[1] Jaburra Asaf. Allah reya sae onggu ka ommadda, ka oreng se morne atena.
[2] Tape sengko' la mangmang, tang kaparcaja'an para' elanga,
[3] sabab sengko' arassa tamburuwan ka oreng se angga', e bakto sengko' nangale oreng jahat se nyaman odhi'na.
[4] Sabab reng-oreng jareya ta' nanggung sake' pa-apa, badanna baras ban kowat.
[5] Reng-oreng jareya ta' nanggung sossa, ta' palang akantha oreng laenna.
[6] Polana reng-oreng jareya sombong pannengnga, ban ajalannagi kakerrasan salanjangnga.
[7] Dhari atena ngalowa kajahadan; kabbi padha repot ban maksod se jahat.
[8] Oreng laen ekala'-gella' ban eca'-koca'e, eara ekaneyaja'a, gathagga ta' jama'.
[9] Allah se jumenneng e sowarga eca'-koca'e, ban asebbal ka reng-oreng e bume,
[10] sampe' ommadda Allah abalik noro' reng-oreng jareya, ban parcaja ka cacana.
[11] Ca'na reng-oreng jareya, “Allah ta' kera ngagali, Se Mahatenggi ta' kera ngarte.”
[12] Kantha jareya kabadha'anna oreng jahat; odhi'na nyaman, dhi'-andhi'na sajan atamba.
[13] Parcoma sengko' ajaga sopaja tang ate berse; tadha' gunana sengko' ajauwi dusa.
[14] Sabab saare benteng sengko' terros palang; sabban laggu sengko' eseksa.
[15] Ja' sakenga abdidalem ngoca' kadi gapaneka, abdidalem akiyanadi angkadanna tra-pottraepon Junandalem.
[16] Namong e bakto abdidalem ngoddi terro ngarteya, parkara gapaneka ka abdidalem ce' malaradda rassana.
[17] Dhi-budhina abdidalem maso' ka Padalemmannepon Junandalem, abdidalem laju ngarte aherrepon odhi'na oreng jahat.
[18] Sareng Junandalem reng-oreng gapaneka esaba' e lorong se lecen, ediggal kantos padha labu laju mate.
[19] E dhalem saparngedep padha ancor sadajana, aherrepon odhi'na nako'e parana.
[20] Reng-oreng gapaneka akadi mempe se elang e baja laggu; e bakto Junandalem ngadek, GUSTE, reng-oreng gapaneka ampon tadha'.
[21] E bakto abdidalem arassa caremmet sareng ate arassa peggel,
[22] abdidalem budhu sareng ta' ngarte, akadi keban e ajunannepon Junandalem.
[23] Sanajjan saka'dhinto, abdidalem teptep badha e seddi'annepon Junandalem, Junandalem ngastane tanang abdidalem.
[24] Junandalem nonton abdidalem sareng babala'an, ban pagi' narema'a abdidalem kalaban kahormadan.
[25] Pasera se ekaandhi' abdidalem e sowarga kajabana Junandalem? Salaenna Junandalem tadha' pole se ekaterrowe abdidalem e bume.
[26] Sanajjan sokma sareng badan abdidalem ta' kowat, Junandalem kakowadan abdidalem, Guste Allah; namong Junandalem se ekaandhi' abdidalem salanjangnga.
[27] Oreng se adinggallagi Junandalem tanto calaka', se ta' esto ka Junandalem tanto sareng Junandalem epamosna.
[28] Tape monggu ka sengko' bagus mon semma' ban Allah, Guste ALLAH Se Mahatenggi bi' sengko' egabay tang pangaoban, sopaja sengko' bisa'a aberta'agi sabarang se elampa'agi Salerana.