<Jabur 121

[1] Nyanyeyan ziyara. Sengko' ngabas ka nong-gunong, dhari dhimma dhatengnga partolongan kaangguy sengko'?

[2] Partolongan se etarema sengko' asalla dhari PANGERAN se abadhi alam dunnya.

[3] Salerana tanto ajaga ba'na sopaja ta' labuwa, se ngaobi ba'na tanto ros-terrosan aga-jaga.

[4] Ongguwan, se ngaobi Isra'il rowa ta' tao ngantok otaba asaren.

[5] PANGERAN tanto ajaga ba'na, badha e seddi'anna ba'na kaangguy ngaobi ba'na.

[6] Ba'na ta' kera sake' polana are e baja seyang, otabana polana bulan e baja malem.

[7] PANGERAN bakal ngaobana ba'na dhari babaja, Salerana ajaga ba'na sopaja ba'na salamedda.

[8] Salerana ngaobi ba'na e bakto ba'na ondur ban dhateng, sateya ban salanjangnga.