[1] Mô-sî tui Mô-ap phìn-ngièn pak-sông Nì-pô-sân, to Yâ-li-kô tui-mien ke Pí-sṳ̂-kâ-sân táng-kô. Song-chú chhai ke-vi pûn kì khon-tó Kâ-nàm chhiòn-thi: tui Kî-lie̍t to pet-phién ke Tan-sàng,
[2] Nâ-fut-thâ-li chhiòn-thi, Yî-fap-lièn lâu Mâ-nâ-sî thi-khî, Yù-thai chhiòn-thi, hiong-sî theu-to Thi-chûng-hói,
[3] Yù-thai ke nàm-phu, lâu tui Só-ngí to chûng-su sàng Yâ-li-kô chûng-kiên ke phìn-ngièn.
[4] Song-chú tui Mô-sî kóng: “Liá kûi-te thú-thi chhiu-he Ngài yin-hí Â-pak-lâ-hón, Yî-sat, Ngâ-kok oi su-pûn kì-têu chṳ́-sûn ke. Ngài yí-kîn pûn ngì chhîn-ngién khon-tó liá-te thú-thi, chúng-he ngì cho-m̀-tet ngi̍p-hi.”
[5] Án-ngiòng, Song-chú ke phu̍k-ngìn Mô-sî chhiu chhai Mô-ap-thi ko-sṳ̂n, he cheu Song-chú só-kóng ke.
[6] Song-chú chiông kì mài chhai Pak-Phî-ngí-sàng tui-mien ke Mô-ap sân-lak; chhṳ̍t-to kîm-pû-ngit, mò-ngìn tî kì ke fùn-mu chhai nai-vi.
[7] Mô-sî ko-sṳ̂n ke sṳ̀ yit-pak ngi-sṳ̍p se, sṳ̂n-thí hàn-khien, muk-chû ya hàn chhin-kîm.
[8] Yî-set-lie̍t ngìn-mìn chhai Mô-ap phìn-ngièn vi Mô-sî sông-sîm thai-kieu sâm-sṳ̍p ngit, phan sông-sṳ ke khì-kiên chhiu mân lé.
[9] Nun ke lai-é Yok-sû-â pûn chṳ-fi ke Lìn chhûng-mân, yîn-vi Mô-sî on-sú sat-li̍p kì cho ki-sṳ̀n-ngìn. Yî-set-lie̍t ngìn-mìn chhiu thâng-chhiùng Yok-sû-â, chûn-hàng Song-chú thûng-ko Mô-sî pân-pûn kì-têu ke kie-min.
[10] Yî-set-lie̍t chûng chhṳ-chhiùng màng-sṳt yû chhiong Mô-sî án-ngiòng ke siên-tî; yîn-vi Song-chú mien-tui-mien ngin-sṳt kì.
[11] Song-chú sṳt phai Mô-sî tui-fu Âi-khi̍p-vòng, kì ke kôn-yèn, lâu Âi-khi̍p chhiòn-koet; mò ngìn nèn hàng Mô-sî chhai ke-vi só-hàng ke sṳ̀n-chiak khì-sṳ.
[12] Mô-sî ya sṳt chhai chhiòn Yî-set-lie̍t ngìn-mìn mien-chhièn hàng tông-thai tông tet-ngìn-kiâng ke sṳ.