[1] Kaangguy pamimpinna koor. Menorot lagu Gitit. Jaburra Daud.
[2] Guste ALLAH, Pangeran kaula, kakobasa'annepon Junandalem kasohor saantero bume! Kaagungannepon Junandalem atenggiyan sareng langnge',
[3] enyanyeyagi na'-kana' sareng babaji'. Pamarenta'annepon Junandalem koko ta' ekenneng gundhek moso. Sadajana moso sareng Junandalem epata'bisa aguli.
[4] Manabi abdidalem adhanga nengale langnge' cepta'annepon Junandalem, bulan sareng bintang se epasang sareng Junandalem,
[5] abdidalem apekker tadha' ambuna, pasera sanyataepon manossa ka'dhinto, me' sareng Junandalem etolong terros, sareng Junandalem epeyara?
[6] Namong sareng Junandalem sadajana manossa eangkat kantos para' padha'a sareng Allah, eparenge jamang kaagungan sareng kahormadan.
[7] Sareng Junandalem eparenge kobasa ngator alam saessena, sadaja cepta'annepon Junandalem epakobasae ka manossa:
[8] dumba, sape sareng ebin sadajana, jugan ban-keban se badha e ra-ara;
[9] mano' sareng juko', se raja sareng se kene', sadajana mahlok e dhalem tase' raja.
[10] GUSTE, Pangeran kaula, kaagungannepon Junandalem kasohor saantero bume!