[1] এহুদিয়া ফদেশর ত্যুন হয়েকজন মানুষ এন্টিয়কত্ আইল্ আর ইমানদার ভাইঅক্যলরে এই বুলি শিক্যা দিতো লাগিল্, “মুসার শরিয়ত মতে তোঁয়ারার ত্যুন সুন্যত গরা নঅ অইলে তোঁয়ারা হনঅ মতেই নাজাত ফাইত্ নঅ ফার।”
[2] য়িয়ানত ফোল আর বান্যাবাসর লগে এই মানুষঅক্যলর তুমুল বারাবারি অইল্। ফরদি ঠিগ অইল্ দে, ফোল আর বান্যাবাস এন্টিয়কর হয়েকজন ইমানদাররে লগে লইয়েনে জেরুজালেমত যাইবো আর সাআবিঅক্যলর লগে ও জামাতর নেতাঅক্যলর লগে এই বিষয় লইয়েনে আলাফ-শালাফ গরিবো।
[3] এন্টিয়কর জামাত য়িতারারে যাইবার বেবস্তা গরি দিল্। ফিনিশিয়া আর সামেরিয়া ফদেশর মইধ্য দিয়েনে যাইবার সমত ফোল আর বান্যাবাস মানুষঅক্যলরে জানাইল্, অ-ইহুদিঅক্যলে কেন্ গরিয়েনে আল্লাহ্র মিক্যাদি ফিজ্যে। এই হ্যবর উনিয়েনে ইমানদার ভাইঅক্যল বেক্যিনেই বঅর খুশি অইল্।
[4] যহন ফোল আর বান্যাবাস জেরুজালেমত আইল্ তহন জামাতর মানুষঅক্যলে, নেতাঅক্যলে ও সাআবিঅক্যলে আগ্রঅর লগে য়িতারারে গ্রঅন গরিল্। য়িতারার মইধ্য দিয়েনে আল্লাহ্ যেগিন গইজ্যেল্ য়েগিন বেক্যিনই য়িতারা বেক্যিনরে জানাইল্।
[5] ফরিশি দলর হয়েকজন মানুষ ইমানদার অইয়্যেল্। য়েই ইমানদারঅক্যলে উঢি থিয়াইয়েনে হইল্, “অ-ইহুদিঅক্যলর সুন্যত গরন দরহার আর য়িতারা যেন্ মুসার শরিয়ত ফালন গরে য়িয়ানর লাই য়িতারারে উকুম দঅন দরহার।”
[6] তহন সাআবিঅক্যলে আর জামাতর নেতাঅক্যলে এই বিষয় চিন্তা গরিবার লাই এক জাগাত মিলিত অইল্।
[7] বউত আলোচানার ফরদি ফিতর উঢিয়েনে য়িতারারে হইল্, “ভাইঅক্যল, অনরা তঅ জানন্ দে, বউত দিন আগদি অনরার মইধ্যর ত্যুন আল্লাহ্ আঁরে বাছি লইয়্যেল্ যেন্ অ-ইহুদিঅক্যলে আঁর মুকর ত্যুন সুহ্যবরর হতা উনিয়েনে ইমান আনে।
[8] আল্লাহ্ বেক্যিনর দিল্ জানে। তেঁই আঁরারে যেইল্যা ফাক-রুহ্ দান গইজ্যেল্, অ-ইহুদিঅক্যলরেঅ য়েইল্যা গরিয়েনে ফাক-রুহ্ দান গরি সাক্যি দিয়্যেল্ দে, য়িতারাঅ নাজাত ফাইয়্যে।
[9] তেঁই আঁরার আর য়িতারার মাঝে আলিদা বুলি কিছুই নঅঅ রাকে, হারন য়িতারা ইমান আইন্যে বুলি তেঁই য়িতারারঅ দিল্ ফরিষ্কার গইজ্যে।
[10] তইলে আঁরার ফুর্বফুরুষঅক্যলে বা আঁরা যে বোজা বোইত্ নঅঅ ফারি য়েই বোজা অ-ইহুদি ইমানদারঅক্যলর হাঁদত তুলি দিয়েনে কিল্যাই অনরা আল্লাহ্রে ফরিক্যা গরিবার চেষ্টা গইত্যা লাইগ্যোন?
[11] আঁরা বিশ্যাস গরি দে, হযরত ইসার রহমতে অ-ইহুদি ইমানদারঅক্যলে যেইল্যা নাজাত ফাইয়্যে য়েইল্যা আঁরাঅ নাজাত ফাইয়্যি।”
[12] তহন মিটিংগর বেক্যিনে চুব অই গেল্ আর ফোল ও বান্যাবাসর মইধ্য দিয়েনে আল্লাহ্ অ-ইহুদিঅক্যলর মাঝে যে কেরামতি হামগিন গইজ্যেল্ য়েগিন য়িতারারই মুকত উইন্তো লাগিল্।
[13] য়িতারার হতা হোয়া শেষ অঅনর ফর ইয়াকুব হইল্, “ভাইঅক্যল, উনন্।
[14] আল্লাহ্ তেঁইর নিজর বান্দা অইবার লাই অ-ইহুদিঅক্যলর মইধ্যর ত্যুন কিছু মানুষরে বাছি লই দেহ্যাইয়্যে দে, অ-ইহুদিঅক্যলর লাইঅ তেঁইর চিন্তা আছে। এই হতাই শিমোন-ফিতর আঁরারে হইয়্যেল্।
[15] এই হতার লগে নবিঅক্যলর হতারঅ মিল আছে, হারন কিতাবত লেহ্যা আছে:
[16] ‘ইয়ার ফরদি আঁই আইয়েনে দাউদর ফরি যইন্যা ঘর আবার বানাইয়্যোম। যিয়ান তচনচ অই গেইয়্যে য়িয়ান আবার গাঁইত্যোম, আবার য়িয়ান ঠিগ গইজ্যোম;
[17] যেন্ অইন্য মানুষঅক্যলে, মানি যে অ-ইহুদিঅক্যলরে আঁর বুলি ডাকা অইয়্যে য়িতারা আঁর তালাইশ গরিত্ ফারে।’ মাবুদ, যিবা এই হামগিন গরে তেঁই এই হতা হঅর।
[18] বউত দিন আগর ত্যুন ইয়ান তেঁইর মনর মইধ্যে আছিল্।”
[19] ইয়াকুব আরো হইল, “ইয়ানর লাই আঁর মতে যে অ-ইহুদিঅক্যলে আল্লাহ্র মিক্যাদি ফিজ্যে য়িতারারে হষ্ট দঅন আঁরার উচিত নঅঅ।
[20] য়িয়ানর ত্যুন বরং আঁরা য়িতারার হাছে এই হতা লেকি দে, য়িতারা যেন্ ফতিমার লগে যুক্ত বেক কিছুর ত্যুন আর বেক ডইল্যা জেনার ত্যুন দূঁরে থাকে, আর গলা চিবিয়েনে মারা ফশুর গোস্ত ও রক্ত যেন্ য়িতারা নঅ হ্যাআ।
[21] এই উকুমগিন য়িতারারে দঅন ভালা, হারন মুসা যেগিন হইয়্যে য়েগিন ফত্যি শঅরত বউত বউত দিন আগর ত্যুন তবলিগ গরা অঅর আর তেঁই যেগিন লেকি গেইয়্যে য়েগিন ফত্যি জিরাইবার দিনত্ মজলিস-হ্যানাগিনত্ তেলাওয়াত গরা অঅর।”
[22] তহন সাআবিঅক্যলে, জামাতর নেতাঅক্যলে আর জামাতর অইন্য বেক মানুষঅক্যলে ঠিগ গরিল্ দে, য়িতারা নিজরার হয়েকজন মানুষরে বাছি লইয়েনে ফোল আর বান্যাবাসর লগে এন্টিয়কত ফাটাই দিবো। য়িতারা এহুদা আর সিলরে বাছি লইল্। এই এহুদারে বর্শাব্যা বুলি ডাকা অইতো। ইমানদার ভাইঅক্যলর মাঝে এই দুই জন আছিল্ নেতা।
[23] য়িতারার লগে এই সিঢি ফাটাআ অইল্: এন্টিয়ক, সিরিয়া আর কিলিকিয়ার অ-ইহুদি ইমানদার ভাইঅক্যলর হাছে আঁরা সাআবিঅক্যলে আর জামাতর নেতাঅক্যলে, মানি অনরার ভাইঅক্যলে এই সিঢি লেকির। আঁরার সালাম গ্রঅন গরন।
[24] “আঁরা উনিত্ ফাইলাম দে, আঁরার মইধ্যর ত্যুন হয়েকজন যাই বউত হতা হইয়েনে অনরার মন অস্তির গরি তুলিয়েনে হষ্ট দিয়্যে, কিন্তু আঁরা য়িতারারে এই ডইল্যা হাম গইত্যো নঅঅ হইয়্যি।
[25] ইয়ানর লাই আঁরা বেক্যিনে একমত অইয়েনে হয়েকজনরে বাছি লইয়েনে আঁরার ফ্রিয় বন্ধু বান্যাবাস আর ফোলর লগে অনরার হাছে য়িতারারে ফাটাইলাম।
[26] বান্যাবাস আর ফোল আঁরার হযরত ইসা মসিহ্র লাই মরনর মুকামুকি অইয়্যেল্।
[27] আঁরা এহুদা আর সিলরে ফাটাইলাম যেন্ আঁরা যেগিন লেকির য়েগিন য়িতারা অনরার হাছে মুকেঅ হঅ।
[28] ফাক-রুহ্ আর আঁরা ইয়ানই ভালা মনে গইল্যাম দে, এই দরহারি বিষয়গিন বাদে আর হনঅ কিছু দিয়েনে অনরার উঅর যেন্ বোজা চাবাআ নঅ অঅ।
[29] য়েই দরহারি বিষয়গিন অইল্ — অনরা মুত্যির হাছে উত্সর্গ গরা হ্যানা নঅ হ্যাইবান, রক্ত নঅ হ্যাইবান, গলা চিবিয়েনে মারা ফশুর গোস্ত নঅ হ্যাইবান আর হনঅ ডইল্যা জেনা নঅ গরিবান। এগিন গরনর ত্যুন দুরে থাকিলে অনরা ভালা গরিবান। বিদায়।"
[30] ফোল, বান্যাবাস আর য়েই মানুষঅক্যলরে ফাটাইবার ফর য়িতারা এন্টিয়কত্ গেল্। য়েডে য়িতারা জামাতর মানুষঅক্যলরে একত্র গরিয়েনে য়েই সিঢিগান য়িতারারে দিল্।
[31] মানুষঅক্যলে সিঢিগান ফরিল্ আর য়িয়ানর মাঝে যে সান্তনার হতা আছিল্ য়িয়ানত খুশি অইল্।
[32] এহুদা আর সিল নিজেরাঅ আছিল্ নবি; য়িয়ানর লাই য়িতারা বউত হতা হইয়েনে য়েডিয়ার ভাইঅক্যলরে উত্সাঅ দিল্ আর য়িতারার ইমান বারাইয়েনে য়িতারারে শক্তিশালি গরি তুলিল্।
[33] এন্টিয়কত্ য়িতারা কিছু দিন হাডাইল্। জেরুজালেমর যারা এহুদা আর সিলরে এন্টিয়কত্ ফাটাইয়্যেল্, এন্টিয়কর ভাইঅক্যলে য়িতারারে সালাম জানাইয়েনে এহুদা আর সিলরে আবার য়িতারার হাছে ফেরত ফাটাই দিল্,
[35] কিন্তু ফোল আর বান্যাবাস এন্টিয়কতই রইল্। য়েডে য়িতারা আরো বউত কেউঅর লগে মাবুদর কালাম শিক্যা দিতো ও তবলিগ গইত্যো থাকিল্ ।
[36] কিছু দিন ফরদি ফোল বান্যাবাসরে হইল্, “যে সমস্ত জাগাত আঁরা মাবুদর কালাম তবলিগ গজ্যি, চল, এহনই য়েই সমস্ত জাগাত ফিরি যাইয়েনে ইমানদার ভাইঅক্যলর লগে দেহ্যা গরি আর য়িতারা কেন্ গরিয়েনে চলের য়িয়ান চাই।”
[37] তহন বান্যাবাস ইউহোন্যারে লগে নিতো চাইল্। এই ইউহোন্যারে মার্ক হইয়েনেঅ ডাকা অইতো।
[38] ফোল কিন্তু য়িবারে লগে লঅন ভালা মনে নঅ গরিল্, হারন মার্ক ফাম্ফুলিয়াত্ য়িতারারে ছারি গেইয়্যেল্ গই ও য়িতারার লগে আর হাম নঅঅ গরে।
[39] তহন ফোল আর বান্যাবাসর মাঝে এন্ মতর অমিল অইল্ দে, য়িতারা একজন অইন্য জনর হাছর ত্যুন আলিদা অই গেল্। বান্যাবাস মার্করে লই জাঁআসত গরি সাইফ্রাস দিফত গেল্, আর ফোল সিলরে বাছি লইল্।
[40] তহন এন্টিয়কর ভাইঅক্যলে ফোল আর সিলরে মাবুদর রহমতর আতত্ তুলি দঅনর ফর য়িতারা রঅনা অইল্।
[41] ফোল সিরিয়া আর কিলিকিয়ার মইধ্য দিই যাইয়েনে বেক জামাতগিনর ইমান বারাইয়েনে য়িতারার আরো শক্তিশালি গরি তুলিল্।