[1] Dhari Daud. Ja' posang pekkerra polana oreng jahat, ja' ere atena ka oreng se alako sala.
[2] Sabab reng-oreng jareya bakal duliya elang akantha rebba, bakal mateya akantha men-tamennan se elop dhaunna.
[3] Paparcaja ka PANGERAN, ban lakone se bagus, enneng e nagara jareya ban paesto ka PANGERAN, tanto ba'na salamet.
[4] Sare kasennengngan e PANGERAN, tanto Salerana marenge apa pangaterrona ba'na.
[5] Passra'agi odhi'na ba'na ka PANGERAN, ngarep ka Salerana, tanto ba'na eparenge partolongan.
[6] Kaestowanna ba'na tanto epanyonar, kabagusanna atena epatera' akantha seyang.
[7] Pasabbar atena anante' PANGERAN alampa'agi karsana. Ja' ngalengsang polana oreng laen pojur odhi'na, otaba polana oreng laen ahasel ngalakone kajahadanna.
[8] Ja' peggel otaba panas atena, jareya pera' madhateng calaka'.
[9] Sabab oreng se alako jahat bakal epatompessa, tape se ngarep ka PANGERAN bakal narema'a sangkol tana rowa.
[10] Oreng jahat bakal duliya mosna, mon esare ta' kera etemmo.
[11] Oreng se andhap asor atena bakal abarisana tana rowa, ban arassa'agi kobassana kama'moran se ta' sakera-kera.
[12] Oreng jahat andhi' sajja juba' ka oreng becce', ngabas ka oreng jareya kalaban ate baji'.
[13] Tape oreng jahat ekala'-gella' bi' PANGERAN, sabab PANGERAN ngagali oreng jareya para' mateya.
[14] Oreng jahat ngonos peddhangnga, ngaceddagi panana, mateyana oreng mesken ban nyangsara, ajagala reng-oreng se becce' odhi'na.
[15] Tape oreng jahat bakal mateya bi' peddhangnga dibi', gandhibana bakal epapotonga.
[16] Barang sakone' andhi'na oreng becce' atena, lebbi arga katembang dhi'-andhi'na oreng jahat se talebat bannya'na.
[17] Sabab kobasana oreng jahat bakal epotella bi' PANGERAN, tape oreng becce' bakal eparengngana pangaobanna.
[18] PANGERAN ajaga odhi'na oreng se alem, sangkol barisanna ekaandhi' salanjangnga.
[19] E dhalem karekonganna reng-oreng jareya ta' kera nyandhang sossa, e jaman laep ta' kera kakorangan kakan.
[20] Tape oreng jahat bakal mateya, mosona PANGERAN bakal elanga akantha kembang e teggal, mosna akantha okos.
[21] Oreng jahat jam-ngenjam ta' endha' mabali, tape oreng becce' ari'-berri' kalaban ate lamba'.
[22] Oreng se eberkadi PANGERAN bakal abarisana tana rowa, tape oreng se ebasto Salerana bakal etondhunga.
[23] Pangeran nonton oreng e jalan se samasthena, ngaobi oreng se odhi'na katarema ka Salerana.
[24] Mon labu, oreng jareya ta' kera berra' lokana, sabab PANGERAN tanto nyandhak tanangnga.
[25] Molae sengko' gi' ngodha sampe' towa, ta' tao nangale'e oreng becce' edinggallagi PANGERAN, otabana se na' potona ngemmes kakanan.
[26] Oreng jareya maenjam ban aberri' ros-terrosan, na'-ana'na daddi berkat ka aba'na.
[27] Onduri se juba', lakone se becce', tanto toronanna ba'na bakal terrosa ngennengnge tana jareya.
[28] Sabab PANGERAN kasokan ka barang se adil ban teppa', oreng se esto ka Salerana ta' kera epanyangsara odhi'na. Reng-oreng jareya eaobi salanjangnga, tape toronanna oreng jahat bakal epatompessa.
[29] Oreng se alem bakal abarisana tana rowa, enneng e jadhiya salanjangnga.
[30] Oreng becce' mon acaca bicaksana, jujur totor ban oca'na.
[31] Hokomma Allahna esempen e dhalem atena, ta' tao nyaleyot dhari kom-hokom jareya.
[32] Oreng becce' eencer oreng jahat, se nyare kasempadan mateyana.
[33] Tape bi' PANGERAN oreng jareya ta' edina gaggar ka tanangnga mosona, otaba narema okoman e bakto eadili.
[34] Nyo'on ka PANGERAN ban ta'adi dhabuna, ba'na tanto eangka' epanarema barisan tana rowa; ban epanangale oreng jahat epamosna.
[35] Sengko' tao nangale oreng jahat se raja cacana; akantha comara Libanon se ngongkole sakabbinna oreng tenggina.
[36] E bakto sengko' lebat, oreng jareya la tadha'; bi' sengko' esare, la ta' etemmo pole.
[37] Abassagi oreng becce' ban se berse atena; oreng se ta' endha' atokaran tanto senneng e budhi arena.
[38] Tape oreng dusa bakal epamateya, toronanna bakal epamosna'a.
[39] Oreng alem epasalamet bi' PANGERAN, sarta ejaga ban etolong e bakto karekongan.
[40] Reng-oreng jareya epasalamet ban eparenge partolongan, epalopot dhari oreng jahat, sabab reng-oreng jareya nyo'on tolong ka Salerana.