[1] Kaangguy pamimpinna koor. Jaburra Daud. Ya Allah se ros-terrosan emolja'agi sareng abdidalem, ngereng ja' ros-terrosan mendel.
[2] Sabab abdidalem eserrang oreng jahat sareng tokang tepo se mabalattra kabar lecek parkara abdidalem.
[3] Reng-oreng gapaneka nyerrang abdidalem sareng ca'-oca' se noduwagi kabaji'an, merrange abdidalem ta' kalaban badha sababba.
[4] Reng-oreng gapaneka ngarane abdidalem, sanare abdidalem taresna ka reng-oreng gapaneka, sareng mojiyagi reng-oreng gapaneka.
[5] Kabecce'an abdidalem ebales sareng kajahadan, kataresna'an abdidalem ebales sareng kabaji'an.
[6] Angkaddagi oreng jahat kasorang pakon ngadili oreng gapaneka, diggal oreng gapaneka me' olle egugat sareng mosona.
[7] Moga oreng gapaneka eadilana sareng enyata'agiya sala, sarengngan moga du'ana eanggebba dusa.
[8] Mandar oreng gapaneka duliya mate, ban pangkadda ekala' oreng laen.
[9] Moga ana'epon padha eparengngana daddi jatim, ban rajina daddi randha.
[10] Moga ana'epon padha daddiya oreng ngemmes se ajalan san-kassannagi ta' epanggi tojjuwanna, sareng eojuk dhari jur-gujuranna compo'na.
[11] Moga sadaja dhi'-andhi'na erampasa tokang tagina otang, hasella pello konengnga ekala' oreng.
[12] Ja' kantos badha oreng se becce' ate ka reng-oreng gapaneka, otabana bellas ase ka na'-ana'na se edinggalagi.
[13] Moga sadaja toronanna mateya, nyamana ekaloppae sareng angkadan se bakal dhateng.
[14] Moga kajahadanna bangatowana pagguna ekaemodi PANGERAN, ban dusana ebuna ta' epaelang.
[15] Moga kasala'anna reng-oreng gapaneka teptebba ekaemodi PANGERAN, ban tadha' oreng e bume se ngenga'e nyamana.
[16] Sabab oreng gapaneka ta' oneng enga' noduwagiya bellas ase sakone'a. Aba'epon nganeyaja oreng mesken sareng se nyangsara sarta mate'e oreng se ta' bisa apa-ponapa.
[17] Oreng gapaneka dujan abasto; moga ekennenga basto dibi'! Ta' poron apareng berkat, moga ta' onenga narema berkat dibi'!
[18] Monggu ka oreng gapaneka abasto barang biyasa, eanggep padha sareng masang kalambina. Diggal babaston gapaneka me' olle nyarepsep akadi aeng ka badanna, sareng akadi mennya' ka dhalem lang-tolangnga.
[19] Moga oreng gapaneka katotobana babastonna akadi se katotoban kalambina, sareng ele'le' babaston gapaneka akadi sabbu' e tengngana.
[20] GUSTE, teba'agi okoman gapaneka ka oreng se ngarane abdidalem, ka oreng se acaca jahat parkara abdidalem.
[21] Namong tolong abdidalem menorot janjiepon Junandalem, Guste ALLAH, Pangeran kaula, parenge salamet abdidalem lantaran kabecce'an sareng kataresna'annepon Junandalem.
[22] Sabab abdidalem mesken sareng nyangsara, ate abdidalem loka ce' dhalemma.
[23] Abdidalem para' elanga akadi jang-bajangan e baja asar, abdidalem ekepattagi epakadi balang.
[24] To'ot abdidalem ngetter polana apowasa, badan koros kerreng tadha' dagingnga.
[25] Reng-oreng se nengale abdidalem padha ya-nyeya sareng pek-kepeggan tadha' ambuna.
[26] Tolong abdidalem, Guste ALLAH, Pangeran kaula, parenge salamet abdidalem menorot kataresna'anna Junandalem.
[27] Daddi moso abdidalem tanto pas oneng ja' Junandalem se alampa'agi gapaneka, Guste.
[28] Sanare abdidalem ebasto sareng reng-oreng gapaneka, moga sareng Junandalem abdidalem eparengngana berkat. Sanare reng-oreng gapaneka padha jaga, reng-oreng gapaneka bakal epamalowa; namong moga abdidalem, abdiepon Junandalem ka'dhinto eparengngana gumbira terros.
[29] Moga reng-oreng se ngarane abdidalem eya'-seya'a odhi'na, ban rassa malo nyalokobi aba'na akadi juba.
[30] Sengko' amolja'agiya PANGERAN epakaja'a, makalonta'a asmana e nga'-tengnga'anna kompolanna ommat.
[31] Sabab Salerana abilla ban masalamet oreng mesken, dhari oreng se neba'agi okoman mate ka reng-oreng jareya.