[1] Kaangguy pamimpinna koor. Menorot nyanyeyan: Kembang kacobung. Jabur kasakseyanna Asaf.
[2] PANGERAN se ngowan Isra'il, ngereng peyarsa'agi, Junandalem se mimpin ommat toronannepon Yusup epakadi dumba saambal. Junandalem se alenggi e attas kerub, kasokana Junandalem ngaton
[3] ka Efraim, Benyamin sareng Manasye. Duduwagi kakobasa'annepon Junandalem ka abdidalem sadaja, ngereng ka ka'dhinto, pasalamettagi abdidalem sadaja.
[4] Ya Allah, pabaliyagi abdidalem sadaja akadi asalla, oladi sareng kabellasi abdidalem sadaja sopaja padha salamet.
[5] PANGERAN, Allah Se Mahakobasa, kantos bilaepon Junandalem se duka'a, sanare ommattepon Junandalem adu'a?
[6] Sareng Junandalem abdidalem sadaja eteddhai tangesan, sareng eenome aeng mata se talebat bannya'na.
[7] Sa-bangsa tatangga sareng Junandalem edinggal atokar lantaran tana abdidalem sadaja, moso padha agella'an kasennengngen.
[8] Ya Allah Se Mahakobasa, pabaliyagi kabadha'an abdidalem sadaja ka asalla, oladi sareng kabellasi abdidalem sadaja sopaja padha salamet.
[9] Ommattepon Junandalem akadi bungkana anggur se ealle Junandalem dhari Messer. Sa-bangsa laen sareng Junandalem eojuk, bungkana anggur sareng Junandalem pas etamen e nagarana.
[10] Bungka gapaneka sareng Junandalem esadhiyai tana; bungka gapaneka pas kalowar ramo' kantos dhalem, aka-cangka kantos daddi saantero nagara.
[11] Mo'-gumo' enaonge, ka-bungkana comara Libanon se ja-raja eaobi ca'-ranca'na.
[12] Ranca'na malanjang kantos ka Tase' Tengnga, co'-konco'na kantos ka Songay Efrat.
[13] Ya Allah, aponapa sareng Junandalem me' eparobbu pagarra, kantos buwana epetthek sareng saneyap oreng se lebat?
[14] Leng-celeng dhateng nyek-enyek bungkana, keban ngakan dhaun sareng buwana.
[15] Ya Allah Se Mahakobasa, ngereng Junandalem ka ka'dhinto pole, oladi dhari sowarga, ommattepon Junandalem tolonge.
[16] Parenge salamet ommat se akadi bungkana anggur ka'dhinto se etamen Junandalem dibi', jugan bi'-selbi'na se sareng Junandalem epatombu epakoko.
[17] Sareng moso bungkana epoger laju eobbar; pamateyagi reng-oreng gapaneka e dhalem dadukannepon Junandalem.
[18] Jaga'agi oreng se ampon epele Junandalem, ana'na manossa se sareng Junandalem epakowat kaangguy Junandalem.
[19] Abdidalem sadaja ta' nyalethong dhari Junandalem; jaga'agi odhi' abdidalem, abdidalem pas amolja'agiya Junandalem.
[20] PANGERAN, Allah Se Mahakobasa, pabaliyagi abdidalem sadaja akadi asalla, oladi sareng kabellasi abdidalem sadaja, sopaja padha salamet.