[1] Aboollo ilkerengeetti Koriinto kajiraayi, Baawulo kahe il dah kagooche ilkerengeetti Efeesso gele, intaas ka abattitoo 'hele.
[2] Ulla wihi us icho worsate, “Maanti atin Yeesso rummeysatteen Rubeyti Munyee a 'hesseen?” Wihi icho ilaabeen, “Nah Rubeyti Munyeenye jirto laka ma daagin.”
[3] Baawulo 'deerka wihi us worsate, “Maanti atin labaattissiye, soonnaankeyya raahteen?” Wihi icho ilaabeen, “Soonnaan Yoohana.”
[4] Baawulo wihi us iyidah, “Wihi baattissiyo Yoohana enenyet tusso, a 'doo'di uskeel kasoonokhte. Yoohana rubeytiis la wihi us 'doo'd iyidah, ‘Ki 'dubeey ka yamiit rummeesda,’ kaas la a Yeesso.”
[5] Chirri icho waha daageen ka magah Yeessohi Kamure ka labaattissiye.
[6] Chirri Baawulo icho dahano korche ka, Rubeyti Munyee isooyagte, icho la afassi icho idaagin kaayyeedeene toro wori Waakh kayimiy cheekeen.
[7] Ichohi labaattissiye la isgoya a geeddi et tomon ichoow lamma.
[8] Baawulo minki weysiite Ya'huud gele, intaas ka hay seyyah roorro laan icho hawwaaste, wori dakhi Waakh miinsane isoojijjiitaa.
[9] I'daasenyi 'doo'd gaasiiskoo a ki matah miigenye, yeed rummeysan 'dii'de, toro enenyet tuumman ortiis ka, jiti Kamur wihi noole sussuuje kacheekeen. Baawulo 'deerka icho katabe. Abatti khaatte, maan tuumman min Turannoki buure ka 'doo'd Yeedi Waakh kaleehawwooche.
[10] Gu'h lamma tuumman ba saggaas on isohte ichoowka 'doo'di boroofenhi Aassiya kajiro tuumman ki Ya'huud ichoow ki Ya'huud ieheynan ba Yeedi Kamur daage.
[11] Waakh la Baawulo ka, wihi ittaawenye weeli enenyet yeelin iubaa'dane injire liiargin yeele.
[12] 'Deerka dafartoor fool lakahiyyaayti ichoow darfohiiski chaafo kalaabo sartiissa on 'daare laka a lakhaata 'doo'di khakkhannan liigeecha, samaataane ginnayyo laka enenyet goya lakariha.
[13] 'Doo'doo Ya'huud a sossohta 'doo'di ginnayyo dakhtaan ginnayyo kabahchaane, magah Yeessohi Kamurenye lawaho ka ginnayyo bihin leheet. Wihi icho ginnayyo iyadeehiin, “Antohi magah Yeessohi Baawulo woriis cheeko ka amure kibahcha, soobah.”
[14] Ínam teebati etoo kuhaanihi weene Ya'huude Iskeefa layadeeh leeyahe i'dane yeessa.
[15] Maantooka ginna wihi iche icho ilaabte, “An Yeesso a garda, Baawulo laka wihiis a garda, i'daasenyi atin a ayyo?”
[16] Eti kootte ginna dakhatte 'deerka icho tuumman inyaame, icho tuumman kahataate. Icho weyti jahe ichohi murukkheenye toro nabarre diigto minkiis kafirdeen.
[17] Chirri 'doo'di Ya'huud ichoow ki Ya'huud ieheynane ilkerengeetti Efeesso kajiro tuumman wahaas daage ka, weyti bur'dowe. Magah Yeessohi Kamure la weyti liinkaanyite.
[18] 'Doo'di ittaawenye rummeeste, yimiyye, uskeeli icho yeelaan 'dow ka cheekeen.
[19] 'Doo'doo moroyyee laka khadaabbetichoti yuyyuuban sookhaate 'doo'd tuumman ortiis ka gubeen. Khadaabbeti yuyyuuban la chirri islakachibe gatoticho a chilim alif tomon chan.
[20] I'daas ka la, 'doo'di buurenye Yeedi Kamur daage, toro raahe.
[21] Inkoo waha tuumman yitaaheen, Baawulo Rubeyti Munyee woytaayi wihi us gooche, chirri us ilkerengeetti weene Yeerusaleem irti, ili Makedooniya ichoow ki Akhaaya dah kagoocha. Wihi us yidah, “Inkoo an intaas irde, ilkerengeetti weene Rooma laka a sooarga.”
[22] Baawulo geeddi us ibeennetoo boroofenhi Aassiya fiddiyo reeroo lammeenye kiisenye usu gargaaro ili Makedooniya iergate. Reera a Timooti ichoow Eraasta.
[23] Chirraase ilkerengeetti Efeesso ka jeenteti yeedi Jiti Kamur miinsan u, sinati buure isoobahte.
[24] Etoo tumaalenye Demmediroos layadeeh la minki waakkhi deyyahe Arteemis layadeeh lakawahti iche iyookkoyyohoo nunnucchule lahaagtoo dakhan lakahaaggiche ihaaggicha. Bacchaaratiis la 'doo'di hiliis kajiro weyti chilimmeti buure ikeenta.
[25] 'Doo'daas ichoow 'doo'doo addane hilicho i'di kaas yahe wahe. Wihi us iyidah, “Era saggi kamurroonkeen bacchaarata ikayamiit a garattaan.
[26] Atin la wihi eta Baawulo layadeeh yeelo a agartaane, toro la a isidaagtaan. Us wihi us essi a mehe ya, waakkhassi dahanti enenyet haaggicheen koloo kalday laka Waakh mee. Ilkerengeetti Efeesso ichoow boroofenhi Aassiya buurtiis ka, 'doo'di ittaawe a baabiiche.
[27] Toollaka wihi soosohti ka bacchaarateenta magah a uskulaata. Wahaas kalday la menye, minki waakkheenki deyyahe weene Arteemis layadeeh laka magah a waaya. Waakkheenki Aassiya ichoow harra tuumman ka lawahti wohoo marahe yateeh.”
[28] 'Doo'di bacchaarti chirri us waha daage ka weyti hollowe, riire, “Arteemisti Efeesso a weentahe!” yidah.
[29] Chirraas on riirit ilkerengeet tuumman kataa'he. Urur Gaayo ichoow Aristaarkoshi Baawulo walhicho ili Makedooniya ka sooraahe khabte. Leeoryeene, inti lakagir'daamo geecheen.
[30] Baawulo rubeytiis usuhi urur ortiis irti 'doone, i'daasenyi abatti usu tiratte.
[31] Weynaanti boroofen gaasoo aalassiise laka Baawulo farniin isoo'diichene hawwaasteen uus minki lakagir'daamo iran.
[32] Geeddaas ka la meel tuumman a riirit kalday on. 'Doo'doo riirit ka wohoo essa, koo la riirit ka wohoo addane essa. 'Doo'd buurtiis la wihi icho intaas ka isikeene laka ma garti.
[33] 'Doo'di Ya'huud la etoo Alekisaanda layadeeh urur isootakhe, wihi us yayyadeeh la icheeke. Ulla dahan ka 'doo'd leeyeede, wihi jiro icheekin 'doonáa.
[34] I'daasenyi chi'icho saggi us Ya'huud iyahe kaseen ka, hooyoo kalday ka geeddi saha'd lamma tuumman riireene, “Arteemisti ilkerengeetti Efeesso a weentahe,” esseen.
[35] Eti ilkerengeet ka khadaabbe chiiro urur yaasiche, wihi us yidah, “'Doo'di Efeesso, 'doo'di harra tuumman saggi ilkerengeetti Efeesso minki weysiite Arteemisti ween ichoow dagahti lagane serey kasoodihte iyaakhisso ma garti?
[36] Maantaka et runta 'dii'do mele gone, wihi lakaa'doono a atihi gammadisso, wohoo 'dalammoon la iyeelin.
[37] 'Doo'da atin inta keenteen minassi weysiit ma hatine ommos waakkheenki deyyah ma igafin.
[38] Chirri Demmediroos ichoow tumaassi addan etoo wohoo kakhabto la, kootiin a jira. Weynaanti sirgaal laka a jirta, a irteene eti icho wohoo iskakhabaan a cheekti.
[39] Chirri atin wohoo addan keenin 'doontaan la, toli amurre 'doonto labahcha yeedaas lamassicha.
[40] Saggi walah ijiraan u, maalinka a geeddi inno lakhabti jeenteti ururi il baabuluu. 'Deerka riirita ka walah inno laabno mele, jeente il liibaabulo mele gon.”
[41] Inkoo us waha yidah ka urur seley kahche.