[1] 'Doo'doo ili Ya'huudiya kasookhubte ilkerengeetti Antiyookhiya yimiyye wihi us 'doo'di Kiriisto rummeeste abche, sammata i'di amurre Muusa atin iabissuu atin liikhandiyin, Waakh ma atin ribo.
[2] Baawulo ichoow Barnaba jeenteti yeedaas u 'doo'daas leejaakheen. 'Deerka jeentetaas u Baawulo ichoow Barnaba ichoow 'doo'doo addane Kiriisto rummeeste lasoobahche, 'dee ilkerengeetti weene Yeerusaleem irtaane wihi ayta miinsan ka ergaano ichoow ewweenki urur Kiriisto woyo argaan.
[3] Urur Kiriisto icho ergate. Geedda icho ili Foniikiya ichoow ki Saamariya tabaan, saggi yaafohi Ya'huud ieheynan Waakh ikakhuufeen cheekeen. Wora la 'doo'di Kiriisto rummeeste tuumman weyti kahamaadiche.
[4] Chirri icho ilkerengeetti weene Yeerusaleem sooeleeleen ka, urur Kiriisto ichoow ergaano ichoow ewweenki urur Kiriisto woyo ba icho martiisteen. Baawulo ichoow Barnaba la wihi Waakh icho ka yeele tuumman icheekeen.
[5] 'Deerka 'doo'doo Kiriisto rummeeste orey rabitti Farissaayo eheet la tolossate wihi us yidah, “Wihi massan, yaafohi Ya'huud ieheynan a lakhandiya toro wihi laka'doono a ichohi amurre Muusa raaho.”
[6] Ergaano ichoow ewweenki urur Kiriisto woyo ba jeenteti aytuu tossateen.
[7] Inkoo icho geeddi deer hawwoocheen ka, Beetero tolossate, wihi us iyidah, “'Doo'd Kiriistokaaw, atin saggi goorat goytiin ka Waakh isoobahsate, yaafohi Ya'huud ieheynan ani Wori Haaggan ikadaagaane 'dee icho Kiriisto irummeestaan a garattaan.
[8] Waakkhi uurassi enenyet garti Rubeyti Munyeenye us icho siiche ka saggaas us inno laka inno isiichuu saggi us icho ikhaatte a tuse.
[9] Inno ichoow icho la walah inno yeerarroocho mele, wihi tahe kakhuufnaanki icho Waakh kakhuufeen ka, Waakh uurassicho a dikhe.
[10] Toollaka a i'doh Waakh kajme igelissaane, huleesi aacchinyeteen ommos inno iubaa'dan, abatti adah ikarartaan?
[11] Mele! Wihi inno rummeysanni a innohi haaggi buurenye inno imunneynane koo Yeessohi Kamureene ka inno laribe. Icho laka a i'daas on.”
[12] Chirra Baawulo ichoow Barnaba wahanyeyyohi miigti Waakh tuso ichoow girmohi Waakh icho ka yaafohi Ya'huud ieheynan iyeele cheekaan ka nabah isudeene, urur tuumman ba rukkuy gooche.
[13] Chirri icho yeyyeed massicheen ka, Yaakoobo sooyeede, wihi us yidah, “'Doo'd Kiriistokaaw idagansada.
[14] Siimonhi Beetero layadeeh saggi Waakh kolooraat 'dooninti us yaafohi Ya'huud ieheynan i'doono ituse, us gaasichokoo isoobahsate 'doo'diis ikayeesse a inno isoodowdowe.
[15] Yeedi 'doo'di Waákh íyeyyeedo yidah ichoow kan laka a israahaan. Wihi chiiran,
[16] “ ‘Waha 'dubicho ka a soonokhda, min Dawuudki jejjebe disa. Raasiis ka toro min disa, toro icho toollicha.
[17] 'Dee 'doo'di addane harra tuumman, ichoow yaafohi Ya'huud ieheynane magaheey khabo Kamur yowtaan, iche Kamuri waha yeelo,’
[18] goorat archiiy waha 'doo'd idowdowe essa.
[19] “Maantaka wihi an gooche, uus inno yaafohi Ya'huud ieheynane Waakh iurgiyo 'howloon.
[20] I'daasenyi khadaab ichiirro 'dee gololi iyookkoyyo ka labi'dirrooche uumhana, toro la 'doo'di isidisan uus isleeur'dine, naffi laluulliche uumhana, diig adamina inidaahe.
[21] A mehe uus goorat archiiy ilkerengeetohi wewween tuumman ka wihi amurre Muusa miinsan a lacheeke, toro la Seeri Lanaso tuumman ka minki weysiite Ya'huud ka a lasooma.”
[22] 'Deerka ergaano ichoow ewweenki urur Kiriisto woyo ichoow urur Kiriisto tuumman wihi icho goocheen, 'doo'dichokoo soobahchaane, 'dee Baawulo ichoow Barnaba ka'daraane ilkerengeetti Antiyookhiya leeirtaan. Et lamma 'doo'di Kiriisto rummeeste goyaka weynaan leh soobahcheen. 'Doo'daas la a Yuudahi Barsabba layadeeh ichoow Siila.
[23] Khadaaba leergeen. Khadaab la wahane kachiiran. 'Doo'di khadaaba atin isoochiiro a nahi ergaanee ichoow ewweenki urur Kiriisto woyo i'diin u Kiriisto rummeeste. 'Doo'di nah isoochiirro la a atinhi yaafohi Ya'huud ieheynane Kiriisto rummeysatteene ilkerengeetohi Antiyookhiya ichoow Siiriya ichoow Kiliikiya taalliin. Nebeeheyte!
[24] Wihi nah daagne, 'doo'doo ki intee a atin iyimiyye yeedicho ka atin malalicheene toro atin kaholloocheen. I'daasenyi nah 'doo'daas amur ma siin.
[25] Nah la a tossanne 'deerka 'doo'doo farniin keeno atin ieregno nidah. Icho la a aalasseenyoki nah weyti 'doonno, Barnaba ichoow Baawulo issooraahaan.
[26] Barnaba ichoow Baawulo la jeenteti hil Yeesso Kiriistohi Kamureene u jiroticho adahe gateen.
[27] Maantaka Yuuda ichoow Siila iche atin isooeregna, icho la waha nah soochiirre atin isoocheekaan.
[28] Waha on menye, nah ichoow Rubeyti Munyee ba uus nah huleesoo addan atin korin iche nidah.
[29] Gololi iyookkoyyohi waakkhakh lakayeessi liisoorriyooche uumhana, diig adamina, naffi laluulliche uumhana, 'doo'di isidisan uus isleeur'din. Chirri atin waha tuumman iskaholisseen wihi haaggane yeesseen. A Waakh atin bariisti.
[30] 'Doo'di leergate irte, ichoowka ilkerengeetti Antiyookhiya ka urur Kiriisto tuumman ururiche, khadaab idiibe.
[31] Chirri 'doo'd khadaab soome ka weyti hamaadeen, jeenteti us uur imiigooche u.
[32] Yuuda ichoow Siila la icho rubeycho a 'doo'di Waákh íyeyyeedo, wihi ittaawe 'doo'di Kiriisto rummeeste icheekeene, uur miigoocheen.
[33] Inkoo icho geeddoo intaas fiddiyeen ka, 'doo'di Kiriisto rummeeste icho nebey 'diiche 'doo'di goorat sooergate inokhteen.
[35] I'daasenyi Baawulo ichoow Barnaba geeddoo ilkerengeetti Antiyookhiya fiddiyeen. 'Doo'doo addane ittaawe khabaani Yeedi Kamur cheekeen.
[36] Inkoo geeddoo lafiddiye ka Baawulo wihi us Barnaba iyidah, “Kaale a nokhanni 'doo'di Kiriisto rummeeste ilkerengeetohi goorat inno Yeedi Kamur kacheekne kijiro tuumman a tabno, saggi icho ijiraan a sooagarro.”