[1] ফরদি ফোল দর্বি আর লুস্ত্রা শঅরত গেল্। য়েডে তিমথিয় নামর একজন উম্যত থাইক্তো। তেঁইর মা আছিল্ মসিহ্র উঅর ইমানদার একজন ইহুদি মাইয়্যাফোয়া, কিন্তু তেঁইর বাবা জাতিত্ গিরিক্ আছিল্।
[2] লুস্ত্রা আর কোনিয়া শঅরর ইমানদার ভাইঅক্যলে তিমথিয়র বঅর ফশংসা গইত্যো।
[3] ফোল তিমথিয়রে লগে লই যাইতো চাইয়্যেল্ বুলি তেঁইর সুন্যত গরাইল্, হারন য়েই জাগাত যে ইহুদিঅক্যলে থাইক্তো য়িতারা জাইন্তো তিমথিয়র বাবা একজন গিরিক্।
[4] ফরদি য়িতারা য়েই শঅরগিনর মইধ্য দিই গেল্ আর জেরুজালেমর সাআবিঅক্যলে ও জামাতর নেতাঅক্যলে যে হয়েক্যান নিয়ম ঠিগ গইজ্যেল্ য়েগিন মানুষঅক্যলরে জানাইল্ আর য়েই নিয়মগিন ফালন গইত্যো হইল্।
[5] এন্ গরিয়েনে জামাতগিনর মানুষঅক্যলে ইসায়ি ইমানে শক্তিশালি অই উইট্যো লাগিল্ আর য়িতারার সইংক্যা দিন দিন বারি যাইতো লাগিল্।
[6] ফাক-রুহ্ ফোল আর তেঁইর উঁয়াইজ্যাঅক্যলরে এশিয়া ফদেশত তবলিগ গইত্যো নঅ দিল্। তহন য়িতারা ফরুগিয়া আর গালাতিয়া ফদেশর বেক জাগাত গেল্।
[7] ফরদি মুশিয়ার সিমানাত আইয়েনে য়িতারা বিথুনিয়া ফদেশত যাইতো চেষ্টা গরিল্, কিন্তু ইসার রুহ্ য়িতারারে যাইতো নঅ দিল্।
[8] ইয়ানর লাই য়িতারা মুশিয়ার মইধ্য দিয়েনে ত্রোয়া শঅরত গেল্ গই।
[9] রাতিয়া ফোল এক্যান দশ্যনত দেকিল্, মেসিডোনিয়া ফদেশর একজন মানুষ থিয়াইয়েনে তেঁইরে মিনতি গরি হঅর, “মেসিডোনিয়াত্ আইয়েনে আঁরারে সাইয্য গরন।”
[10] ফোল এই দশ্যন দেকিবার ফর আঁরা মেসিডোনিয়াত যাইবার লাই তহনই রেডি অইলাম, হারন আঁরা বুঝিত্ ফাইল্যাম মেসিডোনিয়ার মানুষঅক্যলর হাছে মসিহ্র বিষয়ে সুহ্যবর তবলিগ গরিবার লাইই আল্লাহ্ আঁরারে ডাইক্যে।
[11] ফরদি আঁরা ত্রোয়া ছারিয়েনে জাঁআসত গরি সুজা সামথ্রাকি দিফত গেলাম আর ফরর দিন নিয়াফলি শঅরত আইলাম।
[12] য়েডের ত্যুন আঁরা ফিলিফি শঅরত গেলাম। এই ফিলিফিই মেসিডোনিয়ার য়েই এলাহার মেইন শঅর। য়েডিয়ার মানুষঅক্যলে রোম রাইজ্যর ফজা আছিল্। আঁরা কিছু দিন য়েই শঅরত থাকিলাম।
[13] জিরাইবার দিনত্ আঁরা শঅরর সদর দরজার বাইরে দইজ্যার হাছে গেলাম; মনে গইল্যাম য়েডে ইহুদিঅক্যলর মুনাজাত গরিবার জাগা আছে। য়েডে যে মাইয়াফোয়াঅক্যলে মিলিত অইয়্যেল্ আঁরা য়িতারার হাছে বোইয়েনে হতা হইতো লাগিলাম।
[14] যারা উইন্তো আছিল্ য়িতারার মাঝে থুয়াতিরা শঅরর লুদিয়া নামর একজন মাইয়্যাফোয়া আছিল্। তেঁই বাইয়োইন্যা রংগর হঅরর বেবসা গইত্যো। ইহুদি নঅ অইলেঅ তেঁই আল্লাহ্র এবাদত গইত্যো। ফভু লুদিয়ার দিল্ এন্ গরিয়েনে খুলি দিল্ যেন্ তেঁই ফোলর হতা মন দিই উনিয়েনে ইমান আনে।
[15] ইয়ানত তেঁই আর তেঁইর বাড়ির বেক্যিনে তরিকাবন্দি লইল্। ইয়ার ফরদি তেঁই এই হইয়েনে আঁরারে দঅত দিল্, “যুদি আঁরে অনরা ফভুর উঅর ইমানদার বুলি মনে গরন তইলে আঁর বাড়িত্ আইয়েনে থাকন্।” এই হতা হইয়েনে তেঁই আঁরারে আদা আদি গরিয়েনে তেঁইর বাড়িত্ লই গেল্।
[16] একদিন যহন আঁরা য়েই মুনাজাতর জাগাত যাইতাম আছিলাম তহন একজন বাঁদির লগে আঁরার দেহ্যা অইল্। য়িবারে উগ্যুয়া ভুতে ফাইয়্যেল্ যিয়ানর হারনে য়িবা ভবিষ্যতর হতা হইত্ ফাইত্যো। য়িয়ানত য়িবার মালিকঅক্যলর লাভ অইতো।
[17] য়েই মাইয়্যাউয়া ফোল আর আঁরার ফিছদি যাইতে যাইতে চিল্যাইয়েনে হইতো, “এই মানুষঅক্যল আল্লাহ্তা’লার গোলাম। কেন্ গরিয়েনে নাজাত ফাআ যাআ য়িতারা য়িয়ানই অনরার হাছে হঅর।”
[18] য়িবা বউত দিন ফইয্যন্ত এই ডইল্যা গরিল্। শেষদি ফোল এত বিরক্ত অইল্ দে, তেঁই ফিছন ফিরি য়েই ভুতরে হইল্, “ইসা মসিহ্র নামে আঁই তোঁয়ারে উকুম দিইর, এই মাইয়্যাউয়ার মইধ্যর ত্যুন বাইর অই যঅ।” আর তহনই য়েই ভুত বাইর অই গেল্।
[19] লাভর আশা গেল্ গই দেকিয়েনে মাইয়্যাউয়ার মালিকঅক্যলে ফোল আর সিলরে ধরিয়েনে শঅর-চগত্ নেতাঅক্যলর হাছে টানি লই গেল্।
[20] তারফরদি তারা শাসনহত্যাঅক্যলর হাছে য়িতারারে লই যাইয়েনে হইল্, “এই মানুষঅক্যলে আঁরার শঅরত গোলমাল বাজাইয়্যে। ইতারা ইহুদি।
[21] ইতারা এন্ হতাক্যিন আসার-বেবারর বিষয়ে শিক্যা দেএর যেগিন রোমিয় ইসাবে আঁরার ফক্যে গ্রঅন গরন বা ফালন গরন আইন-বিরুদ্য হাম।”
[22] অইন্যাইন্য মানুষঅক্যলঅ ফোল আর সিলর বিরুদ্যে য়িতারার লগে যোগ দিল্। তহন শাসনহত্যাঅক্যলে উকুম দিল্ যেন্ য়িতারারে হঅর-সোঅর ছিরি ফেলিয়েনে বেত মারা অঅ।
[23] বঅর বেশি গরিয়েনে বেত মারিবার ফরদি য়িতারারে জেলহ্যানাত রাকা অইল্, আর ভালা গরি ফাআরা দিবার লাই জেল-রক্যিরে উকুম দেয়া অইল্।
[24] জেল-রক্যি য়েই উকুম ফাইয়েনে ফোল আর সিলরে জেলর ভিতরর ঘরত লই গেল্ আর ডান্ডাবেড়ি দিয়েনে য়িতারার ঠেং আটকাই রাকিল্।
[25] তহন অনুমান আধা রাইত্।। ফোল ও সিল মুনাজাত গইত্যো আছিল্ আর আল্লাহ্র উদ্যেশ্যে ফশংসা-হাউয়ালি গাইতো আছিল্। অইন্য হয়েদিঅক্যলে য়েগিন উইন্তো আছিল্।
[26] এন্ সমত আতিক্যা এক বিরাট ভুসাল অইল্ আর য়িয়ানত জেলহ্যানার ভিত্যি ফইয্যন্ত হাঁফি উঢিল্। তহনই জেলর বেক দরজা আর হয়েদিঅক্যলর সিয়োল খুলি গেল্।
[27] জেল-রক্যি অঅজাগ অই উঢিল্ আর জেলর দরজাগিন খোলা দেকিত্ ফাইয়েনে ছুরি বাইর গরি আত্মহত্যা গইত্যো চাইল্। তেঁই মনে গরিল্ বেক হয়েদিই ধাই গেইয়্যে।
[28] তহন ফোল চিল্যাইয়েনে হইল্, “থামন, নিজর হোতি নঅ গরিবান; আঁরা বেক্যিনে এডে আছি।”
[29] তহন য়েই জেল-রক্যি একজনরে বাত্যি আইন্তো হইয়েনে নিজে দুঁরি ভিতরে গেল্ আর ডরে হাঁইফ্তে হাঁইফ্তে ফোল ও সিলর ঠেংগত ফরিল্।
[30] তারফরদি তেঁই ফোল আর সিলরে বাইরদি আনিয়েনে ফুছার গরিল্, “হঅন, নাজাত ফাইবার লাই আঁর ত্যুন কি গরন ফরিবো?”
[31] য়িতারা হইল্, “অনে আর অনর ফরিবার হযরত ইসার উঅর ইমান আনন, তইলে নাজাত ফাইবান।”
[32] ফোল আর সিল তহন জেল-রক্যি আর তেঁইর বাড়ির বেক্যিনর হাছে মাবুদর কালাম হইল্।
[33] জেল-রক্যি য়েই রাতিয়াই ফোল আর সিলরে লই যাইয়েনে য়িতারার শরিলর হাডা জাগাগিন ধুই দিল্, আর তেঁই ও তেঁইর ফরিবারর অইন্য বেক্যিনে তহনই তরিকাবন্দি লইল্।
[34] তারফরদি তেঁই ফোল আর সিলরে নিজর বাড়িত লই যাইয়েনে হ্যাইতো দিল্। আল্লাহ্র উঅর ইমান আনিয়েনে তেঁইর ফরিবারর বেক্যিনে বউত খুশি অইল্।
[35] ফরর দিন বেইন্যা ফজরত শাসনহত্যাঅক্যলে য়িতারার হর্মচারিঅক্যলরে দিয়েনে হই ফাটাইল্, “য়েই মানুষঅক্যলরে ছারি দঅ।”
[36] তহন জেল-রক্যি ফোলরে হইল্, “অনরে আর সিলরে ছারি দিবার লাই শাসনহত্যাঅক্যলে হই ফাটাইয়্যে। অনরা এহন বাইর অই আইয়্যোন আর শান্তিত যঅন গই।”
[37] তহন ফোল য়েই হর্মচারিঅক্যলরে হইল্, “আঁরা রোমিয়, আঁরারে বিচার নঅ গরিয়েনেই বেক্যিনর সাম্নদি বেত মারা অইয়্যে আর জেলহ্যানাত দেয়া অইয়্যে। এহন শাসনহত্যাঅক্যলে আঁরারে গোফনত ছারি দিতো চাআর নাকি? য়িয়ান অইতো নঅ; য়িতারা নিজরা আইয়েনে আঁরারে বাইরে লই যঅক।”
[38] য়েই হর্মচারিঅক্যলে তহন এই হতা শাসনহত্যাঅক্যলরে জানাইল্। শাসনহত্যাঅক্যলে যহন উনিল ফোল আর সিল রোমিয় তহন য়িতারা ডরাইল্।
[39] য়িতারা ফোল আর সিলর হাছে যাইয়েনে মাফ চাইল্ আর য়িতারারে জেলর বাইরে আনিয়েনে শঅর ছারি যাইতো অনুরোধ গরিল্।
[40] ফোল আর সিল জেলহ্যানার ত্যুন বাইরে আইয়েনে লুদিয়ার বাড়িত্ গেল্। য়েডে ইমানদার ভাইঅক্যলর লগে য়িতারার দেহ্যা অইল্। ভাইঅক্যলরে উত্সাঅ দিবার ফর য়িতারা য়েডের ত্যুন গেল্ গই।