe an a kileejira. Et wohoo kiyeelo la mele, i'di tahe ilkerengeetta ka 'doo'di ittaawe a kaaya.”
[11] Ulla goycho gu'hoo ichoow hay lih fiddiye Yeedi Waakh abche.
[12] Maanti Gaalliyo ili Akhaaya iweynaate ka, 'doo'di Ya'huud tuumman yimiyye Baawulo khabte, kootiin ortiis geecheen.
[13] Icho la wihi icho yidaaheen, “Eta jitoo amurre buusane 'doo'd Waakh kawahda idowa!”
[14] Chirri Baawulo yeedin leheet ka, Gaalliyo 'doo'di Ya'huud leeyeede, wihi us iyidah, “Chirri atinhi Ya'huude kootte waha uskeeloo layeele tahe ommos wohoo suuje tahe, a geeddi an nabah atin isudo.
[15] I'daasenyi waha a iriir ichoow magahenye ichoow yeedassi amurretiinna one, atin on haaggicha. An wahanyeyyohi i'daase ka enenyet hukkumin ma 'doono.”
[16] Ulla 'deerka kootiin goya 'doo'd kasoobahche.
[17] Geeddi icho isoobahin, icho tuumman eti minki weysiite Ya'huud itoollo Soosteena layadeeh khabteene, kootiin ortiis ka jaheen. I'daasenyi Gaalliyo wahaas ma ibaalin ba.
[18] Baawulo ilkerengeetti weene Koriinto ibeennetoo fiddiye. Saahka 'doo'di Kiriisto rummeeste katabe, Akiila ichoow Birisiila khabaayi kooban ka boroofenhi Siiriya ikahe. Geeddi us kooban igelin, ilkerengeetti Kenkereeya ka matah lahaa'de, a mehe ibeenneti us Waakh idaatte a massatte.
[19] Chirri icho ilkerengeetti Efeesso yimaateen ka, Baawulo Birisiila ichoow Akiila intaas katabe. Baawulo minki weysiite Ya'huud irte, 'doo'di Ya'huud leehawwooche.
[20] Chirri icho usuhi geeddoo leefiddiyo daaheen ka, fiddi 'dii'de.
[21] I'daasenyi chirra us kaho ka, “Chirri Waakh 'doono a atin isoonokhda,” iyidahye, kooban kore ilkerengeetti Efeesso kabahe.
[22] Chirri us ilkerengeetti Kaaysareya yimiy ka, kooban kasooyege ilkerengeetti weene Yeerusaleem irte urur Kiriisto bariitiche, 'deerka ilkerengeetti Antiyookhiya ikhubte.
[23] Inkoo us geeddoo intaas fiddiye ka, irte ili Galaatiya ichoow ki Furiijiya tabe abatti faajjiye.
[24] Etoo Ya'huudenye ili Alekisaandariya kadesse Aboollo layadeeh la ilkerengeetti Efeesso yimiy. Ulla a etoo af ka miigenye weyti Chiirnaanneti Waakh laka garti.
[25] Usu jiti Kamur ka a lawaaniche, uuriis tuumman ka yeyyeede, wori Yeesso miinsan mujjum 'doo'd abche. I'daasenyi baattissiyoti us garti tuumman a baattissiyo Yoohana on.
[26] Ulla minki weysiite Ya'huud ka 'doo'd roorro laan leeyyeede. Chirri Birisiila ichoow Akiila usu daageen ka, khaateene minkicho ka mujjum jiti Waakh idowdoween.
[27] Maanti Aboollo ili Akhaaya ikahin 'doone ka, 'doo'di Kiriisto rummeeste ilkerengeetti Efeesso kijiro usu uur miigooche, abattiti intaas kijirto khadaab ichiireene, 'dee etaas a martiisteen. Maanti us intaas eleele 'doo'di haaggi Waakhe buurenye inno imunneynan ka Kiriisto rummeeste weyti gargaare.
[28] A mehe us chirri us 'doo'di Ya'huud enenyet tuumman ortiis ka leehawwoocho, af ka a kahataate, Chiirnaanneti Waakh ka, saggi Yeesso rumanka Ki Lasubhe iyahe tuse.