[1] Jaburra Daud. Nyanyeyan kaangguy aresmeyagi Padalemman Socce.
[2] Abdidalem ngagungngagi Junandalem, GUSTE, sabab Junandalem ampon masalamet abdidalem; Junandalem ta' ngedine abdidalem erak-sorak moso.
[3] Guste ALLAH, Pangeran kaula, abdidalem aserro nyo'on tolong ka Junandalem, Junandalem laju mabaras abdidalem.
[4] Junandalem malopot abdidalem dhari alam maot, maodhi' abdidalem dhari antarana reng-oreng mate.
[5] Mara anyanye ji-moji PANGERAN, he ommadda se esto! Mara asokkor ka Se Mahasocce.
[6] Sabab pera' sakejja' dukana PANGERAN, kabecce'anna ros-terrosan saomorra. E baja malem sengko' nanges, tape pajjar dhateng maperak ate.
[7] E bakto arassa aman abdidalem ngoca', “Sengko' ta' ekenneng pakala!”
[8] Sabab Junandalem sae ka abdidalem, GUSTE, abdidalem sareng Junandalem epakowat akadi gunong se koko. Namong saamponna Junandalem laju ta' ngaton, abdidalem laju daddi tako'.
[9] Ka Junandalem, GUSTE, abdidalem aserro, ka Junandalem abdidalem nyo'on,
[10] “Ponapa gunana ka Junandalem manabi abdidalem mate sareng toron ka lobangngepon koburan? Sabab oreng mate ta' kera ngagungngagi Junandalem sareng ta' kera aberta'agi kaestowannepon Junandalem.
[11] Peyarsa'agi, GUSTE, sareng kabellasi abdidalem ka'dhinto, abdidalem nyo'ona tolong!”
[12] Tanges abdidalem sareng Junandalem eoba epadaddi tari se gumbira, kasossa'an abdidalem epatadha' egante'e kasennengngan se talebat rajana.
[13] Daddi abdidalem ta' poron neng-enneng; abdidalem anyanye ngagungngagi Junandalem, Guste ALLAH, Pangeran kaula, sareng asokkor ka Junandalem salanjangnga!