[1] Kaangguy pamimpinna koor. Nyanyeyan. Mara asorak amolja'agi Allah, ommat manossa sadunnya!
[2] Mara anyanye ngagungngagi asmana, molja'agi Salerana ngangguy ji-pojiyan.
[3] Mara mator ka Allah, “Se elampa'agi Junandalem makasambu' ate onggu! Moso asojud katako'en ka Junandalem, amarga kobasaepon Junandalem talebat rajana.
[4] Saantero bume asojud nyemba ka Junandalem, padha anyanye amolja'agi asmaepon Junandalem.”
[5] Mara nyander, abassagi apa se elampa'agi Allah, makasambu' ate onggu se elampa'agi Salerana e antarana manossa!
[6] Tase' eoba epadaddi tana kerreng, elebadi bangatowana sengko' ban ba'na kalaban ajalan soko sampe' entas ka tenggangan. Daddi sengko' ban ba'na padha perak polana sabarang se elampa'agi Salerana.
[7] Allah salanjangnga marenta kalaban parjuga. Sa-bangsa eoladi ban ejaga, sopaja se aberonta' ta' ngenneng ga'-maangga' ka Salerana.
[8] Mara molja'agi tang Allah, sa-bangsa, poji Salerana, pakaja sowarana!
[9] Salerana ajaga sengko' ban ba'na sopaja pagguna odhi', ejaga sopaja ta' sampe'a labu.
[10] Ya Allah, Junandalem ampon ngoji abdidalem sadaja akadi oreng se mamorne salaka e dhalem apoy se raja.
[11] Sareng Junandalem, abdidalem sadaja edinggal tabalusok ka dhalem jebbak, sareng eparenge tanggungan se talebat berra'.
[12] Sareng Junandalem abdidalem sadaja edinggal enyek-enyek moso; abdidalem sadaja lebat e banjir sareng apoy. Namong samangken abdidalem sadaja sareng Junandalem ampon ebakta ka kennengngan se ma'mor.
[13] Abdidalem abakta'a kurban obbaran ka dalemmepon Junandalem, sareng neptebbana janji abdidalem ka Junandalem,
[14] janji se ekoca'agi abdidalem e bakto abdidalem kasossa'an.
[15] Abdidalem ngatorragi ka Junandalem kurban obbaran keban peleyan, embi' dumba sareng sape lake', okossa ngebbul ka langnge'.
[16] Mara padha dha' enna', reng-oreng alem, bi' sengko' ecareta'ana apa se elampa'agi Allah ka sengko'.
[17] Sengko' la aserro nyo'on tolong ka Salerana; sateya sengko' anyanye pojiyan amolja'agi asmana.
[18] Ja' sakenga sengko' lebur mekkere kajahadan, Pangeran tanto ta' kasokan meyarsa'agi maske sakejja'.
[19] Tape Allah meyarsa'agi tang du'a, sarta agateyagi tang parnyo'onan.
[20] Sengko' amolja'agi Allah sabab Allah ta' nolak tang du'a, ban taresna ka sengko' tadha' ambuna.