[1] Abdidalem nyare pangaoban ka Junandalem, GUSTE, ja' kantos abdidalem epamalo.
[2] Bebassagi abdidalem, sabab Junandalem adil, peyarsa'agi abdidalem sareng pasalamettagi.
[3] Ngereng Junandalem daddi gunong bato kennengnganna abdidalem ngaop; sareng daddi binteng se koko kennengnganna abdidalem nyare salamet. Sabab Junandalem sowaka sareng kennengnganna kasalameddan monggu ka abdidalem ka'dhinto.
[4] Ya Allah, palopottagi abdidalem dhari oreng jahat, dhari kobasana oreng se kejjem sareng daraka.
[5] Sabab Junandalem pangarebban abdidalem, Guste ALLAH Se Mahatenggi; abdidalem parcaja ka Junandalem ngabidi gi' kene'.
[6] Saomorra abdidalem terros nyandhar ka Junandalem; Junandalem se ajaga abdidalem ngabidi abdidalem lahir, daddi abdidalem ngagungngagi Junandalem terros.
[7] Odhi' abdidalem daddi conto ka oreng bannya', sabab Junandalem pangaoban abdidalem se kowat.
[8] Abdidalem ros-terrosan moji Junandalem, saare benteng abdidalem aberta'agi kaagunganna Junandalem.
[9] Ja' buwang abdidalem manabi ampon towa, ja' dinggallagi abdidalem manabi ampon ta' gadhuwan kakowadan,
[10] sabab so-moso padha ngacaca abdidalem se terro mateyana abdidalem padha asakongkel.
[11] Ca'epon reng-oreng gapaneka, “Oreng rowa la edina bi' Allah; mara serser, mara pega' sabab la tadha' se masalamedda oreng rowa.”
[12] Ja' majau dhari abdidalem, Guste Allah, Ya Allah, ngereng duli tolong abdidalem.
[13] Diggal oreng se nyerrang abdidalem me' olle epamalo sareng epatompes, oreng se macalaka'a abdidalem me' olle eya-seya sareng katodhusen.
[14] Namong abdidalem terrosa ngarep ka Junandalem, sareng sajana bajeng se moji Junandalem.
[15] Saare benteng abdidalem nyareta'agiya sadajana kaadilan sareng kasalameddan se ta' kabitong saponapa bannya'na, se sadajana dhari Junandalem asalla.
[16] Abdidalem mojiya kobasana Junandalem, Guste ALLAH Se Mahatenggi, abdidalem makalonta'a kaadilanna Junandalem, namong kaadilanna Junandalem saos.
[17] Ya Allah, Junandalem apareng kasalameddan ka abdidalem dhari gi' kene', kantos mangken abdidalem nyareta'agi sadaja se elampa'agi Junandalem se makasambu' ate.
[18] Ya Allah, ja' dinggallagi abdidalem, kantos abdidalem towa sareng oban, sopaja abdidalem aberta'agi kobasana sareng kaparjuga'anna Junandalem, ka sadajana katoronan se bakal dhateng.
[19] Ya Allah, kaadilannepon Junandalem salangnge' tenggina; se elampa'agi Junandalem talebat rajana; pasera se nandhinge Junandalem?
[20] Junandalem marenge abdidalem kasossa'an se berra' sabannya'na, namong Junandalem mabaliya kakowadan abdidalem akadi asalla, sareng majaga abdidalem dhari makam.
[21] Junandalem bakal madaddiya abdidalem amolja'an dhari gi' dhimen, sareng apareng panglepor ka abdidalem pole.
[22] Abdidalem mojiya Junandalem sareng gambus, sabab Junandalem esto, Guste Allah. Abdidalem anyanye amolja'agiya Junandalem sareng calempong, mojiya Junandalem, Guste, Allahna Isra'il se socce.
[23] Abdidalem asoraga ce' gumbirana sambi anyanye amolja'agi Junandalem. Badan sareng sokma abdidalem anyanye kaperagen, polana Junandalem masalamet abdidalem.
[24] Saare benteng abdidalem aberta'agiya kaadilannepon Junandalem, sabab reng-oreng se macalaka'a abdidalem ampon epakala ban epamalo sareng Junandalem.