[1] Nyanyeyan kaangguy are Sabat.
[2] Ce' saena asokkor ka Junandalem, GUSTE, sareng moji Junandalem, Allah Se Mahatenggi;
[3] aberta'agi kataresna'annepon Junandalem e baja laggu, ngabarragi kaestowannepon Junandalem e baja malem,
[4] sambi nabbu gitar se talena sapolo, etoro'e gambus sareng calempong.
[5] Sabab sadaja se elampa'agi Junandalem maperak ate abdidalem, abdidalem anyanye gumbira lantaran karyaepon Junandalem.
[6] Raja onggu sadaja se elampa'agi Junandalem, GUSTE, dhalem onggu panggaliyannepon Junandalem!
[7] Oreng budhu ta' bisa ngarte, oreng gendheng ta' bisa paham parkara gapaneka.
[8] Olle daddi oreng se daraka tombu landhu akadi rebba, oreng jahat atamba sogi sareng ma'mor; namong reng-oreng gapaneka bakal epatompessa sadaja,
[9] sabab Junandalem, GUSTE, kobasa salanjangnga.
[10] Abdidalem sadaja padha oneng, mosoepon Junandalem badhi epamosna'a, Guste, sadajana oreng jahat badhi epabalessudana.
[11] Sareng Junandalem abdidalem epakowat akadi bantheng alas, eberkadi eparenge kasennengngan.
[12] Abdidalem nengale kakala'anna so-moso abdidalem, reng-oreng se nyerrang abdidalem, abdidalem ampon mereng sadajana sajjaepon se jahat.
[13] Oreng jujur nyemme akantha bungkana korma, tombu landhu akantha bungkana comara e Libanon.
[14] Reng-oreng jareya akantha kajuwan se etamen e Padalemman Socce, ban atamba raja e Padalemmanna, Allahna sengko' ban ba'na
[15] kajuwan se gi' abuwa maske la towa, paggun biru ban cengngar.
[16] Jareya buktena ja' PANGERAN adil; Pangeran jareya se abillai sengko', Pangeran jareya ta' roce sakale.