[1] এহুদিয়া ফদেশর বেথেলহেম গেরামত ইসার জন্ম অইয়্যেল্। তহন বাদশা আছিল্ হেরোদ। ফুক্দেশর ত্যুন হয়েকজন ফন্ডিত জেরুজালেমত আইয়েনে হইল্,
[2] “ইহুদিঅক্যলর যে বাদশার জন্ম অইয়্যে য়িবা হডে? ফুকমিক্যাদির আসমানত আঁরা য়িবার তারা দেকিয়েনে মেডিত উইত অই তেঁইরে সম্যান দেহ্যাইতাম আস্যি।”
[3] এই হতা উনিয়েনে বাদশা হেরোদ আর য়িবার লগে জেরুজালেমর অইন্য বেক্যিনে ওস্তির অই উঢিল্।
[4] হেরোদ বেক মেইন ইমাম আর আলেমঅক্যলরে ডাকিয়েনে ফুছার গরিল্ মসিহ্র জন্ম হডে অইবো।
[5] য়িতারা য়িবারে হইল্, “এহুদিয়ার বেথেলহেম গেরামত তেঁইর জন্ম অইবো, হারন নবি এই হতা লেইক্যে:
[6] এহুদিয়া ফদেশর বেথেলহেম, এহুদিয়ার মইধ্যে তুঁই হনঅ মতেই ছোড নঅ, হারন তোঁয়ার মইধ্যর ত্যুনই এন্ একজন শাসনহত্যা আইবো যিবা আঁর ইসরাইল জাতিরে ফরিচালানা গরিবো।”
[7] তহন হেরোদ য়েই ফন্ডিতঅক্যলরে গোফনে ডাকাইল্ আর জানি লইল্ ঠিগ হন্ সমত তারাউয়া দেহ্যা গেইয়্যেল্।
[8] তেঁই ফন্ডিতঅক্যলরে এই হতা হইয়েনে বেথেলহেমত ফাটাই দিল্, “অনরা যাইয়েনে ভালা গরি য়েই লেদাফোয়াউয়ার তালাইশ গরন। য়িবারে তালাইল গরিয়েনে ফাইলে ফর আঁরে জানাইবান যেন্ আঁইঅ যাইয়েনে মেডিত উইত অই য়িবারে সম্যান দেহ্যাইত্ ফারি।”
[9] বাদশার হতা উনিয়েনে ফন্ডিতঅক্যলে গেল্ গই। য়িতারা ফুকমিক্যাদি যে তারাউয়া দেইক্যেল্ য়েই তারাউয়া য়িতারার আগদি আগদি চলিল্। লেদাফোয়াউয়া যেডে আছিল্ য়েই ঘরর উঅরদি আইয়েনে নঅ থামন ফইয্যন্ত তারাউয়া চইল্তোই থাকিল্।
[10] তারাউয়া দেকিয়েনে ফন্ডিতঅক্যলে বউত খুশি অইয়েনে ঘরর মইধ্যে ঢুকিল্ আর য়েই লেদাফোয়াউয়ারে তেঁইর মা মরিয়ামর হাছে দেকিত্ ফাইল্। তহন য়িতারা মেডিত উইত অইয়েনে য়েই লেদাফোয়াউয়ারে সম্যান দেহ্যাইল্ আর য়িতারার বক্স খুলিয়েনে তেঁইরে সোনা, লোবান আর গন্দরস উফহ্যার দিল্।
[12] ফরদি আল্লাহ্ হ্যোয়াবত য়িতারারে সাবধান গরি দিল্ যেন্ য়িতারা হেরোদর হাছে ফিরি নঅ যাআ। তহন য়িতারা অইন্য ফথদি নিজরার দেশত ফিরি গেল্।
[13] ফন্ডিতঅক্যলে যাইবা গইর ফর মাবুদর এক ফেরেস্তা হ্যোয়াবত ইউসুফরে দেহ্যা দিয়েনে হইল্, “উঢ, ফোয়াউয়া আর য়িবার মারে নিয়েনে মিসর দেশত ধাই যঅ আর আঁই যেতদিন নঅ হই য়েতদিন ফইয্যন্ত য়েডেই থাক, হারন ফোয়াউয়ারে মারি ফেলিবার লাই হেরোদ য়িবার তালাইশ গরিবো।”
[14] তহন ইউসুফ উঢিয়েনে য়েই ফোয়া আর য়িবার মারে নিয়েনে য়েই রাতিয়াই মিসরত রঅনা অইল্ আর হেরোদর মরন ফইয্যন্ত য়েডেই রইল্। ইয়ান ঘটিল্ যেন্ নবির মইধ্য দিয়েনে মাবুদ এই দে হতা হইয়্যেল্ য়িয়ান ফুরন অঅ: আঁই মিসরর ত্যুন আঁর ফোয়ারে ডাকি আন্যিলাম।
[16] ফন্ডিতঅক্যলে য়িবারে ঠগাইয়ে দেকিয়েনে হেরোদ বউত গোস্যা অই গেল্। য়েই ফন্ডিতঅক্যলর হাছর ত্যুন য়িবা যে সময়র হতা জানি নিয়্যেল্ য়েই সময়র ইসাব মতন দুই বছর আর য়িয়ানর হম বয়সর যেত মরতফোয়া বেথেলহেম আর য়িয়ানর আশফাশর জাগাগিনত আছিল্ বেক্যিনরে মারি ফেলিবার উকুম দিল্।
[17] য়িয়ানত নবি ইয়ারমিয়ার মইধ্য দিয়েনে এই দে হতা হোয়া অইয়্যেল্ য়িয়ান ফুরন অইল্:
[18] রামাত বউত হাঁদাহাঁদির আবাজ উনা যাআর; রাহেলা য়িবার ফোয়াছার লাই হাঁদের, কিছুতই আন্তা নঅ অঅর, হারন য়িতারা আর নাই।
[19] হেরোদ মরি যাইবার ফরদি মাবুদর এক ফেরেস্তা মিসর দেশত ইউসুফরে হ্যোয়াবত দেহ্যা দিয়েনে হইল্,
[20] “উঢ, ফোয়াউয়া আর য়িবার মারে লইয়েনে ইসরাইল দেশত ফিরি যঅ। ফোয়াউয়ারে যারা মারি ফেইল্তো চাইয়্যেল্ য়িতারা মরি গেইয়্যে।”
[21] তহন ইউসুফ উঢিয়েনে য়েই ফোয়াউয়া আর য়িবার মারে লইয়েনে ইসরাইল দেশত গেল্।
[22] এহুদিয়া ফদেশত য়েই সমত হেরোদর ফরদি য়িবার ফোয়া আর্খিলায় বাদশা অইয়্যেল্। এই হতা উনিয়েনে ইউসুফ য়েডে যাইতো ডরাইল্। ফরদি হ্যোয়াবত উকুম ফাইয়েনে তেঁই গালিল ফ্রদেশত গেল্ গই,
[23] আর নাসরত নামর উগ্যুয়া গেরামত যাইয়েনে থাইক্তো লাগিল্। ইয়ান ঘটিল্ যেন্ নবিঅক্যলর মইধ্য দিয়েনে এই দে হতা হোয়া অইয়্যেল্ য়িয়ান ফুরন অঅ: “য়িবারে নাসরতিয় বুলি ডাকা অইবো।”