[1] Jaburra Daud. Jaga'agi abdidalem, Guste Allah, sabab Junandalem pangaoban abdidalem.
[2] Abdidalem mator, “Junandalem PANGERAN abdidalem, se masenneng odhi' abdidalem, tadha' se ngalangkonge Junandalem!”
[3] Abdidalem ngargai reng-oreng socce e nagara ka'dhinto; abdidalem lebur akompol sareng reng-oreng gapaneka.
[4] Oreng se nyemba ba-diba kasossa'anna sajan aba-tamba. Abdidalem ta' poron abakta kurban ka ba-diba gapaneka, la'-mala' ta' poron nyebbut nyamana balakka'.
[5] GUSTE, abdidalem ta' gadhuwan pa-ponapa kajabana Junandalem malolo, tadha' laenna; Junandalem marenge sadaja se ekabuto abdidalem, odhi' abdidalem targantong ka Junandalem.
[6] Paparengngepon Junandalem ka abdidalem talebat saena, abdidalem se narema ce' sennengnga!
[7] Sengko' moji PANGERAN se apareng petodu ka sengko', e baja malem sowarana tang ate maenga' sengko'.
[8] Sengko' ros-terrosan enga' ka PANGERAN; Salerana badha e tang seddi'an, daddi sengko' ta' agundheggan.
[9] Daddi ate abdidalem perak, sokma abdidalem asorak, badan abdidalem aistirahat ce' taremtemma.
[10] Sabab sareng Junandalem abdidalem epalopot dhari kakobasa'annepon maot; Oreng se sareng Junandalem ekataresnae epalopot dhari pate.
[11] Junandalem noduwagi ka abdidalem jalan se nojju ka kaodhi'an; e ajunannepon Junandalem ate abdidalem ce' sennengnga sareng arassa perak salanjangnga.