[1] Kaangguy pamimpinna koor. Menorot nyanyeyan: Mahalat. Nyanyeyan pangajaranna Daud.
[2] Oreng gendheng ngoca' e dhalem atena, “Allah reya tadha'.” Reng-oreng jareya tadha' se alakowa becce'; tengkana talebat juba'.
[3] Dhari sowarga Pangeran ngoladi ommat manossa, nyare oreng bicaksana se abakte ka Salerana.
[4] Tape reng-oreng la padha nyaleyot ban bejjat kabbi, tadha' settonga se bagus tengkana.
[5] Dhabuna Pangeran, “Ba' ta' apangrasa'a reng-oreng jahat jareya? Odhi'na dhari arampase dhi'-andhi'na Tang ommat, ban ta' tao adu'a ka Sengko'.”
[6] Oreng jahat bakal padha'a katako'en, maske tadha' barang se kodu ekatako'e, polana Allah nabur tolangnga reng-oreng se ngeppong ba'na; Allah nolak reng-oreng jareya, daddi ba'na bakal makala'a reng-oreng jareya.
[7] Moga dhari Gumo' Siyon dhatengnga kasalameddan monggu ka ommat Isra'il. Saapa'a gumbirana oreng toronanna Yakub mon kabadha'anna bi' Allah epabali akantha asalla pole.