[1] Mara anyanye kaator PANGERAN, asorak kaator ka panyalamedda sengko' ban ba'na!
[2] Mara ngadhep ka ajunanna bi' nyanyeyan sokkor sambi asorak, anyanye amolja'agi asmana.
[3] Sabab PANGERAN reya Allah se agung, Rato parjuga se ngalebbi'i sakabbinna diba.
[4] Pangeran reya ngobasane bagiyan-bagiyan se paleng dhalem e bume, co'-konco'na gunong kaagunganna keya.
[5] Salerana ngobasane tase', sabab tase' jareya badhiyanna, dineng tenggangan cepta'anna astana keya.
[6] Mara asojud nyemba ka Salerana, asojud e ajunanna PANGERAN se nyepta'agi sengko' ban ba'na.
[7] Sabab PANGERAN jareya Allahna sengko' ban ba'na, ba'na ban sengko' ommat se epeyara Salerana, padha ban dumba se eowan Salerana. E are teya mara edhingngagi sowarana:
[8] “Ba'na ja' pacengkal akantha bangatowana e Meriba, e bakto badha e Masa, e tengnga ra-ara.
[9] E jadhiya bangatowana ba'na ba'-nyoba' Sengko', maske la padha nangale'e Tang lalakon.
[10] Pa' polo taon abidda Sengko' ngalennyer ka bangatowana ba'na, ca'na Sengko', ‘Ta' esto onggu bangsa reya! Padha ta' parduli ka Tang parenta.’
[11] Daddi sambi peggel Sengko' asompa, reng-oreng jareya bi' Sengko' ta' epamaso'a ka nagara jareya, se samasthena daddiya kennengnganna aistirahat apolong ban Sengko' Pangeranna.”