[1] Inkoo ibeennetoo kutte ka, Yeesso toro abattitiis Beyti Buurenye Tibeeriya afiche ka isoobahe. Wihi yitah la kallaayo.
[2] Abatti Yeessoti isleejirte a Siimonhi Beetero layadeeh ichoow Toomashi magahiiski addan Man'dáan layadeeh ichoow Na'daanayelhi boroofenhi Gaalilaaya ka ilkerengeetti Kaana kayimiy ichoow yeele Sebedaayo ichoow abattitoo addane lammee.
[3] Siimonhi Beetero layadeeh wihi us abattiti addan iyidah, “An a irda, bahag sookhabda.” Abattiti addan la, “Nah laka a kiraahna,” itidah. 'Deerka bahte kooban korte, i'daasenyi ibeenkaas bahag iche khabatte mele.
[4] Chirra orrahe sookorto ka, Yeesso bey afiche sootolossate, i'daasenyi abatti saggi us Yeesso iyahe ma garan.
[5] Yeesso chirraakka wihi us abatti iyidah, “Era, walah bahagenye atin khabatteen mele?” Wihi icho ilaabeen, “Walah nah khabanne mele.”
[6] Ulla wihi us iyidah, “Oroohti atin bahag kakhabattaan, kooban ankichoki miigeet ka bicche goya iseya, bahag a 'hessaanee.” Uus iche i'daas yeesse, bahaggi buure khabatte, ichoowka oroohti iche kooban goya isoojiitto laka agaafatte.
[7] Eti abatti goyaka Yeesso weyti 'doono la wihi us Beetero iyidah, “Waha a Kamureenna alah.” Chirri Siimonhi Beetero layadeeh saggi wahaas Kamur iyahe daage ka, dafartiisti oroot dabar kahiite. I'di tahe kootte a bahchee. 'Deerka bicche goya kadihe.
[8] Abattiti addan la oroohti bahag buuho khabtaayi, kooban ka bey afiche timiy. A mehe icho bey afiche ma kadeerneynane, geeddi mitta kudoo on bey afiche ileejireen.
[9] Chirri iche bey afiche eleesse ka, see'ddi bolokhto bahag fuulo agarte. Makaate laka intaas a kajirte.
[10] Yeesso wihi us abatti iyidah, “Bahaggi atin sookhabatteen goyaka, gaasoo sookhaata.”
[11] Siimonhi Beetero layadeeh kooban kore, oroohti bahaggi burbuure buuho soojiite. Bahaggi icho 'heleen a bahag kudoo ichoow tomon chan ichoow bahag seyyah. I'daasenyi chi' bahag burbuur eheet laka, oroohe ma goggowin ba.
[12] Yeesso wihi us icho iyidah, “Kaaleya golossada.” Abatti goyaka, et, “At a ayyo?” worsati mele. Saggi us Kamur iyahe a garteen.
[13] Yeesso toro makaate khaate, abatti idiibe, bahag laka toro i'daas on yeele.
[14] Waha la a koli seyyahnaatteete Yeesso inkoo us omoot kasookahe, abattitiis isoobahe.
[15] Inkoo icho golossateen ka, Yeesso wihi us Siimonhi Beetero layadeeh iyidah, “Siimon, ínam Yoohana, at geeddi abattita addan i'doonto, 'dirihiche weyti a i'doonta?” Ulla, “Aa, Kamur, ati rubeytaah saggi an ki'doono a garatta,” iyidah. Yeesso la wihi us iyidah, “'Doo'deeyki i'di makhassi iiyyaate goolli gi'de.”
[16] Yeesso toro koli lammaatteet inokhte, wihi us iyidah, “Siimon, ínam Yoohana, at rumanka a i'doonta?” Wihi us ilaabe, “Aa, Kamur, at saggi an ki'doono a garatta.” Yeesso wihi us iyidah, “'Doo'deeyki i'di iiyteeye yaakhi gi'de.”
[17] Koli seyyahnaatteet Yeesso toro inokhte, wihi us iyidah, “Siimon, ínam Yoohana, at rumanka a i'doonta?” Beetero jeenteti Yeesso kol seyyah, “At a i'doonta?” iworsatuu, fool ribowe, wihi us iyidah, “Kamur, at walah dakkhan a garatta. Saggi an ki'doono la a garatta!” Yeesso wihi us iyidah “Tab gi'de, 'doo'deeyki i'di iiyteeye goolli.”
[18] Yeesso toro wihi us iyidah, “Rume kisoocheeka, maanti goorat at nugussahe, a sookahta, darfo gessatta, meessi at iran 'doonto tuumman iratta. I'daasenyi maanti at araarrowte, dahanohaah a oogta, etoo addan la gaad kigessa, inti at iran i'doonin kigeecha.”
[19] Yeeda Yeesso yidah mehe tusa ya, omootti Beetero yamuute, 'dee omoottiis ka Waakh laweynaacho. 'Deerka Yeesso wihi us Beetero iyidah, “Kaale, abattiteey ateeh.”
[20] Beetero urgiye, etoo ullaka abatteenye 'dubicho sooraaho arge. Eta a ki goorat Yeesso weyti 'doono, maanti goorat Yeesso gololi 'da'ddaboot abatti leeyuhum, Yeesso garabiis fiddiye, Yeesso kasiihsate, “Kamur, eti 'dub kigoocho a ayyo?” worsate.
[21] Beetero chirri us arge ka, wihi us Yeesso worsate, “Kamur, eta la mehe layeela?”
[22] Yeesso wihi us ilaabe, “Chirri an usuhi ichoowka maanti an soonokhdi jiro 'doono, wahaas ati walah icho kiyahiin mele. At kaale abattiteey ateeh!”
[23] Jeentetaas u woraas leessi 'doo'di Kiriisto rummeeste goya kataa'he. Wihi icho esseen a mehe ya, “Eta abattee ma yamuut.” I'daasenyi Yeesso ma yamuut ma idaahane, wihi us yidah a mehe ya, “Chirri an usuhi ichoowka maanti an soonokhdi jiro 'doono, wahaas ati walah icho kiyahiin mele.”
[24] Eti abatteenye waha runticho garti, cheeko, toro la chiire, a kan. Saggi wihi us yidah rum iyahiin la a garanna.
[25] Yeesso wohoo addane ittaawe laka a yeele. Chirri kootte wahaas tuumman lachiire, imurchoteey ka, harra tuumman laka, buuggassi wahaas tuumman lakachiire, meel iche gelisso mele.