[1] Kaangguy pamimpinna koor. Dhari Daud, e bakto ngatorragi kurban parengeddan.
[2] Ya Allah, nyo'ona salamet abdidalem, ngereng duli tolong abdidalem, GUSTE!
[3] Diggal oreng se terro mateyana abdidalem me' olle epakala sareng buru kabingongan. Diggal oreng se asorak polana abdidalem manggi kasossa'an me' olle tako', laju nyorot sareng eya-seya.
[4] Diggal oreng se ngala'-gella' abdidalem me' olle takerjat sareng malo.
[5] Sadajana oreng se nyemba ka Junandalem moga eparengngana perak sareng gumbira. Sadajana oreng se asokkor lantaran epasalamet Junandalem moga ros-terrosana ngoca', “Agung onggu Pangeran reya!”
[6] Abdidalem ka'dhinto mesken sareng ta' gadhuwan kakowadan; ngereng duli rabu, Guste Allah. Junandalem se nolong sareng masalamet abdidalem, ngereng ja' patellat se nolonga abdidalem, GUSTE.