[1] Kaangguy pamimpinna koor. Jaburra Daud.
[2] Guste PANGERAN, rato perak lantaran sareng Junandalem epakowat; panggaliyannepon gumbira lantaran sareng Junandalem eparenge kamennangan!
[3] Junandalem ngabbuli pangaterrona, marenge se daddi parnyo'onanna.
[4] Junandalem rabu manggi'i salerana abakta berkat ta' sakera-kera, sareng masang jamang emmas e serana.
[5] Salerana nyo'on odhi', sareng Junandalem eparenge, eparenge lanjang omor salanjangnga.
[6] Lantaran partolongannepon Junandalem salerana ehormat oreng; sareng Junandalem epakasohor, epamolja.
[7] Sareng Junandalem eberkadi saterrossa; kahadirannepon Junandalem magumbira panggaliyanna.
[8] Rato ngarep partolonganna PANGERAN Se Mahakobasa, salerana ros-terrosan aman lantaran ekataresnae PANGERAN.
[9] Pangeran bakal nawana so-mosona, ban nangkep reng-oreng se baji' ka salerana.
[10] Pangeran rabu akantha apoy se rabbang mateyana so-moso jareya. Reng-oreng jareya bakal epamosna'a bi' dadukanna PANGERAN, sarta bi' apoy se makatononan.
[11] Dhari toronanna bakal tadha'a karena, bi' rato bakal epatompessa sakabbinna.
[12] Mon reng-oreng jareya andhi' sajja nangtanga ratona, tepona ta' kera badha hasella.
[13] Pangeran bakal ngaceddagiya panana sampe' reng-oreng jareya abali terros buru.
[14] Abdidalem sadaja moji Junandalem, GUSTE, sabab kobasana Junandalem ce' rajana, abdidalem sadaja padha anyanye, amolja'agi kakobasa'an sareng kakowadanna Junandalem.