[1] Inkoo Feestas boroofen yimiyye maan seyyahe kutte ka, Feestas ilkerengeetti weene Kaaysareya kakahe ilkerengeetti weene Yeerusaleem irte.
[2] Intaas ka kuhaaniyyohi wewween ichoow weynaanti Ya'huud Baawulo cheekatte.
[3] Weyti Feestas hawwaasteene siintoo daaheene, 'dee Baawulo ilkerengeetti weene Yeerusaleem a isooergo. I'di tahe icho saggi icho jit ka isugaane iyagiisiin, iche goocheen.
[4] Feestas wihi us ilaabe, “Baawulo ilkerengeetti Kaaysareya kahidanyahe, anna dowwanoha on intaas inokhda.
[5] Chirri et wohoo suuje yeele, weynaantiin gaasoo ilkerengeetti Kaaysareya a ileeiratti, wihi atin usu kakhabtaan a cheekatti.”
[6] Inkoo Feestas geeddi ibeen siyyeettoo ommos ibeen tomontoo icho leejire ka, ilkerengeetti Kaaysareya ikhubte. Saahka inti 'doo'd lakahukkumo koorronte, amur bahche Baawulo a liikeeno.
[7] Chirri Baawulo yimiy ka, 'doo'di Ya'huude ilkerengeetti weene Yeerusaleem kayimiy usu kakhaarte, wihi ittaawenye huleesenye icho runticho tusin iubaa'dan kacheekteen.
[8] Baawulo la isiyeyyeede, “An uskeel amurreti Ya'huud ommos minki Waakhe buure ommos Kaaysarhi Rooma iween miinsane an yeele mele,” yidah.
[9] Feestas laka usuhi 'doo'di Ya'huud wohoo siicho 'doona, wihi us Baawulo iyidah, “A geeddi at ilkerengeetti weene Yeerusaleem iratti intaas ka orteey ka lakihukkumo?”
[10] Baawulo wihi us ilaabe, “An toolla kootiin Kaaysarhi Rooma goya toolla, inti imasse liikahukkumo a tan. I'di at mujjum igarattuu, an walah suujenye an 'doo'di Ya'huud iyeele mele.
[11] Chirri kootiinhi ili Rooma saggi an wohoo liikayagiis yeele gooche la, omoot ma 'dii'do. I'daasenyi chirri wihi 'doo'da Ya'huud ikacheekti rume ikajirin, et antohi us dahanohicho ikagesso khabo mele. An Kaaysare iooya,” yidah.
[12] Inkoo Feestas 'doo'di usú waanicho leehawwooche ka wihi us iyidah, “At Kaaysare iooyte gone, Kaaysare iiratta!”
[13] Inkoo ibeennetoo kutte ka karnati 'Herood Agiribbahi lammaatteete makhaabassoo Beernike layadeeh khabaayi ilkerengeetti Kaaysareya yimiy, Feestase bariitichaa.
[14] Inkoo icho ibeennetoo tuumman baryeen ka, Feestas wihi Baawulo lakacheekti karnat kaleehawwooche, wihi us yidah, “Etoo goorat Feelig hidanyahaayi katabe a jira.
[15] Maanti an ilkerengeetti weene Yeerusaleem irde ka kuhaaniyyohi wewween ichoow ewweenki Ya'huud ba wohoo kacheekteene, usuhi sina liigoocho daaheen.
[16] “Anna wihi an ilaabe, amurreti Rooma ka, eti wohoo lakacheekti tuumman sammata usu ichoow 'doo'di walah kacheekti isi'heline us isikayeyyeedin, walah layeelo mele.
[17] Maanti icho inta ileeyimaateen ka, ma malmaline, i'daasenyi ibeenki kaas sookhuccho minki 'doo'd lakahukkumo koorronde, amur bahche usu a lasookhaato.
[18] 'Doo'di kootte usu walah kacheekti tolossate, toro la wihi suujenye an imure, a kacheektaan idah, walah icho kacheekteen mele.
[19] Wihi icho kacheektaan tuumman a yeedichoki saggi icho Waakh iraahaan miinsan ichoow etoo Yeesso layadeehe yumuyye, Baawulo la a jira essi.
[20] Saggi an ayta mujjum ifiiricho ka mal waaye, 'deerka Baawulo worsade usú ilkerengeetti weene Yeerusaleem iran 'doono intaas ka waha lakacheekti ka lahukkumo.
[21] Chirri Baawulo usuhi lakhuccho ichoowka Kaaysar aytiis goocho iooye ka, ani amuri lakakhuccho ichoowka Kaaysar liigeecho bahche.”
[22] Agiribbaha la wihi us Feestas iyidah, “An awteey u anihi eta daago a 'doona.” Feestas la wihi us ilaabe, “Saahta a daagta.”
[23] Ibeenki kaas sooraaho ka Agiribba ichoow Beernike ba intaas yimaateene, enenyet tuumman la gulguubsate inkaanyit tuse. Icho ichoow 'doo'di iskar tuumman iween ichoow 'doo'di ilkerengeet ka magah khabo tuumman minki ballaaddane yeedad lakadagansati geleen. Amuri Feestas bahche ka, Baawulo lasookhaate.
[24] Feestas la wihi us yidah, “Agiribbahi karnate, ichoow 'doo'di tuummane inta inno kaleejiro, eta a agartaan! 'Doo'di Ya'huud tuummane ilkerengeetti weene Yeerusaleem kajiro ichoow ki inta ilkerengeetta Kaaysareya kijiro a idaahe, riire usuhi omoot liigoocho 'doonaan.
[25] An walah omoot liikagoocho an kaarge mele. I'daasenyi jeenteti us Kaaysar ikooye u, anihi Rooma isooergo gooche.
[26] I'daasenyi walah buuho usu miinsane an Kaaysarhi kamure ichiiro an khabo mele. Jeentetaas gon ortiin ikeene, toro kach ka atihi karnate Agiribbaaw iche ortaah keena, 'dee chirri walah laawworsate ka, ani laka wihi an Kaaysar ichiiro khaba.
[27] I'di tahe ani ka, ma haaggan chirri an eti hidan Kaaysar iergo sammata an wihi lakacheekte ikhabin.”