[1] Dhari Daud. Molja'agi PANGERAN tang pangaoban! Salerana se ngalate sengko' abuwang, se ngajari sengko' aperrang.
[2] Salerana se nolong ban se abilla sengko', panyalamedda sengko', kennengnganna sengko' ngaop. Salerana tang pangaoban, kennengnganna tang pangongseyan, se matellok sa-bangsa ka sengko'.
[3] Ponapa manossa ka'dhinto, GUSTE, sareng Junandalem me' egateyagi? Pasera manossa ka'dhinto, sareng Junandalem me' ekagali?
[4] Manossa ka'dhinto akadi angen sasergu'an, odhi'na akadi jang-bajangan se lebat.
[5] Ngereng bukka' langnge'epon Junandalem, GUSTE, pas toron ka baba, seddingngagi nong-gunong me' olle metto kalembang.
[6] Ontallagi kelappepon Junandalem sopaja moso asalebbudan, ocol panaepon Junandalem sopaja reng-oreng gapaneka baridhu.
[7] Pangacengngagi astaepon Junandalem dhari sowarga, palopottagi abdidalem dhari banjir sareng ba'a. Pasalamettagi abdidalem dhari kobasana oreng manca
[8] se dujan acaca lecek sareng nepo, sarta asompa palsu.
[9] Abdidalem anyanyeyagiya lagu se anyar kaagem Junandalem, ya Allah, sareng nabbuwa calempong sambi anyanye.
[10] Junandalem marenge kamennangan ka to-rato sareng mabebas Daud, abdiepon.
[11] Palopottagi abdidalem dhari peddhangngepon oreng jahil; pasalamettagi abdidalem dhari kobasaepon oreng manca se dujan acaca lecek sareng nepo sarta asompa palsu.
[12] Moga ana' lalake'anna sengko' ban ba'na e bakto ngodhana padha'a ban men-tamennan se atamba raja. Moga ana' babine'anna sengko' ban ba'na padha'a ban pangpang se lebur abasanna se daddi rarengganna du-padduna karaton.
[13] Moga dhang-gudhangnga sengko' ban ba'na possa'a aesse hasel bume samacemma. Moga ba-dumba e gal-teggalla sengko' ban ba'na adhu'-budhu'a sampe' apolowan ebu bannya'na.
[14] Moga pe-sapena sengko' ban ba'na adhu'-budhu'a, tadha' se elang otaba kalabuwan. Moga tadha'a oreng se acerreng polana kasangsara'an e rong-lorongnga kotthana sengko' ban ba'na.
[15] Pojur bangsa se kantha jareya, pojur ommat se Allahna PANGERAN!