[1] য়েই সমত উম্যতঅক্যলর সইংক্যা বারি যাইতো আছিল্। তহন উম্যতঅক্যলর মাঝে যে ইহুদিঅক্যলে গিরিক ভাষাত হতা হইতো য়িতারা য়িব্রু ভাষাত হতা হোয়া ইহুদিঅক্যলরে এই হইয়েনে দোষ দিতো লাগিল্ দে, ফত্যিদিনই হ্যানা দিবার সমত য়িতারার রারি মাইয়াফোয়াঅক্যলে কিছুই নঅ ফাআ।
[2] ইয়ানত য়েই বারোজন সাআবি বেক উম্যতঅক্যলরে এক জাগাত ডাকিয়েনে হইল্, “আল্লাহ্র কালাম তবলিগ গরা ছারিয়েনে হ্যানা দিবার বেফারে বেস্ত থাকন আঁরার ফক্যে ঠিগ নঅঅ।
[3] ভাইঅক্যল, তোঁয়ারার মাঝর ত্যুন এন্ সাতজন মানুষরে তোঁয়ারা বাছি লঅ যারারে বেক্যিনে সম্যান গরে আর যারা ফাক-রুহ্ত আর গেয়ানে ভরা। আঁরা য়িতারার উঅরদিই এই সেবা-হামর ভার দিয়েনে নিজরা মুনাজাত আর আল্লাহ্র কালাম তবলিগত্ মন দিয়োম।”
[5] দলর বেক্যিনরই এই হতা ভালা লাগিল্। বিশ্যাসে আর ফাক-রুহ্ত ভরা ইস্তিফানরে য়িতারা বাছি লইল্। ইয়ান বাদে য়িতারা ফিলিফ, ফ্রখর, নিকানর, তিমোন, ফার্মিনা আর এন্টিয়ক শঅরর নিকলায়রেঅ বাছি লইল্। এই নিকলায় অ-ইহুদি অইয়েনেঅ ইহুদি ধর্ম ফালন গইত্যো।
[6] ফরদি য়িতারা এই মানুষঅক্যলরে সাআবিঅক্যলর হাছে লই গেল্। তহন সাআবিঅক্যলে মুনাজাত গরিল্ আর হামত নিযুক্ত গরিবার লাই য়িতারার উঅর আত রাকিল্।
[7] এন্ গরিয়েনে আল্লাহ্র কালাম ছরাই ফইত্যো লাগিল্, আর জেরুজালেমত উম্যতঅক্যলর সইংক্যা বউত তরাতরি বারি যাইতো লাগিল্ আর ইমামঅক্যলর মাঝে বউতজনে ইসায়ি ইমানরে মানি লইল্।
[8] স্তিফান আল্লাহ্র রহমত আর শক্তিত্ ফুরন অইয়েনে মানুষঅক্যলর মাঝে বউত কেরামতি আর চিন্য-হাম গইত্যো লাগিল।
[9] যে মজলিস-হ্যানারে মুক্ত-গরা মানুষঅক্যলর মজলিস-হ্যানা হোয়া অইতো য়েই মজলিস-হ্যানার হয়েকজন মানুষ ইস্তিফানর ফিছদি লাগিল্। য়িতারা আছিল্ কুরিনি ও আলেকজান্দ্রিয়া শঅরর আর কিলিকিয়ার ও এশিয়া ফদেশর হয়েকজন ইহুদি।
[10] য়িতারা ইস্তিফানর লগে বারাবারি লাগাই দিল্, কিন্তু ইস্তিফান ফাক-রুহ্র মইধ্য দিয়েনে বউত গেয়ানর লগে হতা হইতো আছিল্। য়িয়ানর লাই য়িতারা তেঁইর বিরুদ্যে থিয়াইত্ ফাইত্যো নঅ আছিল্।
[11] তহন য়েই ইহুদিঅক্যলে গোফনত হয়েকজন মানুষরে এই হতা হইতো উস্কাই দিল্, “আঁরা ইস্তিফানরে নবি মুসা আর আল্লাহ্র বিরুদ্যে কুফরি গইত্যো উন্যি।”
[12] এন্ গরিয়েনে য়িতারা মানুষঅক্যলরে, বুরা নেতাঅক্যলরে ও আলেমঅক্যলরে খেফাই তুলিল্ আর ইস্তিফানরে ধরিয়েনে ডঁর মিটিংগর সাম্নদি আনিল্।
[13] য়িতারা হয়েকজন মিছা সাক্যি থিয়া গরাইল্। এই মিছা সাক্যিঅক্যলে হইল্, “এই মানুষ্যুয়া অক্যল সমত বায়তুল-মোকাদ্যসর বিরুদ্যে আর মুসার শরিয়তর বিরুদ্যে হতা হঅ।
[14] আঁরা য়িবারে এই হতা হইতো উন্যি দে, য়েই নাসরত গেরামর ইসা এই এবাদত-হ্যানা ভাঁগি ফেলিবো আর মুসা যে চলতি নিয়মগিন আঁরারে দিই গেইয়্যে য়েগিনঅ বদ্লাই ফেলিবো।”
[15] যারা য়েই ডঁর মিটিংগত বোই আছিল্ য়িতারা বেক্যিনে তহন ইস্তিফানর মিক্যাদি চাইল্, তেঁইর মুক একজন ফেরেস্তার মুকর মতন অই গেইয়্যে।