[1] Du'ana Daud. Peyarsa'agi abdidalem se aserro nyo'on kaadilan, GUSTE; gateyagi du'a ka'dhinto se kalowar dhari ate se berse.
[2] Tolong abdidalem e dhalem parkara ka'dhinto sabab Junandalem ngagali ponapa se lerres.
[3] Manabi Junandalem ngoji ate abdidalem sareng nalektegi abdidalem e baja malem, tanto Junandalem ngagali abdidalem ta' gadhuwan pekkeran juba'; se ekoca'agi abdidalem padha sareng essena ate.
[4] Abdidalem ta' ajalannagi kakerrasan, sadaja papakonna Junandalem elakone jalan kakerrasan sareng abdidalem ejauwi.
[5] Abdidalem odhi' ros-terrosan menorot petoduepon Junandalem, ta' nyempang sanare sakone'.
[6] Abdidalem aserro ka Junandalem, Guste Allah, sabab Junandalem ajawab du'a abdidalem; daddi ngereng oladi sareng peyarsa'agi du'a abdidalem.
[7] Duduwagi kataresna'annepon Junandalem se makasambu' ate, sabab Junandalem masalamet oreng se nyare pangaoban ka Junandalem, sadajana padha aman dhari serrangannepon moso manabi badha e seddi'annepon Junandalem.
[8] Peyara'agi abdidalem pakadi socana Junandalem, GUSTE, kepkebbagi abdidalem e baba'anna kalembangngepon Junandalem,
[9] sopaja lopoda dhari serrangannepon reng-oreng se jahat. Abdidalem ekeppong moso se mateyana abdidalem ka'dhinto;
[10] reng-oreng gapaneka ta' gadhuwan kabellasan, pacacana talebat angga'.
[11] Sadajana nyander agaribbung nyerranga abdidalem, nyare kasempadan abantengngagiya abdidalem.
[12] Moso abdidalem gapaneka akadi macan se nyangkaremma mangsana, akadi macan se gi' ngodha se ngaddhang e pangetegganna.
[13] Ngereng ngadek, GUSTE, labannagi sareng pakala'agi so-moso abdidalem gapaneka. Pasalamettagi abdidalem sareng peddhangngepon Junandalem, dhari serrangannepon oreng jahat.
[14] Pasalamettagi abdidalem dhari kakobasa'annepon reng-oreng se nompo' arta e dunnya. Okom reng-oreng gapaneka sareng balai se ampon esadhiya'agi Junandalem kaagem reng-oreng gapaneka. Parenge jugan okoman ka na' potona.
[15] Namong abdidalem mandengnga Junandalem sabab abdidalem ta' gadhuwan sala. Manabi abdidalem jaga tedhung, kahadirannepon Junandalem masenneng ate abdidalem.