[1] ফোল আর সিল আম্ফিফলি আর আফল্যোনিয়া শঅরর মইধ্য দিয়েনে থিষলনিকি শঅরত গেল্। য়েডে ইহুদিঅক্যলর উগ্যুয়া মজলিস-হ্যানা আছিল্।
[2] ফোল তেঁইর নিয়ম মতনই য়েই মজলিস-হ্যানাত গেল্ আর ফর ফর তিন জিরাইবার দিনত্ মানুষঅক্যলর লগে ফাক-কিতাবর ত্যুন আলোচানা গরিল্।
[3] তেঁই মানুষঅক্যলরে বুঝাইল্ আর ফরমান গরিল্ দে, মসিহ্র হষ্টভোগ গরিবার আর মরনর ত্যুন জিন্দা অই উঢিবার দরহার আছিল্। তেঁই হইল্, “যে ইসার হতা আঁই অনরার হাছে তবলিগ গরির্ য়েই ইসাই অইল্ মসিহ্।”
[4] এই হতা উনিয়েনে হয়েকজন ইহুদি ইমান আনিয়েনে ফোল আর সিলর লগে যোগ দিল্। ইয়ান বাদে আল্লাহ্ভক্ত বউত গিরিক্ আর বউত বিশেষ বিশেষ মাইয়্যাফোয়াঅ য়িতারার লগে যোগ দিল্।
[5] ইহুদিঅক্যলে কিন্তু ইংসা গরিয়েনে বাজারর ত্যুন কিছু দুষ্ট মানুষ জোগার গরি আনিয়েনে ভিড় জমাইল্ আর শঅরর মাঝে গোলমাল বাজাই দিল্। তারফর ফোল আর সিলর তালাইশ গরিয়েনে বাইরর মানুষঅক্যলর হাছে য়িতারারে আনিবার লাই য়িতারা যাসোনর বাড়ির উঅর যেন্ ঝাফাই ফরিল্,
[6] কিন্তু য়েডে তারা য়িতারারে নঅ ফাইল্। তহন য়িতারা যাসোন আর হয়েকজন ইমানদার ভাইঅরে টানি নিয়েনে শঅরর ফশাসকঅক্যলর হাছে গেল্ আর চিল্যাইয়েনে হইল্, “যে মানুষঅক্যলে সারা দুনিয়া তোলফার গরি তুইল্যে য়িতারা এহন এডেঅ আজির অইয়্যে;
[7] আর যাসোন য়িবার নিজর বাড়িত্ য়িতারারে জাগা দিয়্যে। য়িতারা বেক্যিনে বাদশা সিজারর উকুম অমাইন্য গরিয়েনে হঅর দে, তেঁই বাদে ইসা নামে আরো একজন বাদশা আছে।”
[8] এই হতাগিন হইয়েনে য়েই ইহুদিঅক্যলে ফশাসকঅক্যলরে আর মানুষঅক্যলরে অস্তির গরি তুলিল্।
[9] কিন্তু যাসোন আর অইন্য মানুষঅক্যলে জাবিনর টিঁয়া দঅনর ফর তারা য়িতারারে ছারি দিল্।
[10] রাইত্ অঅনর ফর ইমানদার ভাইঅক্যলে ফোল আর সিলরে বিরয়াত ফাটাই দিল্। য়েডে ফোঁছিয়েনে য়িতারা ইহুদিঅক্যলর মজলিস-হ্যানাত গেল্।
[11] থিষলনিকির ইহুদিঅক্যলর ত্যুনঅ বিরয়া শঅরর ইহুদিঅক্যলর মন বউত বেশি খোলা আছিল্। য়িতারা বউত আগ্রঅর লগে আল্লাহ্র কালাম উনিয়েনে য়িয়ান গ্রঅন গরিল্। ফোল যেগিন হইয়্যে য়েগিন আঁসা কিনা চাইবার লাই ফত্যি দিন য়িতারা কিতাবর মাঝে হ্যোজ-হ্যবর গইত্যো।
[12] বউত ইহুদি ইসার উঅর ইমান আনিল্; ইয়ান বাদে বউত বিশেষ গিরিক মাইয়্যাফোয়া আর মরতফোয়াঅ ইমান আনিল্।
[13] থিষলনিকির ইহুদিঅক্যলে যহন উনিত্ ফাইল্ ফোল বিরয়াত্ আল্লাহ্র কালাম তবলিগ গরের্ তহন য়িতারা য়েডেঅ গেল্ আর মানুষঅক্যলরে উত্যেজিত গরিয়েনে গোলমাল বাজাই দিল্।
[14] ইমানদার ভাইঅক্যলে তহনই ফোলরে সাগরর ধারত্ ফাটাই দিল্, কিন্তু সিল আর তিমথিয় বিরয়াত্ই থাকিল্।
[15] যে মানুষঅক্যলে ফোলরে লগে গরি লই যাইতো আছিল্ য়িতারা তেঁইরে এথেন্স শঅরত আনিল্। তারফর য়েই মানুষঅক্যলে সিল আর তিমথিয়র লাই এই উকুম নিয়েনে বিরয়াত্ ফিরি গেল্ দে, সিল আর তিমথিয় যেত তরাতরি সম্ভব যাইয়েনে যেন্ ফোলর লগে যোগ দেএ।
[16] ফোল এথেন্স শঅরত সিল আর তিমথিয়র লাই অফেক্যা গরিবার সমত য়েই শঅর ফতিমায় ভরা দেকিল্। য়িয়ানত তেঁইর মন বউত বেকুল অই উঢিল্।
[17] তেঁই মজলিস-হ্যানার মাঝে ইহুদিঅক্যলর লগে আর আল্লাহ্ভক্ত গিরিকঅক্যলর লগে আলোচানা গইত্যো লাগিল্। ইয়ান বাদে যারা বাজারত আইস্তো য়িতারার লগেঅ তেঁই দিনর ফর দিন আলোচানা গইত্যো থাকিল্।
[18] তহন এফিকিউরিয় আর স্টোয়িকিয় দলর হয়েকজন ওস্তাদ ফোলর লগে বারাবারি লাগাই দিল্। য়িতারার মাঝে হয়েকজনে হইল্, “এই বাচাল্যুয়া কি হইতো চাআর?” আবার অইন্যগিনে হইল্, “ য়িবা বিদেইশ্যা দেব-দেবির হতা ফচার গরের ফান্লার্।” য়িতারা এই হতা হইল্ হারন ফোল ইসার বিষয়ে আর মরনর ত্যুন জিন্দা অইয়েনে উঢিবার বিষয়ে তবলিগ গইত্যো আছিল্।
[19] তহন য়েই ওস্তাদঅক্যলে ফোলরে এরিওফেগসর মিটিংগর সাম্নদি আজির গরিল্। য়েডে য়িতারা ফোলরে ফুছার গরিল্, “যে নয়া শিক্যা অনে দিতা লাইগ্যোন য়েই শিক্যা কি, য়েগিন কি আঁরা জানিত্ ফারি না?
[20] হারন অনে এন্ হতাক্যিন হতা হইতা লাইগ্যোন যেগিন আঁরার হানত্ আজগবির মতন উনার। য়িয়ানর লাই এই হতার মানি কি য়েগিন আঁরা জাইন্তাম চাই।”
[21] য়িতারা এই হতা হইল্ হারন এথেন্সর মানুষঅক্যলে আর য়েই শঅরত যে বিদেইশ্যাঅক্যলে থাইক্তো য়িতারা হ্যালি নয়া নয়া বিষয় লই হতা হইয়েনে আর উনিয়েনে সময় হ্যাডাইতো।
[22] তহন ফোল এরিওফেগসর মিটিংগর মাঝে উঢিয়েনে থিয়াই হইল্, “এথেন্স শঅরর মানুষঅক্যল, উনন্। আঁই দেকিত্ ফাইর্ দে, অনরা বেক মিক্যাদির ত্যুনই বউত ধর্মভিরু,
[23] হারন আঁই ঘুরি বেড়াইবার সমত অনরার উফাসনার জিনিসগিন যহন দেইক্তাম আছিলাম তহন এন্ এক্যান বেদি দেকিত্ ফাইলাম যিয়ানর উঅরদি লেহ্যা আছে, ‘অজানা দেবতার উদ্যেশ্যে।’ অনরা নঅ জানিয়েনে যিবার উফাসনা গইত্যা লাইগ্যোন তেঁইর সম্যন্দে আঁই অনরার হাছে ফচার গরির।
[24] “আল্লাহ্, যিবা এই দুনিয়া আর য়িয়ানর মাঝে যেগিনর আছে বেক কিছু বানাইয়্যে, তেঁইই বেহেস্তর আর দুনিয়ার মালিক। তেঁই আতে বানাইন্যা হনঅ মন্দিরত নঅ থাকে।
[25] তেঁইর হনঅ অভাব নাই, য়িয়ানর লাই মানুষর আতর ত্যুন সেবা গ্রঅন গরিবারঅ তেঁইর দরহার নাই, হারন তেঁইই বেক মানুষরে জিবন, ফরানবায়ু আর অইন্যাইন্য বেক কিছু দান গরে।
[26] তেঁই একজন মানুষর ত্যুন বেক জাতির মানুষ সিষ্টি গইজ্যে যেন্ য়িতারা সারা দুনিয়াত থাকে। য়িতারা হঁত্যে হডে থাকিবো য়িয়ানঅ তেঁই ঠিগ গরি দিয়্যে।
[27] আল্লাহ্ এই হাম গইজ্যে যেন্ মানুষ আতাইতে আতাইতে তেঁইরে ফাই যাইবার আশায় তেঁইর তালাইশ গরে। কিন্তু আসলে তেঁই আঁরার কেউঅর হাছর ত্যুন দুরে নঅঅ,
[28] হারন তেঁইর কুদরতিতেই আঁরা জিবন হাডাই আর চলাফিরা গরি ও বাঁচিঅ আছি। অনরার হয়েকজন হোবিঅ হইয়্যে, ‘আঁরাঅ তেঁইর ফোয়াছা।’
[29] “তইলে আঁরা যহন আল্লাহ্র ফোয়াছা তহন আল্লাহ্রে মানুষর আত আর চিন্তাশক্তি দিয়েনে বানাইন্যা সোনা, রুফা বা ফাত্যোরর মুত্যি মনে গরন আঁরার উচিত নঅঅ।
[30] আগর দিনত মানুষ নঅ জাইন্তো বুলি আল্লাহ্ এগিন দেকিয়েনেঅ নঅঅ দেকে। কিন্তু এহন তেঁই বেক জাগাত বেক মানুষরে তঅবা গইত্যো উকুম দেএর,
[31] হারন তেঁই এন্ এক্যান দিন ঠিগ গইজ্যে যে দিনত তেঁইর নিযুক্ত মানুষরে দিয়েনে তেঁই নিয়াইভাবে মানুষর বিচার গরিবো। তেঁই য়েই মানুষরে মরনর ত্যুন জিন্দা গরি তুলিয়েনে বেক মানুষর হাছে ইয়ানর ফরমান দিয়্যে।”
[32] মরাঅক্যলর আবার জিন্দা অইয়েনে উঢিবার হতা উনিয়েনে মানুষঅক্যলর মাঝে হয়েকজন মুক বেঁগাইল্, কিন্তু অইন্যতারা হইল্, “এই বিষয়ে অনর হতা আঁরা আবার উইন্যোম।”
[33] তহন ফোল য়েই মিটিং ছারিয়েনে গেল্ গই।
[34] হয়েকজন মানুষ ফোলর লগে যোগ দিল্ আর ইমান আনিল্। য়েই ইমানদারঅক্যলর মাঝে দিয়নুষিয় নামর এরিওফেগসর মিটিংগর একজন সদইস্য, দামারিস্ নামর একজন মাইয়্যাফোয়া আর য়িতারার লগে আরো হয়েকজন আছিল্।