[1] Jaburra kaom Korah.
[2] PANGERAN reya agung onggu ban talebat emolja'agi e kotthana Allahna sengko' ban ba'na, e gumo'na se socce.
[3] Siyon, Gumo'na Allah, tenggi ban bagus, kotthana Rato Agung maperak saessena bume.
[4] Allah noduwagi ja' e kottha bintengnga, aman apolong ban Salerana.
[5] Mara abas, to-rato padha akompol, padha entara alorok.
[6] Tape nangale'e gumo' jareya, reng-oreng jareya heran; bingong, padha buru katako'en.
[7] E jadhiya reng-oreng jareya, ngetter sabadan, polana tako' ban sake', akantha babine' se rembi'a.
[8] akantha kapal se ancor e dhalem kaleng busbus.
[9] Sengko' ban ba'na padha ngedhing apa se elampa'agi Allah, sateya sengko' ban ba'na nangale'e jareya e kotthana Allah, PANGERAN Se Mahakobasa; Allah bakal ajaga'a ban abilla kottha jareya salanjangnga.
[10] E dhalem dalemmepon Junandalem abdidalem ker-mekker kataresna'annepon Junandalem, Guste Allah.
[11] Asmaepon Junandalem kalonta sareng eagungngagi e saantero bume, Junandalem marenta kalaban adil.
[12] Diggal ra'yat Siyon sareng Yehuda me' olle asorak anga-bunga lantaran Junandalem ngokom so-mosona.
[13] Mara alengleng e Siyon, moter e jadhiya, ban etong manarana.
[14] Abassagi geddhungnga, pareksa bintengnga, sopaja ba'na bisa'a acareta ka toronanna:
[15] “Jareya Allah, Allahna sengko' ban ba'na salanjangnga, se mimpina sengko' ban ba'na salanjangnga.”