[1] Jaburra Daud. Adhu GUSTE, abdidalem aserro ka Junandalem, Junandalem se abilla abdidalem, peyarsa'agi serrona abdidalem. Manabi Junandalem mendel, abdidalem akadi oreng se toron ka lobangnga koburan.
[2] Peyarsa'agi parnyo'onan abdidalem manabi abdidalem aera' nyo'on partolongan, sareng ngangka' tanang abdidalem epangadhep ka Padalemmannepon Junandalem se socce.
[3] Abdidalem ja' patompes pasareng oreng se daraka, ja' okom pasareng oreng se jahat odhi'na. Reng-oreng gapaneka manes cacana, namong atena bucco'.
[4] Okom reng-oreng gapaneka lantaran tengkana, menorot kajahadanna. Parenge okoman menorot sadaja se elakone; satembang sareng kajahadan se ejalane.
[5] Reng-oreng jareya ta' marduli sabarang se elampa'agi PANGERAN, otaba sabarang se ebadhi Salerana. Daddi bi' PANGERAN tanto eparenge okoman, ban reng-oreng jareya epatompes salanjangnga.
[6] Molja PANGERAN, sabab Salerana la meyarsa tang parnyo'onan.
[7] PANGERAN tang pangaoban ban panyalamet sengko', sengko' parcaja ka Salerana. Sengko' epaperak ban etolong, sengko' ngagungngagi Salerana, anyanye lagu asokkor.
[8] PANGERAN apareng kakowadan ka ommadda, abilla ban masalamet rato peleyanna.
[9] Parenge salamet ommattepon Junandalem, GUSTE, berkadi reng-oreng kaagungannepon Junandalem. Kasokana Junandalem daddi se ngowan monggu ka reng-oreng gapaneka, kasokana ajaga sadajana kaangguy salanjangnga.