[1] Kaangguy pamimpinna koor. Eerenge bi' soleng. Jaburra Daud.
[2] Adhu GUSTE, peyarsa'agi ca'-oca' abdidalem, gateyagi serrona abdidalem.
[3] Peyarsa'agi abdidalem, nyo'ona tolong, Guste, sabab namong Junandalem Rato sareng Allah abdidalem.
[4] Sabab abdidalem adu'a ka Junandalem, GUSTE, peyarsa'agi serrona abdidalem e baja laggu. Abdidalem abakta tor-ator gu-laggu sareng anante' dhabuepon Junandalem, Guste.
[5] Junandalem Allah se ta' kasokan ka kajahadan; oreng jahat ta' kengeng nyabis ka Junandalem.
[6] Junandalem ta' betta ngoladi oreng sombong, Junandalem baji' ka oreng se alako jahat.
[7] Reng-oreng se lecegan sareng Junandalem epate'e, Junandalem baji' ka oreng se dujan co-ngoco sareng se dujan mate'e oreng.
[8] Namong lantaran kataresna'annepon Junandalem se talebat rajana, abdidalem kengeng maso' ka Padalemmannepon Junandalem. Abdidalem asojud ngadhep ka Padalemmannepon Junandalem se socce, sareng nyemba ka Junandalem kalaban hormat.
[9] Adhu GUSTE, moso abdidalem ce' bannya'na! Tontonnagi abdidalem sopaja alampa'agi karsaepon Junandalem sadajana, sareng duduwagi e ka'dhimma abdidalem kodu lebat.
[10] Sabab cacana moso abdidalem ta' ekenneng parcaja; atena possa' sareng sajja se juba'. Cacana manes ngapencot ate, namong, bucco' e dhalem baten.
[11] Guste Allah, okommagi reng-oreng gapaneka, me' olle padha calaka' lantaran sajjaepon dibi'. Tondhungngagi reng-oreng gapaneka, lantaran bannya' dusana, sabab padha aberonta' ka Junandalem.
[12] Sadajana oreng se ngaop ka Junandalem mandar padha'a sennengnga, sareng rak-soragan salanjangnga. Jaga'agi reng-oreng se taresna ka Junandalem, sopaja padha'a anga-bunga lantaran Junandalem.
[13] Sabab Junandalem aberkadi reng-oreng se esto ka Junandalem, GUSTE; Junandalem ajaga sadajana kalaban bellas ase.