[1] Ergaano ichoow 'doo'di Kiriisto rummeeste Ya'huudiya kijiro tuumman saggi yaafohi Ya'huud ieheynan laka Yeedi Waakh ikhaatteen daageen.
[2] 'Deerka maanti Beetero ilkerengeetti weene Yeerusaleem ikore ka, 'doo'di Ya'huude Kiriisto rummeeste usu leejaakhe.
[3] Wihi icho iyidaaheen, “At minassi 'doo'di ikhandiyanne iratte icho leegolossatte.”
[4] Beetero la wihi yitah tuumman idowdowe, wihi us kasookhabte us iyidah,
[5] “An ilkerengeetti Yooba iche kajire, Waakh wahdaayi, fooltabcho arge. Wohoo i'di dafartoo buurenye goobi Waakh ka laddad affarcho lakhuccho il liisoowoyo garabeey lasooyissil arge.
[6] Goya yeye, wahanyeyyohi fil tuummane arge. Bina ichoow hoola ichoow binahi uur il kajiito ichoow chimbirohi saraate dafar goya kajira.
[7] Anna hooyi, ‘Beetero kahe, wahanyeyyoha agiise, aham,’ idowo daage.
[8] “Wihi an ilaabe, ‘Kamuroow, mele, i'di tahe injire gololi liiumhane ommos bi'dire afeey ma gelin.’
[9] “Hooy la koli lammaatteet goobi Waakh ka sooyeede wihi us yidah, ‘Wihi Waakh munyaache wihi bi'dire iikhaatin.’
[10] Waha kol seyyahe yitaaheene, 'deerka toro goobi Waakh liijiite.
[11] “Chirraas on 'doo'di seyyahenye ilkerengeetti Kaaysareya ka ani liisooergate, minki an fiddiyo kajiro sooeleele.
[12] Rubeyti Munyee wihi iche ani itidah, ‘'Doo'daas a leejijjiitanne, raah.’ Reera lihenye koo Kiriistee laka ilkerengeetti Yooba ka iraahe ichoowka ilkerengeetti Kaaysareya isleeiranne, nah tuummamba min Korneeliyo isleegelle.
[13] Ulla saggi herti Waakh minkiis ka isoobahte, ‘'Doo'doo ilkerengeetti Yooba iergo, eti magahiis Siimon layadeehe magahoo ka la Beetero layadeeh a soowaho,’ itidah, nah isoocheeke.
[14] ‘Ulla farniine kikeena, farniinkaas ka ati ichoow minkaah tuumman a atin lariba,’ itidah.
[15] “Chirri an yeede on Rubeyti Munyee i'di goorat iche inno orey inno ikasooyagtuu icho laka isooyagte.
[16] Chirraakka wihi goorat Kamur yidah kasoo'hele, ‘Yoohana enenyet bicche kabaattissiye, i'daasenyi atin Rubeyti Munyee ka a atin labaattissiya.’
[17] 'Deerka chirri Waakh siinti Rubeyti Munyeenye us goorat innohi Yeesso Kiriistohi Kamure rummeysanne inno siiche icho laka siiche, anihi Waakh tirrimo a ayyo?”
[18] Chirri icho waha daageen ka wihi Beetero yeele 'dii'din katabeene Waakh saa'deen. Wihi icho yidaaheen, “Kola 'deerka Waakh yaafohi Ya'huud ieheynan laka uskeel a kasoolaabe, 'dee jiro 'helaan.”
[19] 'Doo'd Kiriistoki lataa'hiche jeenteti sinayyohi 'doo'd loomhichuu inkoo Isiteefano layigis geeddi ili Foniikiya ichoow kurti bicche dahcho kajirto Kuuburo layadeeh ichoow ilkerengeetti Antiyookhiya irte. 'Doo'di yaafti Ya'huud kalday Wori Haaggan icheekeen.
[20] I'daasenyi gaasichokoo ili Kuuburo ichoow ilkerengeetti Kureene kayimiyye, ilkereengeetti Antiyookhiya irte, 'doo'di yaafohi Ya'huud ieheynan Wori Haaggane Yeessohi Kamure miinsan icheekeen.
[21] Miigti Kamur icho a leejirte, 'deerka 'doo'di ittaawe wori Kamur rummeeste toro raahe.
[22] Urur Kiriistoki ilkerengeetti weene Yeerusaleem wora daage, icho la Barnaba ilkerengeetti Antiyookhiya iergeen.
[23] Maanti us intaas sooeleele us saggi icho haaggi Waakhe buurenye icho imunneynan i'heleen arge ka, weyti hamaade, ulla icho uur miigoocha 'dee rumanka uurassicho tuumman ka Kamur raahaan.
[24] Barnaba la a etoo haaggane, Rubeyti Munyee buuhto toro la Yeesso kakhuufo. 'Doo'di ittaawe la kamur kakhuufe.
[25] Barnaba 'deerka ilkerengeetti Taarso irte, Saawulo yowte.
[26] Chirri us Saawulo 'hele ka, sookhaate ilkerengeetti Antiyookhiya keene. Barnaba ichoow Saawulo gu'hoo tuumman urur Kiriisto is'heleene, toro la 'doo'di ittaawe wori Waakh mujjum abcheen. Ilkerengeetti Antiyookhiya iche abatti kolooraat 'doo'd Kiriisto lakiidah.
[27] Maanassaas ka 'doo'doo Waákh íyeyyeedo ilkerengeetti weene Yeerusaleem kasookhubte ilkerengeetti Antiyookhiya yimiy.
[28] Kichekoo magahiis Agaabo layadeeh kahe, Rubeyti Munyee ka, saggi abaartoo suuje dowwanoha ka harrati sirgaali Rooma anti tuumman igesso orey on cheeke. Abaartaas la maanti Kilaawudiyo karnat yitahye soomarte.
[29] Abatti ebba gargaar geeddi us yabuu'd 'doo'di Kiriisto rummeeste ili Ya'huudiya ibihin gooche.
[30] Waha yeeleene, Barnaba ichoow Saawulo gargaari lasoobahche idiibeene, ewweenki urur Kiriisto woyo iergeen.