[1] Agiribba 'deerka wihi us Baawulo iyidah, “Antohi at awtaah u isikaayyeeddo a khabta.” Baawulo la dahan ficche i'duu isiyeyyeede.
[4] “Ya'huud tuumman uus rucchuleet saggi an ijire a garta. Saggi an uus an delde an ileey ichoow ilkerengeetti weene Yeerusaleem on ifiddiye a gartaan.
[5] Icho geeddi deer a igarteen. Chirri icho 'doonaan, saggi an Farissaayo ieheet a cheekaan. Farissaayo la, a rabittoo Ya'huude rabitohi addane Ya'huud 'dirihiis wihi Waakh 'doono mujjum raahto.
[6] Wihi toolla liikahukkumo la, a jeenteti an wihi goorat Waakh aacchinyeteenyo iayyiche khajjeel ikakhabo.
[7] Khajjeela la a ki yaafohi Issiraayele tomon ichoow lammee ibeen ichoow maalim Waakh iwahtaane icho sugaan. Karnatoow jeenteti khajjeelane 'doo'di Ya'huud icheekta.
[8] Atinhi Ya'huude, saggi Waakh 'doo'di tuume omoot ikasookahcho wohoo liiubaa'dan iigoonna!”
[9] “Ani rubeyteey laka wihi an tissibe, wihi an abuu'd tuummane yeele, antohi magah Yeessohi Naasarete tirrimaa.
[10] An antohi kuhaaniyyohi wewween ka 'doo'di Waakhe ittaawe jeela a gesse, maanti layagiis la ani laka a ayyiche.
[11] Geeddi buure an kolba minkoo weysiite Ya'huude kabaha koo gela 'dee icho jaha toro Yeessohi icho igafaan iholin leheet. Jeenteti an icho weyti i'dii'duu, ilkerengeetohi ili yeelan kijiro laka irde, 'dee icho sina omhicha.”
[12] “Sulhaassoo i'dee ka khadaabi antoote kuhaaniyyohi wewween isiicheen khabaayi anki ilkerengeetti Damaasko miinsade.
[13] Eti weenoow, geeddi maalimeet jit raahaayi banayhi serey kayimiyye wihi orraheet laka kaababo ani ichoow 'doo'di kootte iraaho 'dolloheenyo gu'ddeen.
[14] Nah tuummamba il gu'dubne, anna hooyi afi Ibiraaniya ka, ‘Saawulo, Saawulo, a i'doh ani sina iomhissa? At a i'di heeri wussi ooyohiis tulcho, bolokh isikeeno,’ idowo daage.”
[15] “'Deerka wihi an worsade, ‘Kamur at a ayyo?’ “Kamur la wihi us isoolaabe, ‘An a Yeessohi at sina omhisso.
[16] Toollaka kahe tolosso. An a kisoobahe 'dee i'di falfateey u kisoobahsada, garti wihi ani imiinsane at agarte ichoow wihi an yomboka kisootuso laabta.
[17] 'Doo'daah ichoow yaafohi Ya'huud ieheynane an kiergadi a kaariba.
[18] Icho kiergada 'dee walah abissa indo furnamaane, mug'di kasoolaabta banayhi Waakh goya keenta, miigti Seytaan kasoolaabta Waakh iurgiyissa. I'da ka uskeelicho a liikakuta, toro icho laka kakhuufnaanki icho ikakhuufaan ka 'doo'di Waakh soobahsate goyaka meessi icho mu'dane 'helaan.’ ”
[19] “'Deerka Agiribbahi karnate, an fooltabchoti an serey ka arge, ma raahiwwaayin.
[20] Anna kolooraat ilkerengeetti Damaasko Yeedi Waakh kacheeke. Yomboka ilkerengeetti weene Yeerusaleem ichoow ili Ya'huudiya tuumman ichoow 'doo'di Waakh igaranne Yeedi Waakh icheeke. Wihi an cheeke la a saggi icho uskeelicho ikasoonokhtaane icho Waakh ikuurgiyaane, fiddihicho ka saggi icho rumanka uskeel ikasoonokhteen tusaan.
[21] Jeentetaase 'doo'di Ya'huud anihi minki Waakhe buure kajiro ikhabte, iigaasan leheet.
[22] I'daasenyi ichoowka maalinka Waakh a igargaare. Jeenteti toolla an inta itoollo an 'doo'di weynaan laa ichoow 'doo'di wewween ba ileeyyeedo a jeentetaas. Wihi an eldi a wihi goorat 'doo'di Waákh íyeyyeedo ichoow Muusa ba 'dee berri a yateehiin cheekeen on.
[23] Wihi icho cheekeen, Ki Lasubhe sina lakawaaricha, toro eti oraate omoot kasookaho yateehe, 'dee 'doo'diis ichoow yaafohi Ya'huud ieheynan banayhi saggi Waakh icho iribo tusa.”
[24] Geedda Baawulo isiyeyyeedo ka, Feestas Baawulo kariire wihi us iyidah, “Baawulo at a sirgo! Soonnaankaahki buure a kisirgooche!”
[25] Baawulo wihi us Feestas ilaabe, “Eti ween, an sirgo menye, yeeda an kaayyeedo la a yeedi rummaate, a yeedi eti ii'd khabo.
[26] Agiribbahi karnate, an roorro laane kileeyyeeda. Wihi an tissibo, at wahanyeyyoha tuumman a garatta. A mehe inti dagsan ma lakayeelin.
[27] Agiribbahi karnate, at chiirnaanneti 'doo'di goorat Waákh íyeyyeedo a rummeysatta? Saggi at irummeysatti a garda!”
[28] Agiribba 'deerka wihi us Baawulo iyidah, “Kol at geedda rucchul on ka et Kiriisto ikayeesso koogtahe?”
[29] Baawulo la wihi us ilaabe, “Geeddoo rucchul ommos geeddoo deer eheetteey ka ba, Waakhe daaha ati kalday la menye, 'dee 'doo'di maalinka idagansati tuumman i'deey u Yeesso kakhuufa, hiinaanka an hidanahe on liihidin menye.”
[30] Karnat ichoow gaafana ichoow Beernike ichoow 'doo'di addan tuummamba sookahe.
[31] Min kabaheene, geedda icho isleeyyeedaan wihi icho yidaaheen, “Eta walah us yeelo omoot ommos hiinaan mu'dan mele.”
[32] Agiribba la wihi us Feestas iyidah, “Eta kootte Kaaysar ikooyin ka, a geeddi lafuro.”