[1] ইসা যহন ফাআরর ত্যুন লামি আইল্ তহন বউত মানুষ য়িবার ফিছদি ফিছদি চলিল্।
[2] য়েই সমত একজন চামরা বেরাইম্যা আইয়েনে তেঁইর সাম্নদি উইত অইয়েনে হইল্, “উজুর, অনে ইছ্যা গরিলেই আঁরে ভালা গরিত্ ফারন।”
[3] ইসা আত বারাইয়েনে য়িবারে ধরি হইল্, “আঁই য়িয়ানই চাই, তুঁই ফাক-সাফ অঅ।” তহনই মানুষ্যার চামরা বেরাম ভালা অই গেল্।
[4] ইসা য়িবারে হইল্, “চঅ, কেউঅরে এই হতা নঅ হইয়্যো, বরং ইমামর হাছে যাইয়েনে নিজরে দেহ্যঅ, আর নবি মুসা যে উকুম দিয়্যে য়েই মতন দান হোরবানি দঅ। ইয়ানত মানুষঅক্যলর হাছে ফরমান অইবো তুঁই ভালা অইয়্যো।”
[5] ফরদি ইসা কফরনাহুম শঅরত ঢুকিল্। তহন একজন রোমিয় শত-সেনাফতি তেঁইর হাছে আইয়েনে অনুরোধ গরিল্,
[6] “উজুর, আঁর গোলাম ঘরত বিছানাত ফরি আছে। য়িবা অবশ বেরামে বউত হষ্ট ফাআর।”
[7] ইসা য়িবারে হইল্, “আঁই যাইয়েনে য়িবারে ভালা গইজ্যোম।”
[8] য়েই সেনাফতি তেঁইরে হইল্, “উজুর, অনে দে আঁর বাড়িত্ ঢুকিবান ইয়ানর যৈগ্য আঁই নঅঅ। হ্যালি মুকে হঅন, য়িয়ানতই আঁর গোলাম ভালা অই যাইবো।
[9] আঁই এই হতা জানি হারন আঁর ত্যুনঅ অইন্যর হতা মতন চলন ফরে আর সৈন্যঅক্যলে আঁর হতা মতন চলে। আঁই একজনরে ‘যঅ’ হইলে য়িবা যাআ, অইন্যজনরে ‘আইয়্যো’ হইলে য়িবা আইয়্যে। আঁর গোলামরে ‘ইয়ান গর’ হইলে য়িবা য়িয়ান গরে।”
[10] ইসা এই হতা উনিয়েনে তাইজ্যব অইল্ আর যারা তেঁইর ফিছদি ফিছদি যাইতো আছিল্ য়িতারারে হইল্, “আঁই অনরারে আঁসাই হইর, বনি-ইসরাইলঅক্যলর মইধ্যেঅ এত ডঁর ইমান কেউঅর মইধ্যে আঁই নঅঅ দেকি।
[11] আঁই অনরারে হইর দে, ফুক আর ফছ্যিমর ত্যুন বউত কেউ আইবো আর ইব্রাহিম, ইসহাক ও ইয়াকুবর লগে বেহেস্তি রাইজ্যত হ্যাইতো বইবো।
[12] কিন্তু যারার ত্যুন বেহেস্তি রাইজ্যত থাকিবার হতা য়িতারারে বাইরর আঁধারত ফেলি দেয়া অইবো। য়েডে মাইন্ষ্যে হাঁদাহাঁদি গরিবো আর যন্ত্রনাত দাঁতে দাঁত ঘইষ্তো থাকিবো।”
[13] ফরদি ইসা য়েই সেনাফতিরে হইল্, “অনে যঅন। অনে যেইল্যা বিশ্যাস গইজ্যোন য়েইল্যাই অক”। ঠিগ তহনই য়িবার গোলাম ভালা অই গেল্।
[14] ইয়ার ফরদি ইসা ফিতরর বাড়িত যাইয়েনে দেকিল্, ফিতরর ওওরির জর্ অইয়্যে আর য়িবা উউতি আছে।
[15] ইসা য়িবার আত ধরিল্ আর য়িয়ানত য়িবার জর্ ছারি গেল্। তহন য়িবা উঢিয়েনে ইসার হ্যানা-দানার বেবস্তা গইত্যো লাগিল্।
[16] আঁজুইন্যা অইলে ফর মানুষে ভুতে ফঅইন্যা বউত কেউঅরে ইসার হাছে লই আইল্। তেঁই মুকর হতাতই য়েই ভুতগিনরে ছারাইল্ আর যারা অসুইক্যা আছিল্ য়িতারা বেক্যিনরে ভালা গরিল্।
[17] এগিন ঘটিল্ যেন্ নবি ইশাইয়ার মইধ্য দিয়েনে এই দে হতা হোয়া অইয়্যেল্ য়েগিন ফুরন অঅ: তেঁই আঁরার বেক দুর্বলতা তুলি নিল্, আর আঁরার বেরাম দুর গরিল্।
[18] ইসা নিজর চাইরোমিক্যাদি বউত মানুষর জাম দেকিয়েনে উম্যতঅক্যলরে সাগরর অইন্য ফারত যাইবার উকুম দিল্।
[19] একজন আলেম তহন ইসার হাছে আইয়েনে হইল্, “উজুর অনে যেডে যাইবান আঁইঅ অনর লগে য়েডে যাইয়োম।”
[20] ইসা য়িবারে হইল্, “য়িয়ালর গাঁতা আছে আর ফাকির বাসা আছে, কিন্তু ইব্নে আদমর মাথা রাকিবার জাগা হনঅ মিক্যা নাই।”
[21] উম্যতঅক্যলর মইধ্যে আর একজন আইয়েনে য়িবারে হইল্, “উজুর, আগদি আঁর বাবারে দাফন গরি আইস্তো দঅন।”
[22] ইসা য়িবারে হইল্, “মরাগিনেই য়িতারার মরা দাফন গরক, কিন্তু তুঁই আঁর লগে আইয়্যো।”
[23] ফরদি ইসা উগ্যুয়া নোকাত উঢিল্ আর তেঁইর উম্যতঅক্যলে তেঁইর লগে গেল্।
[24] আতিক্যা সাগরত বিরাট তুয়ান উঢিল্, আর য়িয়ানত নোকার উঅর ঢেউ আছারি ফইত্যো লাগিল্। ইসা কিন্তু ঘুম যাইতো আছিল্।
[25] তহন উম্যতঅক্যলে তেঁইর হাছে যাইয়েনে তেঁইরে ঘুমর ত্যুন অজাগ গরিয়েনে হইল্, “উজুর, বাঁচন; আঁরা দে মইল্যাম।”
[26] তহন তেঁই য়িতারারে হইল্, “অল্ফ বিশ্বাসিঅক্যল, তোঁয়ারা ডরাইতা লাইগ্যো কিঅর লাই?” ইয়ার ফরদি তেঁই উঢিয়েনে বাতাস আর সাগররে ধমক দিল্। তহন বেক কিছু আন্তা অই গেল্।
[27] ইয়ানত উম্যতঅক্যলে তাইজ্যব অইয়েনে হইল্, “ইবা কি রহম মানুষ দে, বাতাস ও সাগরঅ তেঁইর হতা উনে?”
[28] ফরদি ইসা সাগরর অইন্য ফারত গাদারিয়অক্যলর এলাহাত গেল্। তহন ভুতে ফঅইন্যা দুইজন মানুষ গোরস্তানর ত্যুন বাইর অইয়েনে তেঁইর হাছে আইল্।
[29] য়িতারা এন্ ভয়ংকর আছিল্ দে, কেউই য়েই ফথদি যাইত্ নঅ ফাইত্যো। য়িতারা চিল্যাইয়েনে হইল্, “অঅ ইব্নুল্লাহ্, আঁরার লগে অনর কি দরহার?” সময় নঅ অইতেই কি অনে আঁরারে যন্ত্রনা দিবার লাই এডে আইস্যোন না?”
[30] য়িতারার হাছর ত্যুন বউত দুরে বিরাট এক ঝাঁক শুয়োর চইত্যো আছিল্।
[31] ভুতগিনে ইসারে অনুরোধ গরিয়েনে হইল্, “অনে যুদি আঁরারে দুর গরিই দিতা সঅন তইলে উই শুয়োরর ঝাঁকর মইধ্যেই ফাটাই দঅন।”
[32] ইসা য়েগিনরে হইল্, “য়েইল্যাই যঅ।” তহন য়েগিনে বাইর অইয়েনে শুয়োরগিনর মইধ্যে গেল্। য়িয়ানত য়েই শুয়োরর ঝাঁক হ্যারা ফার দিয়েনে জোরে দুঁরি গেল্ আর সাগরর ফানিত ডুফি মরিল্।
[33] যারা য়েই ঝাঁক চরাইতো আছিল্ য়িতারা তহন দুঁরিয়েনে গেরামত্ যাইয়েনে বেক হ্যবর জানাইল্। বিশেষ গরিয়েনে য়েই ভুতে ফঅইন্যা মানুষঅক্যলর বিষয়ে য়িতারা বেক্যিনরে হইল্।
[34] তহন গেরামর বেক মানুষ বাইর অইয়েনে ইসার লগে দেহ্যা গইত্যো গেল্। তেঁইর লগে দেহ্যা অইলে ফর য়িতারা তেঁইরে অনুরোধ গরিল্ যেন্ তেঁই য়িতারার এলাহা ছারিয়েনে যাআ গই।