[1] Kaangguy pamimpinna koor. Jaburra Daud.
[2] Bajjra onggu oreng mekkere oreng se ta' kowat; PANGERAN tanto nolong oreng jareya e bakto sossa.
[3] PANGERAN tanto ajaga ban meyara oreng jareya, tanto marenge kasennengngan e dhalem odhi'na e dunnya, ban ta' massra'agi aba'na ka mosona.
[4] PANGERAN tanto nolong oreng jareya e bakto sake', badanna laju epabaras pole.
[5] Ca'na sengko', “Abdidalem dusa ka Junandalem, GUSTE, kaneserre sareng pabarassagi abdidalem.”
[6] Sengko' ekacaca juba' bi' tang moso, se ngarep sopaja sengko' mate ban ta' ekaenga'e oreng pole.
[7] Reng-oreng se nyapot sengko' ta' saongguna atena. Kabbi padha nyare kabar juba' parkara tang aba', pas ekacaca san-kassannagi.
[8] Se baji' ka sengko' padha ato'-koto', acaca barang se paleng juba' parkara sengko'.
[9] Ca'na reng-oreng jareya, “Panyakedda ce' sarana, ta' kera ngenneng jaga pole salanjangnga.”
[10] La'-mala' tang kanca se rapet se paleng eparcaja bi' sengko', oreng se ngakan abareng ban sengko' padha ya-nyeya sengko'.
[11] Kaneserre abdidalem GUSTE, pabarassagi abdidalem, sopaja abdidalem kengenga males kajahadanna so-moso abdidalem.
[12] Manabi abdidalem ta' epakala moso, abdidalem pas oneng ja' abdidalem katarema ka Junandalem.
[13] Junandalem nolong abdidalem lantaran ate abdidalem berse; abdidalem epaodhi' asareng Junandalem salanjangnga.
[14] Molja'agi PANGERAN, Allahna Isra'il! Molja'agi Salerana sateya ban salanjangnga! Amin!