[1] Jaburra kaom Korah. Kaangguy pamimpinna koor.
[2] Mara edhingngagi, sa-bangsa, pasang kopengnga ba'na, pandhudhu' dunnya,
[3] oreng kene' ban oreng agung, se mesken ban se sogi.
[4] Sengko' ngoca'agiya ca'-oca' se bicaksana, essena tang pekkeran ce' dhalemma artena.
[5] Sengko' mekkera parkara parebasan, ban nerrangngagiya artena sambi nabbu calempong.
[6] Sengko' ta' tako' ngadhebbi babaja, e bakto ekeppong moso se jahat.
[7] Reng-oreng jareya ngandellagi kasogiyanna, ban ngedirragi dhi'-andhi'na.
[8] Sanyatana tadha' oreng settonga se bisa masalamet aba'na, otabana majar tebbusanna ka Allah.
[9] Tebbusanna nyabana manossa talebat larangnga, apa'a bai se ebajarragi ta' nyokobi bannya'na,
[10] kaangguy malopot dhari pate ban sopaja bisa'a odhi' salanjangnga.
[11] Kabbi oreng tao ja' maske oreng bicaksana sakale tanto mate keya. Bariya keya oreng gendheng ban oreng budhu, dhi'-andhi'na edina ka oreng laenna.
[12] Oreng se la mate bakal ennengnga e koburan salanjangnga; jareya se daddi bengkona saterrossa, maske sabellunna jareya andhi' tana sabannya'na.
[13] Oreng ta' kera lopot dhari pate polana kasogiyanna; padha ban keban, oreng jareya tanto mate keya.
[14] Kantha jareya oreng se ngandellagi aba'na, ban are pagi'na oreng se la senneng polana cacana.
[15] Reng-oreng jareya padha ban dumba, la etantowagi kodu mate; maot se daddi oreng ngowanna. Reng-oreng jareya epakala bi' reng-oreng se jujur atena, badanna bucco' ce' ceppedda e dunnyana oreng mate jau dhari bengkona se nyaman.
[16] Tape Allah tanto malopot sengko' dhari kobasana maot.
[17] Ja' tako' mon badha oreng se daddi sogi, ban dhi'-andhi'na sajan bannya'.
[18] Sabab oreng mon mate ta' kera ngeba pa-apa, dhi'-andhi'na ta' kera noro' ka koburanna.
[19] La'-mala' mon badha oreng se ontong odhi'na, ban ealem oreng bannya' polana ahasel ehteyarra,
[20] oreng jareya tanto nyosol bangatowana keya ka kennengngan se petteng kaangguy salanjangnga.
[21] Oreng ta' kera lopot dhari pate polana kasogiyanna; padha ban keban, oreng jareya tanto mate keya.