[1] Nyanyeyan. Jaburra Daud.
[2] Ya Allah, abdidalem koko parcaja ka Junandalem, abdidalem anyanye amolja'agiya Junandalem. Mara jaga, tang sokma!
[3] Mara jaga, gambus ban calempong! Sengko' ajaga'ana pajjar.
[4] Abdidalem asokkor ka Junandalem, GUSTE, e antaraepon sa-bangsa. Abdidalem terro anyanyeya pojiyan kaator Junandalem, e antaraepon manossa.
[5] Sabab kataresna'annepon Junandalem raja kantos gan langnge'; kaestowannepon Junandalem kantos ka ondhem.
[6] Ya Allah, duduwagi kaagungannepon Junandalem e langnge', sareng kamolja'annepon Junandalem e saantero bume.
[7] Nyo'ona salamet abdidalem bit kobasaepon Junandalem, jawabbagi du'a abdidalem, sopaja reng-oreng se ekataresnae Junandalem padha salamet.
[8] Dhari kalenggiyanna se socce Allah adhabu, “Sengko' asoraga ban gi-magiya tana Sikhem, Cora Sukot bi' Sengko' eelloda.
[9] Gileyad ban Manasye reya Tang andhi', Efraim Tang songko' baja, Yehuda Tang tongket karaja'an.
[10] Tape Mo'ab kennengnganna pamaccowanna Tang soko; Sengko' asorak mennang ka Filistea. Sengko' ngontallagi Tang kasot ka Edom, menangka tandha Edom jareya andhi'na Sengko'.”
[11] Sapa se ngeba'a sengko' ka Edom? Sapa se nontona sengko' ka kottha binteng jareya?
[12] Ya Allah, ponapa Junandalem ta' kasokan onggu asarengnge abdidalem sadaja? Ponapa Junandalem ta' kasokan maju asarengnge tantarana abdidalem sadaja?
[13] Tolong abdidalem sadaja ngadhebbi moso, sabab bantowannepon manossa tadha' gunana.
[14] Abareng Allah, sengko' ban ba'na parjuga; Allah jareya se makala mosona sengko' ban ba'na.